AKP បាត់ដំបងថ្ងៃទី២៦ ខែកញ្ញា ឆ្នាំ ២០២៦ – ឯកឧត្តម សុខ លូ អភិបាលខេត្តបាត់ដំបង បានណែនាំដល់អាជ្ញាធរក្រុង ស្រុក និងកងកម្លាំងត្រូវត្រៀមកម្លាំង និងមធ្យោបាយសង្គ្រោះ ដើម្បីចុះអន្តរាគមន៍ជួយសង្គ្រោះប្រជាពលរដ្ឋឱ្យបានទាន់ពេលវេលាក្នុងករណីមានគ្រោះអាសន្ន ឬស្ថានភាពទឹកជំនន់បន្តវិវត្តកាន់តែធ្ងន់ធ្ងរឡើងជាយថាហេតុ ។

ឯកឧត្តម មានប្រសាសន៍ដូចនេះ នៅថ្ងៃទី២៦ ខែកញ្ញា ឆ្នាំ២០២៦ ពេលដឹកនាំមន្រ្តីជំនាញចុះពិនិត្យស្ថានភាពនៅទំនប់ពហុបំណងបាត់ដំបង (សេកសក) នៅស្រុករតនមណ្ឌល ទំនប់កង្ហតនៅស្រុកបាណន់ និងតំបន់រងគ្រោះដោយជំនន់ទឹកភ្លៀងនៅក្នុងមូលដ្ឋានស្រុកបាណន់ ។ 

ក្នុងឱកាសនោះ ឯកឧត្តម បញ្ជាក់ឱ្យដឹងថា ទំនប់ពហុបំណងសេកសក (បាត់ដំបង) មានរយ:កម្ពស់៥៧,៨០ម៉ែត្រ ប៉ុន្តែការរំដោះទឹកនៅធានាបានសុវត្ថិភាពទាំងស្រុង។ចំពោះស្ថានភាពទឹកហូរពីទំនប់កង្ហតទៅសាលាតាអនកាត់តាមក្រុងបាត់ដំបងមិនទាន់មានសញ្ញាថមថយទេ ខណៈក្រុងបាត់ដំបងអាចបន្តលិចលង់តាមបណ្តាសង្កាត់នានាបន្ថែមទៀត។អាជ្ញាធរមូលដ្ឋានត្រូវជូនដំណឹងពីស្ថានភាពវិវត្តនៃកម្ពស់ទឹក និងខ្សែផ្លូវដែលត្រូវបានផ្អាកចរាចរណ៍ដើម្បីបញ្ចៀសគ្រោះថ្នាក់ និងធានាសុវត្ថិភាពជូនប្រជាពលរដ្ឋ។

ឯកឧត្តម សុខ លូ អំពាវនាវដល់បងប្អូនប្រជាពលរដ្ឋដែលរស់នៅតាមដងស្ទឹងសង្កែ និងតំបន់ដែលលិចទឹកមេត្តាប្រុងប្រយ័ត្នចំពោះសុវត្ថិភាពមនុស្សចាស់ និងកុមារតូចៗ ៕

ដោយ៖ ណយ នឿន (ប្រភព៖រដ្ឋបាលខេត្តបាត់ដំបង)