AKP តាកែវ ថ្ងៃទី២៥ ខែកញ្ញា ឆ្នាំ២០២៦-- លោក យង់ សុវឌ្ឍនា អភិបាលរង និងជាប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តតាកែវបានលើកឡើងថា គណៈគ្រប់គ្រងសាលាគឺជាមេបញ្ជាការដែលត្រូវគ្រប់គ្រង និងបង្ការទប់ស្កាត់បញ្ហាគ្រឿងញៀន ដើម្បីថែទាំសុខភាពយុវជន ដែលជាធនធានមនុស្សពោរពេញឱ្យមានសុខភាពល្អ ប្រែក្លាយទៅជាមូលធនមនុស្សប្រកបដោយសក្តានុពលសម្រាប់ជួយអភិវឌ្ឍន៍ប្រទេសជាតិ ឱ្យទទួលបានការរីកចម្រើនកាន់តែឆាប់រហ័ស។ ការលើកឡើងបែបនេះក្នុងឱកាសអញ្ជើញជាអធិបតីពិធីបើកសិក្ខាសាលាលើកកម្ពស់ចំណេះដឹងពីបញ្ហាគ្រឿងញៀន និង App NoDrug ដល់គណៈគ្រប់គ្រងកម្រិតមធ្យមសិក្សាក្នុងវិស័យអប់រំទូទាំងខេត្តតាកែវ នាព្រឹកថ្ងៃទី២៥ ខែកញ្ញា ឆ្នាំ ២០២៦។

លោក យង់ សុវឌ្ឍនា បានមានប្រសាសន៍សំណូមពរទៅដល់គណៈគ្រប់គ្រងសាលាទាំងអស់ឱ្យជួយផ្សព្វផ្សាយបន្តនូវចំណេះដឹងពាក់ព័ន្ធនឹងបញ្ហាគ្រឿងញៀនក៏ដូចជាអត្ថប្រយោជន៍App NoDrug ឱ្យបានកាន់តែទូលំទូលាយ ដើម្បីបង្ការទប់ស្កាត់និងកាត់ផ្ដាច់ឬសគល់នៃបញ្ហាគ្រឿងញៀននៅក្នុងសហគមន៍។

ក្នុងឱកាសនោះ ឯកឧត្ដម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន បានពាំនាំប្រសាសន៍ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រីប្រធានអាជ្ញាធរជាតិប្រយុទ្ធប្រឆាំងគ្រឿងញៀនថ្លែងនូវការកោតសរសើរ អរគុណដល់គ្រប់សមាសភាពទាំងអស់នៅខេត្តតាកែវ ដែលបានចូលរួមក្នុងសកម្មភាពប្រយុទ្ធប្រឆាំងគ្រឿងញៀនជារួម និយាយដោយឡែកក្នុងវិស័យអប់រំដែលជាគោលដៅមួយសំខាន់ចាំបាច់ណាស់ សម្រាប់គ្រប់ក្រុមគ្រួសារគឺត្រូវតែមានសមាជិកទៅទទួលការសិក្សានៅក្នុងវិស័យនេះ។ ឯកឧត្ដមឧត្ដមសេនីយឯកបន្ដថា ដូចនេះ សូមលោកគ្រូ អ្នកគ្រូ ជួយបញ្ជ្រាបការយល់ដឹងតាមរយៈសិស្សឱ្យពាំនាំព័ត៌មានពិតពាក់ព័ន្ធនឹងបញ្ហាគ្រឿងញៀន និងអត្ថប្រយោជន៍កម្មវិធីទូរសព្ទ NoDrug ពីសាលាចូលទៅក្រុមគ្រួសារ និងសហគមន៍។

បើតាមរបាយការណ៍របស់លោក ញឹម យុទ្ធា អនុប្រធានមន្ទីរ អប់រំ យុវជនកីឡាខេត្តតាកែវ បានបញ្ជាក់ថា គ្រឹះស្ថានសិក្សាទាំងរដ្ឋនិងឯកជនទូទាំងខេត្តតាកែវមានសរុបចំនួនជាង៥០០គ្រឹះស្ថាន ដែលមានអ្នកសិក្សាសរុបចំនួនជាង២២ម៉ឺន នាក់ ហើយគណៈគ្រប់គ្រងសាលាទាំងអស់បានយកចិត្តទុកដាក់ក្នុងការបង្ការ ទប់ស្កាត់បញ្ហាគ្រឿងញៀននៅក្នុងគ្រឹះស្ថានសិក្សា៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន