AKP ភ្នំពេញ ថ្ងៃទី២០ ខែតុលា ឆ្នាំ២០២៦ -- ប្រភពពីប៉ាឡេស្ទីនបានឱ្យដឹងថា ជនជាតិប៉ាឡេស្ទីនចំនួន ៤នាក់ក្នុងនោះមានកុមារម្នាក់ផងដែរ ត្រូវបានសម្លាប់ដោយការបាញ់ប្រហារពីសំណាក់កងទ័ពអ៊ីស្រាអែល នៅតាមតំបន់ផ្សេងៗគ្នាក្នុងតំបន់ហ្គាហ្សាស្ទ្រីប កាលពីថ្ងៃអាទិត្យ។

ប្រភពពីមន្ទីរពេទ្យនៅមជ្ឈមណ្ឌលវេជ្ជសាស្ត្រ Al-Shifa ក្នុងទីក្រុងហ្គាហ្សា បានប្រាប់ទីភ្នាក់ងារសារព័ត៌មាន Xinhua ថា មន្ទីរពេទ្យបានទទួលសាកសពជនជាតិប៉ាឡេស្ទីនម្នាក់ដែលត្រូវបានសម្លាប់នៅពេលដែលយន្តហោះដ្រូនរបស់អ៊ីស្រាអែលបានវាយប្រហារទៅលើក្រុមជនស៊ីវិលមួយក្រុមនៅលើផ្លូវមួយស្ថិតនៅភាគខាងលិចនៃទីក្រុងហ្គាហ្សា។ លើសពីនេះ ក៏មានមនុស្សមួយចំនួនទៀតបានរងរបួសផងដែរ។

ប្រភពដដែលបានបន្ថែមថា បុរសជនជាតិប៉ាឡេស្ទីនម្នាក់បានស្លាប់ដោយសាររបួសដែលលោកបានទទួល បន្ទាប់ពីត្រូវបានកងកម្លាំងអ៊ីស្រាអែលបាញ់ប្រហារនៅតំបន់ Beit Lahia ស្ថិតនៅភាគខាងជើងនៃតំបន់ហ្គាហ្សាស្ទ្រីប។

នៅភាគខាងត្បូងនៃតំបន់ហ្គាហ្សាស្ទ្រីប ប្រភពពីមន្ទីរពេទ្យមួយបានឱ្យដឹងថា មន្ទីរពេទ្យ Nasser ក្នុងទីក្រុងខាន់យូនីស បានទទួលសាកសពស្ត្រីជនជាតិប៉ាឡេស្ទីនម្នាក់ដែលត្រូវបានសម្លាប់ដោយការបាញ់ប្រហាររបស់កងទ័ពអ៊ីស្រាអែល នៅខាងក្រៅតំបន់ដែលស្ថិតក្រោមការគ្រប់គ្រងរបស់អ៊ីស្រាអែល។

នៅតំបន់កណ្តាលនៃហ្គាហ្សាស្ទ្រីប មន្ទីរពេទ្យ Al-Aqsa ក្នុងទីក្រុងឌៀ អាល់បាឡាហ៍ បានរាយការណ៍ថា កុមារម្នាក់ត្រូវបានសម្លាប់ដោយការបាញ់ប្រហាររបស់កងទ័ពអ៊ីស្រាអែល នៅខាងក្រៅតំបន់ដែលស្ថិតក្រោមការគ្រប់គ្រងរបស់អ៊ីស្រាអែល នៅក្នុងជំរុំជនភៀសខ្លួន Maghazi។

ទន្ទឹមនឹងនេះ អាជ្ញាធរសុខាភិបាលនៅក្នុងតំបន់ហ្គាហ្សាបានឱ្យដឹងថាមន្ទីរពេទ្យនានាទូទាំងតំបន់នេះ បានទទួលសាកសពចំនួន ៧នាក់ និងមនុស្សរងរបួសចំនួន ២៥នាក់ ក្នុងរយៈពេល ២៤ម៉ោងចុងក្រោយនេះ។ ហេតុការណ៍នេះធ្វើឱ្យចំនួនអ្នកស្លាប់សរុប ចាប់តាំងពីបទឈប់បាញ់បានចូលជាធរមានក្នុងខែតុលា ឆ្នាំ ២០២៥ មក មានចំនួន ១.៥១៧នាក់ ហើយចំនួនអ្នករងរបួសមាន ៥.៤០០នាក់។

អាជ្ញាធរបានបន្ថែមថា ចំនួនអ្នកស្លាប់សរុបចាប់តាំងពីជម្លោះរវាងអ៊ីស្រាអែល និងក្រុមហាម៉ាស បានផ្ទុះឡើងនៅថ្ងៃទី៧ ខែតុលា ឆ្នាំ២០២៣មក បានកើនឡើងដល់ ៧៤.៤៧៥នាក់ ខណៈដែលមានមនុស្ស១៧៥.៥១៧នាក់ផ្សេងទៀតបានរងរបួស៕

ដោយ៖ មូល មិនា (ប្រភព៖ ស៊ីនហួ)