AKP ភ្នំពេញ ថ្ងៃទី២១ ខែតុលា ឆ្នាំ២០២៦ -- វឌ្ឍនភាពជាសកលឆ្ពោះទៅរកគោលដៅចំនួន២៣ ដែលមានបំណងបញ្ឈប់ និងត្រឡប់ស្ថានការណ៍នៃការបាត់បង់ជីវៈចម្រុះឱ្យប្រសើរឡើងវិញត្រឹមឆ្នាំ២០៣០ កំពុងស្ថិតក្រោមការត្រួតពិនិត្យជាសកលលើកដំបូង នៅក្នុងកិច្ចប្រជុំកំពូលរបស់អង្គការសហប្រជាជាតិមួយ ដែលបានចាប់ផ្តើមកាលពីដើមសប្តាហ៍នេះនៅក្នុងទីក្រុងយ៉េរ៉េវ៉ាន់ របស់ប្រទេសអាមេនី។

កិច្ចប្រជុំលើកទី១៧ នៃភាគីហត្ថលេខីនៃអនុសញ្ញាស្តីពីជីវៈចម្រុះដែលគេស្គាល់ថាជា CBD COP17 នឹងបន្តរហូតដល់ថ្ងៃទី៣០ ខែតុលាក្រោមប្រធានបទ «ការចាត់វិធានការដើម្បីធម្មជាតិ»។

កិច្ចប្រជុំនេះ គឺជាចំណុចពាក់កណ្តាលផ្លូវរវាងការអនុម័តលើ«ក្របខ័ណ្ឌជីវៈចម្រុះសកលលោក គុនមីង-ម៉ុងត្រេអាល់» ក្នុងឆ្នាំ២០២២និងកាលកំណត់នៅឆ្នាំ២០៣០។

របាយការណ៍ថ្មីមួយរបស់អង្គការសហប្រជាជាតិ ដែលបានចេញផ្សាយនៅពេលចាប់ផ្តើមនៃកិច្ចប្រជុំកំពូលនេះ បានរកឃើញថា ភាគីហត្ថលេខីជិត៩០% បានកំណត់គោលដៅជីវៈចម្រុះថ្នាក់ជាតិ ហើយជាង ៧០% បានដាក់របាយការណ៍ ស្តីពីវឌ្ឍនភាពរួចហើយ។ ទោះជាយ៉ាងណាក៏ដោយគោលដៅថ្នាក់ជាតិដែលត្រូវបានវាយតម្លៃដោយរដ្ឋាភិបាលនានា មានតិចជាងពាក់កណ្តាលប៉ុណ្ណោះ ដែលកំពុងដំណើរការទៅតាមផែនការត្រឹមត្រូវ។

កិច្ចចរចានៅក្នុងទីក្រុងយ៉េរ៉េវ៉ាន់ នឹងផ្តោតសំខាន់ទោលើការពន្លឿនការអនុវត្ត ការកៀរគរធនធានហិរញ្ញវត្ថុ ការពង្រឹងការណែនាំផ្នែកវិទ្យាសាស្ត្រ និងការបង្កើនការចូលរួមពីសំណាក់ជនជាតិដើមភាគតិច និងសហគមន៍មូលដ្ឋាន។

សាស្ត្រាចារ្យ ដូហ្គែន យ៉ាសារ សមាជិកនៃក្រុមការងារ ស្តីពីបរិស្ថានជីវៈចម្រុះ និងការប្រែប្រួលអាកាសធាតុ នៃបណ្ឌិត្យសភាវិទ្យាសាស្ត្រតួកគីយ៉េ បានប្រាប់ទីភ្នាក់ងារសារព័ត៌មានអាណាដូលូថា «គោលដៅចម្បងនៃកិច្ចប្រជុំនេះ គឺការវាយតម្លៃឡើងវិញនូវអ្វីដែលបានធ្វើកន្លងមក ការកំណត់នូវអ្វីដែលត្រូវធ្វើបន្តទៀត និងការរៀបចំឡើងវិញនូវផ្នែកនានាដែលវឌ្ឍនភាពនៅមានកម្រិតមិនទាន់គ្រប់គ្រាន់»។

លោក យ៉ាសារ បានលើកឡើងថា ជំហានបន្ទាប់គួរតែជាការប្រែក្លាយការប្តេជ្ញាចិត្តថ្នាក់ជាតិទៅជាវិធានការជាក់ស្តែង តាមរយៈយន្តការទទួលខុសត្រូវដ៏រឹងមាំជាងមុន៕

ដោយ៖ យា ចិន្ដាខន្ដី (ប្រភព៖ AA-AKP)