AKP កំពង់ធំ ថ្ងៃទី២៣ ខែតុលា ឆ្នាំ២០២៦--ក្រោមជំនួយឧបត្ថម្ភពីក្រុមហ៊ុនធានារ៉ាប់រងអាយុជីវិតAIA កាលពីថ្ងៃទី២២  ខែតុលា ឆ្នាំ២០២៦លោកស្រី ស៊ូ ផារិន អនុប្រធានមន្ទីរកិច្ចការនារីខេត្តកំពង់ធំបានចុះបើកយុទ្ធនាការអប់រំសហគមន៍ស្ដីពីជំងឺមហារីកមាត់ស្បូន មហារីកសុដន់ អាហារូបត្ថម្ភនិងចំណេះដឹងហិរញ្ញវត្ថុនៅសាលាឃុំតាំងក្រសៅ ស្រុកប្រាសាទសំបូរ ខេត្តកំពង់ធំដោយមានការអញ្ជើញចូលរួមអំពីលោក ថន ស៊ីពុទ្ធា អភិបាលរងស្រុកប្រាសាទសំបូរ លោកស្រី មុំ ច័ន្ទសុវណ្ណដា ប្រធានមណ្ឌលសុខភាពតាំងក្រសៅ លោកស្រីប្រធានការិយាល័យសង្គមកិច្ច និងសុខុមាលភាពសង្គមស្រុកប្រាសាទសំបូរ លោកមេឃុំ សមាជិកក្រុមប្រឹក្សាឃុំ លោកមេភូមិ អនុភូមិ សមាជិកភូមិនឹងប្រជាពលរដ្ឋសរុបចំនួន២១៩នាក់ (ស្រី២១២នាក់)។

‎លោក ថន ស៊ីពុទ្ធាបានលើកឡើងថា ជំងឺមហារីកមាត់ស្បូនជំងឺមហារីកសុដន់កំពុងតែក្លាយទៅជាជំងឺដ៏គួរឱ្យមានការព្រួយបារម្ភពីព្រោះថា វាកំពុងតែមានការកើនឡើងជារៀងរាល់ថ្ងៃ។ហេតុដូច្នេះសុំឱ្យបងប្អូនដែលជាស្ត្រីនិងក្មេងស្រី ត្រូវតែគិតគូរអំពីបញ្ហាសុខភាពរបស់ខ្លួន តាមរយៈការរស់នៅជាប្រចាំថ្ងៃដោយបរិភោគនូវអាហារដែលមានអនាម័យត្រឹមត្រូវ មានជីវជាតិគ្រប់គ្រាន់និងឆ្លៀតទៅពិនិត្យសុខភាពរបស់ខ្លួនជាប្រចាំ ដើម្បីដឹងពីស្ថានភាពរបស់ខ្លួននិងព្យាបាលឱ្យទាន់ពេលវេលា។

‎លោកស្រី ស៊ូ ផារិន បានលើកឡើងថា តាមរយៈគម្រោងលើកកម្ពស់សុខភាពនិងហិរញ្ញវត្ថុ សម្រាប់ស្ត្រីនៅកម្ពុជា បានបង្ហាញពីភាពជាដៃគូសំខាន់ រវាងរាជរដ្ឋាភិបាលនិងវិស័យឯកជននិងបញ្ជាក់ច្បាស់ពីកិច្ចសហប្រតិបត្តិការរវាងក្រសួងកិច្ចការនារី និងក្រុមហ៊ុនធានារ៉ប់អាយុជីវិត AIA ក្នុងការចូលរួមចំណែក លើកកម្ពស់សមភាពយេនឌ័រនិងសិទ្ធិស្ត្រី នៅក្នុងវិស័យសុខភាព។ ជាពិសេស ការប្រយុទ្ធប្រឆាំងនឹងជំងឺមិនឆ្លងដែលបច្ចុប្បន្ននេះ ជំងឺមិនឆ្លង កំពុងតែផ្ដល់ ផលប៉ះពាល់យ៉ាងធ្ងន់ធ្ងរដល់សុខភាព និងជីវភាពរស់នៅរបស់ប្រជាជននៅលើពិភពលោក និងនៅក្នុងប្រទេសកម្ពុជា ជាពិសេស ស្ត្រីនិងក្មេងស្រី។ 

យុទ្ធនាការនេះនិងផ្ដល់ផលប្រយោជន៍ដល់ប្រជាជនគោលដៅនិងបានចូលរួមកាត់បន្ថយ អត្រាស្លាប់ របស់ប្រជាជនដោយសារជំងឺមិនឆ្លង ពីព្រោះថា៨០% នៃជំងឺមិនឆ្លងគឺអាចការពារបានបើសិនជាមានការអន្តរាគមន៍ដែលមានប្រសិទ្ធភាពខ្ពស់និងព្យាបាលឱ្យទាន់ពេលវេលា សូម្បីតែអ្នកជំងឺដែលមានជំងឺមិនឆ្លងរួចទៅហើយនោះ ក៏អាចរក្សាសុខភាពឲបានល្អ ជាធម្មតា ជាមួយនឹងសមាជិកគ្រួសារនិងសង្គម តាមរយៈ ការគ្រប់គ្រងខ្លួនឯង ដោយកាត់បន្ថយនូវការប្រើប្រាស់គ្រឿងស្រវឹង ថ្នាំជក់ ការប្រើប្រាស់អំបិលច្រើននិងជាតិខ្លាញ់ក្នុងអាហារច្រើនព្រមទាំងការធ្វើលំហាត់ប្រាណជាប្រចាំនិងទៀងទាត់ជាដើម។

ជំងឺមហារីកមាត់ស្បូនមានថ្នាំសម្រាប់ចាក់ការពារ ដូច្នេះសូមឱ្យអាណាព្យាបាលយកកូនស្រីដែលមានអាយុចាប់ពី៩ឆ្នាំដល់១៣ឆ្នាំទៅចាក់ថ្នាំការពារជំងឺមហារីកមាត់ស្បូន ដើម្បីបង្ការនូវជំងឺនេះ។

លោកស្រីអនុប្រធានមន្ទីរក៏បានលើកឡើងពីអាហារូបត្ថម្ភ អាហារ៣ក្រុម ឱកាសមាស១០០០ថ្ងៃរបស់ទារកនិងបញ្ហាការកើតស្លាប់ និងស្លាប់របស់ទារកក្នុងឆ្នាំ២០២៥មានការកើនឡើង ដូច្នេះដើម្បីកាត់បន្ថយអត្រាស្លាប់កើត និងកើតស្លាប់របស់ទារក លោកស្រីអនុប្រធានមន្ទីរក៏បានជំរុញឱ្យស្រ្តីដែលមានផ្ទៃពោះទាំងអស់ទៅពិនិត្យផ្ទៃពោះឱ្យបានទៀងទាត់តាមការណាត់ជួបរបស់គ្រូពេទ្យ និងលើកទឹកចិត្តឱ្យស្រ្តីគ្រប់រូបថែទាំសុខភាព មានអនាម័យល្អ។លោកស្រីមានសង្ឃឹមយ៉ាងមុតមាំថា បន្ទាប់ពីបញ្ចប់យុទ្ធនាការនេះ ពេលដែលបងប្អូនត្រឡប់ទៅផ្ទះវិញ ហ្នឹងយកចំណេះដឹងទាំងនេះទៅអនុវត្ត នៅក្នុងមូលដ្ឋានរបស់ខ្លួន និងចែករំលែកបន្ត ក្នុងគោលបំណងដើម្បីឱ្យបងប្អូនដែលជាស្ត្រីនិងក្មេងស្រី មានសមត្ថភាពចេះពិនិត្យស្ទាបរកជំងឺមហារីកសុដន់ ដោយខ្លួនឯងហើយទទួលបានការព្យាបាលទាន់ពេលវេលាកាត់បន្ថយអត្រានៃការស្លាប់ដោយសារជំងឺមិនឆ្លងមួយនេះ៕

ដោយ ស៊ុម វណ្ណា