AKP ភ្នំពេញ ថ្ងៃទី២៦ ខែកញ្ញា ឆ្នាំ២០២៦ -- សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តស្វាយរៀង បានបើកកិច្ចប្រជុំត្រួតពិនិត្យ និងតាមដានវឌ្ឍនភាពការងាររបស់គណៈកម្មាធិការបក្សស្រុករមាសហែក ដែលបានប្រព្រឹត្តទៅនៅស្នាក់ការគណបក្សស្រុករមាសហែក ខេត្តស្វាយរៀង នាព្រឹកថ្ងៃសៅរ៍ ទី២៦ ខែកញ្ញា ឆ្នាំ២០២៦ ។ 

សម្តេចកិត្តិសង្គហបណ្ឌិត ម៉ែន សំអន បានអរគុណចំពោះសមិទ្ធផលរីកចម្រើនយ៉ាងសន្ធឹកសន្ធាប់លើគ្រប់វិស័យនៅ ក្នុងស្រុករមាសហែក។ កិច្ចខិតខំប្រឹងប្រែងយ៉ាងសស្រាក់សស្រាំរបស់ក្រុមការងារគណបក្ស និងក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀង អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធ ព្រមទាំងសមាជិក សមាជិ កាគណបក្ស និងប្រជាពលរដ្ឋទាំងអស់ ដែលបានរួមសាមគ្គីគ្នាជាកម្លាំងចលករយ៉ាងរឹងមាំ។ កិច្ចខិតខំប្រឹងប្រែងទាំងនេះ បានរួមចំណែកយ៉ាងសំខាន់ក្នុងការថែរក្សាសន្តិសុខ របៀបរៀបរយ សណ្តាប់ធ្នាប់សាធារណៈ និងសុវត្ថិភាពសង្គមបានយ៉ាងល្អប្រសើរ ព្រមទាំងបង្កើនប្រសិទ្ធភាពនៃការផ្តល់សេវាសាធារណៈជូនប្រជាពលរដ្ឋ ប្រកបដោយគុណភាព តម្លាភាព គណនេយ្យភាព និងភាពឆាប់រហ័ស ដែលជាកត្តានាំឱ្យមហាជនកាន់តែមានទំនុកចិត្តយ៉ាងមុតមាំលើការដឹកនាំរបស់គណបក្សប្រជាជនកម្ពុជា។

សម្តេចកិត្តិសង្គហបណ្ឌិត ម៉ែន សំអន បានផ្តល់ការណែនាំដល់គណៈកម្មាធិការបក្សមូលដ្ឋានទាំងអស់ ត្រូវបន្តយកចិត្តទុកដាក់អនុវត្តឱ្យបានជោគជ័យនូវ ផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ដែលបានដាក់ចេញដោយគណៈអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា។ ការធ្វើបែបនេះ គឺដើម្បីធានាបាននូវការរក្សាប្រៀបខ្លាំង និងបង្កើនប្រៀបឈ្នះរបស់គណបក្ស នៅក្នុងគ្រប់ការបោះឆ្នោតនាពេលខាងមុខ។ បន្ថែមពីនេះ សម្តេចបានរំលឹកឱ្យគ្រប់សមាសភាពពាក់ព័ន្ធទាំងអស់ ត្រូវតែគោរព និងអនុវត្តតាមច្បាប់ បទបញ្ជា និងលិខិតបទដ្ឋានយុត្តិធម៌នានា ដែលដាក់ចេញដោយគណៈកម្មាធិការជាតិរៀបចំការបោះឆ្នោត (គ.ជ.ប) ឱ្យបានម៉ឺងម៉ាត់ និងត្រឹមត្រូវបំផុត ៕ 

ដោយ សួស សំរិត