AKP ភ្នំពេញ ថ្ងៃទី២១ ខែតុលា ឆ្នាំ២០២៦--នៅក្នុងកិច្ចសម្ភាសន៍ពិសេសស្តីពីលទ្ធផលនៃកិច្ចប្រជុំលើកទី២ នៃគណៈកម្មការផ្សះផ្សាក្រោមអនុសញ្ញាសហប្រជាជាតិស្តីពីច្បាប់សមុទ្រ (UNCLOS) រវាងកម្ពុជា និងថៃ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានគូសបញ្ជាក់យ៉ាងច្បាស់ៗ ដើម្បីឆ្លើយតបទៅនឹងការចោទប្រកាន់របស់ភាគីថៃនាពេលកន្លងមក ដែលថាកម្ពុជា«ដើរតួជាអ្នករងគ្រោះ»។

ឯកឧត្តមឧបនាយករដ្ឋមន្ត្រី ប្រាក់ សុខុន បានមានប្រសាសន៍ថា នៅក្នុងសន្ទរកថានៃសេចក្តីប្រកាសបើករបស់ភាគីថៃ គេបានចោទប្រកាន់ថាកម្ពុជាព្យាយាមដើរតួជាជនរងគ្រោះ។ ឆ្លើយតបទៅនឹងបញ្ហានេះ ឯកឧត្តមបានបញ្ជាក់ជំហរយ៉ាងម៉ឹងម៉ាត់ និងសាមញ្ញថា៖

«បើសិនជាយើងនៅចាំបាន សន្ទរកថានៅក្នុងសេចក្ដីប្រកាសបើករបស់ខាងភាគីថៃ គាត់ចោទប្រកាន់កម្ពុជាយើងថា យើងដើរតួជាអ្នករងគ្រោះ។ ហើយខ្ញុំក៏សូមឆ្លៀតឱកាសនេះដើម្បីឆ្លើយតបទៅវិញយ៉ាងសាមញ្ញថា កម្ពុជាមិនមានការចាំបាច់នៅក្នុងការដើរតួជាអ្នករងគ្រោះទេ ពីព្រោះយើងជាអ្នករងគ្រោះស្រាប់ទៅហើយ»។

ការថ្លែងសារបដិសេធ និងទាត់ចោលការចោទប្រកាន់របស់ភាគីថៃនេះ បានបង្ហាញយ៉ាងច្បាស់ពីជំហររឹងមាំ និងភាពត្រឹមត្រូវរបស់កម្ពុជា ក្នុងការការពារសិទ្ធិ អធិបតេយ្យភាព និងផលប្រយោជន៍ស្របច្បាប់របស់ជាតិនៅលើឆាកអន្តរជាតិ ដោយផ្អែកលើទឡ្ហីករណ៍ច្បាប់ និងការពិតជាក់ស្តែង ដោយមិនចាំបាច់ធ្វើការសម្តែង ឬលាបពណ៌ណាមួយឡើយ៕

ដោយ៖ គង់ សិរីរ័ត្ន