AKP កំពង់ធំ ថ្ងៃទី៣​ ខែតុលា ឆ្នាំ២០២៦--លោកស្រី លំ គន្ធារីអភិបាលរងនៃគណៈអភិបាលខេត្តកំពង់ធំនិងជាអនុប្រធានគ​ណៈកម្មាធិការប្រយុទ្ធ​ប្រឆាំងអំពើជួញ​ដូរមនុស្សខេត្ត​ដឹកនាំ​កិច្ច​ប្រជុំ ប្រចាំត្រីមាសទី៣ឆ្នាំ២០២៦ និងលើកទិសដៅបន្ត ការងារប្រយុទ្ធប្រឆាំងអំពើជួញដូរមនុស្ស សាលប្រជុំប្រាសាទយាយព័ន្ឋនៃរដ្ឋបាល​ខេត្តកំពង់ធំកាលពីរសៀលថ្ងៃទី​០២​ខែតុលា​​ឆ្នាំ២០២៦។
លោកស្រី លំ គន្ធារី បានថ្លែងថានៅក្នុងកិច្ចប្រជុំដើម្បីស្តាប់របាយការណ៍រយៈពេល៣ខែ ចាប់ពីខែកក្កដា ដល់ខែកញ្ញា ឆ្នាំ២០២៦ ដើម្បីប្រមូលព័ត៌មានបន្ថែមពីក្រុមការងារទាំង៦និងធាតុចូលសំខាន់ៗ ដើម្បីបូកសរុបជូនគណៈកម្មាធិការជាតិ ក្នុងការអនុវត្តការងារឱ្យមានប្រសិទ្ធភាពនិងស្របតាមយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាលកម្ពុជាក្នុងការពង្រឹងការអនុវត្តតួនាទី ការទប់ស្កាត់បង្ក្រាបបទល្មើសជួញដូរមនុស្សគ្រប់ទម្រង់និងលុបបំបាត់អំពើហិង្សាលើស្ត្រី និងកុមារ។

លោកស្រីអភិបាលរងខេត្តបានបន្តថាក្នុងរយៈពេលកន្លងទៅនេះរាជរដ្ឋាភិបាលបាននឹងកំពុងយកចិត្តទុកដាក់ខ្ពស់ក្នុងការបង្ក្រាបបទ ល្មើសឆបោកតាមប្រព័ន្ធបច្ចេកវិទ្យានិងបទល្មើសពពោះជំនួស រួមទាំងបទល្មើសជួញដូរមនុស្សតាមប្រព័ន្ធឌីជីថលដែលជាបញ្ហាប្រឈមដ៏សំខាន់ដែលត្រូវចូលរួមចាត់វិធានការទប់ស្កាត់ និងត្រូវចាប់ជនល្មើសយកមកផ្តន្ទាទោសឱ្យខានតែបាន។ ឆ្លងកាត់តាមរយៈការខិតខំប្រឹងប្រែងរបស់ស្ថាប័នជំនាញ និងអាជ្ញាធរពាក់ព័ន្ធគ្រប់លំដាប់ថ្នាក់ក្នុងរយៈពេល៣ខែកន្លងមកនេះ ក្រុមការងាររបស់យើងសម្រេចបាននូវលទ្ធផលគួរឱ្យកត់សម្គាល់ក្នុងការចុះផ្សព្វផ្សាយអប់រំដល់គោលដៅប្រឈម ការជួយអន្តរាគមន៍ និងការទប់ស្កាត់ការធ្វើចំណាក ស្រុកដោយខុសច្បាប់។ 
លោកលំ គន្ធារីអភិបាលរងខេត្តនិងជាអនុប្រធានគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តកំពង់ធំបានគូសបញ្ជាក់ថាដើម្បីឆ្លើយតបទៅនឹងបញ្ហាប្រឈមដែលបានលើកឡើងដើម្បីដោះស្រាយរួមគ្នានិងបង្កើនប្រសិទ្ធភាពការងារដោយស្មារតី និងឆន្ទៈក្នុងការអនុវត្តតួនាទីនិងភារកិច្ចដែលបានអនុវត្តជាពិសេសត្រូវធ្វើការអប់រំផ្សព្វផ្សាយដល់ប្រជាពលរដ្ឋនៅតាមមូលដ្ឋានឱ្យបានជ្រាបច្បាស់កុំឱ្យមានការចាញ់បោកជនល្មើសនិងមេខ្យល់ដែលល្បងលោងលោមជនរងគ្រោះ ក្នុងទម្រង់ផ្សេងៗដូចជាការជួយស្វែងរកការងារធ្វើ ការរៀបការជាមួយជនបរទេសជាដើម។

លោកស្រី លំ គន្ធារីសូមថ្លែងអំណរគុណដល់ក្រុមការងារទាំងអស់និងអង្គការដៃគូដែលបានខិតខំអនុវត្តការងារប្រយុទ្ធប្រឆាំងអំពើជួញដូរមនុស្ស ជាមួយរដ្ឋាភិបាលក្នុងការគាំទ្រសកម្មភាពនានាដែល ពាក់ព័ន្ធនឹងអំពើជួញដូរមនុស្ស អំពើហិង្សាលើស្ត្រី និងកុមារកិច្ចអន្តរាគមន៍ជួយជនរងគ្រោះស្ត្រីនិងកុមារដោយការរំលោភបំពានផ្លូវភេទនិងវិធីសាស្ត្រចំណាកស្រុកដោយសុវត្ថិភាព៕
ដោយ៖ ស៊ុម វណ្ណា