AKP ភ្នំពេញ ថ្ងៃទី១៩ ខែតុលា ឆ្នាំ២០២៦ -- ក្រសួងការបរទេសរុស្ស៊ីបានឱ្យដឹងកាលពីថ្ងៃអាទិត្យថា ប្រទេសរុស្ស៊ី និងអារ៉ាប៊ីសាអូឌីត ប្តេជ្ញាពង្រឹងកិច្ចសហប្រតិបត្តិការប្រកបដោយប្រសិទ្ធភាពនៅក្នុងក្របខ័ណ្ឌOPEC+។

រដ្ឋមន្ត្រីការបរទេសរុស្ស៊ី លោក ស៊ែរហ្គេយ ឡាវរ៉ូវ បានជួបពិភាក្សាជាមួយរដ្ឋមន្ត្រីការបរទេសអារ៉ាប៊ីសាអូឌីត លោក ហ្វៃសាល ប៊ីន ហ្វាហាន អាល់ សាអ៊ូដ នៅទីក្រុងម៉ាណាម៉ា ដែលជារដ្ឋធានីនៃប្រទេសបារ៉ែនកាលពីថ្ងៃអាទិត្យ ក្នុងឱកាសនៃកិច្ចសន្ទនាយុទ្ធសាស្ត្រលើកទី៩ រវាងរុស្ស៊ី និងក្រុមប្រឹក្សាសហប្រតិបត្តិការឈូងសមុទ្រ (GCC) ។

សេចក្តីថ្លែងការណ៍បាននិយាយថា «ភាគីទាំងពីរបានបញ្ជាក់ពីសារៈសំខាន់នៃការបន្តកិច្ចសហប្រតិបត្តិការប្រកបដោយប្រសិទ្ធភាពរវាងរុស្ស៊ី និងអារ៉ាប៊ីសាអូឌីត នៅក្នុងក្របខ័ណ្ឌ OPEC+»។ លើសពីនេះ ភាគីទាំងពីរក៏បានបង្ហាញពីការប្តេជ្ញាចិត្តរួមគ្នា ក្នុងការបន្តរក្សាកិច្ចសន្ទនានយោបាយឱ្យបានទៀងទាត់ដោយផ្អែកលើទំនុកចិត្តទៅវិញទៅមក ព្រមទាំងពង្រីកកិច្ចសហប្រតិបត្តិការលើវិស័យពាណិជ្ជកម្ម សេដ្ឋកិច្ច ការវិនិយោគ វប្បធម៌ និងមនុស្សធម៌៕

ដោយ៖ យា ចិន្ដាខន្ដី (ប្រភព៖ ស្ពុតនីក)