AKP ភ្នំពេញ ថ្ងៃទី២២ ខែតុលា ឆ្នាំ២០២៦ -- នៅទីស្ដីការក្រសួងសង្គមកិច្ច អតីតយុទ្ធជន និងយុវនីតិសម្បទា (ស.អ.យ.) នាថ្ងៃទី២២ ខែតុលា ឆ្នាំ២០២៦ នេះ ឯកឧត្ដម ញ៉ឹក វណ្ណារ៉ា រដ្ឋលេខាធិការ និងជាអនុប្រធានអចិន្ត្រៃយ៍ គ.ជ.អ បានចូលរួមដឹកនាំកិច្ចប្រជុំពិគ្រោះយោបល់ និងផ្ដល់ធាតុចូលទៅលើសេចក្ដីព្រាងនីតិវិធីប្រតិបត្តិសម្រាប់កំណត់អត្តសញ្ញាណ និងគ្រប់គ្រងជនអនាថា (SOP) និងកិច្ចព្រមព្រៀង ស្ដីពីកិច្ចសហប្រតិបត្តិការរវាងអនុគណៈកម្មាធិការដោះស្រាយបញ្ហជនអនាថា(អ.គ.អ) រាជធានី ខេត្ត និងខេត្ត។
ឯកឧត្ដម ញ៉ឹក វណ្ណារ៉ា បានលើកឡើងថា កិច្ចប្រជុំនេះមានគោលបំណងផ្ដល់នូវដំណោះស្រាយជាយុទ្ធសាស្ត្រ និងលក្ខណៈជាប្រព័ន្ធគ្រប់ជ្រុងជ្រោយប្រកបដោយសង្គតិភាពដើម្បីកាត់បន្ថយភាពអនាថា ដែលនឹងរួមចំណែកសម្រេចនូវគោលបំណងនៃគោលនយោបាយភូមិ-ឃុំ-សង្កាត់មានសុវត្ថិភាព។

នៅក្នុងកិច្ចប្រជុំនេះ មានការចូលរួមពីឯកឧត្ដម លោកជំទាវអគ្គនាយក អគ្គនាយករង លោក លោកស្រី អភិបាលរងខេត្ត និងជាអនុគណៈកម្មាធិការដោះស្រាយបញ្ហាជនអនាថា (អ.គ.អ) រាជធានី ខេត្ត លោក លោកស្រី ប្រធាន អនុប្រធាននាយកដ្ឋាន លោក លោកស្រី ប្រធាន ឬតំណាងមន្ទីរ ស.អ.យ រាជធានី ខេត្ត មន្ត្រីជំនាញនៃនាយកដ្ឋានគាំពារជនរងគ្រោះ និងលោក លោកស្រីតំណាងអង្គការដៃគូ សរុបចំនួន ៧០នាក់៕

ដោយ៖ ណយ នឿន (ប្រភព៖ ក្រសួងសង្គមកិច្ច អតីតយុទ្ធជន និងយុវនីតិសម្បទា)