AKP សៀមរាប ថ្ងៃទី១៥ ខែកញ្ញា ឆ្នាំ២០២៦--ដើម្បីជួយជំរុញចរន្តសេដ្ឋកិច្ច និងលើកកម្ពស់ទេសចរណ៍កម្ពុជាលើ ឆាកអន្តរជាតិ ព្រឹត្តិការណ៍ជិះកង់កម្សាន្ត និងផ្សងព្រេងក្នុងព្រៃតំបន់អង្គរ នឹងត្រូវរៀបចំឡើងនាព្រឹកថ្ងៃទី២០ ខែកញ្ញា ឆ្នាំ២០២៦ ខាងមុខនេះ ក្រោមប្រធានបទ «កីឡាផ្សារភ្ជាប់នឹងទេសចរណ៍»។

​ការរៀបចំព្រឹត្តិការណ៍នេះ ធ្វើឡើងស្របពេលដែលបាតុភូតធម្មជាតិដ៏អច្ឆរិយ «សមរាត្រី» (ថ្ងៃរះចំកណ្ដាលកំពូលប្រាសាទអង្គរវត្ត) ត្រូវបានព្យាករថានឹងកើតឡើងចាប់ពីថ្ងៃទី២១ ដល់ថ្ងៃទី២៣ ខែកញ្ញា ឆ្នាំ២០២៦។ នេះបើតាមការលើកឡើងរបស់ ឯកឧត្តម វ៉ាន់ហេង ដាវុធ រដ្ឋលេខាធិការក្រសួងទេសចរណ៍ ក្នុងកិច្ចប្រជុំត្រៀមរៀបចំកាលពីរសៀលថ្ងៃទី១៤ ខែកញ្ញា ។

ឯកឧត្តមបានបន្តថា ​អ្នកចូលរួមក្នុងព្រឹត្តិការណ៍នេះ នឹងទទួលបានបទពិសោធន៍ប្លែកអារម្មណ៍តាមរយៈ៖​ការជិះកង់កាត់ព្រៃធម្មជាតិ,ឆ្លងកាត់កំពែងប្រាសាទបុរាណ និងទស្សនាប្រាសាទលាក់ខ្លួនក្នុងព្រៃ,​ការទស្សនាសម្រស់រដូវបៃតងគយគន់ធម្មជាតិដ៏ស្រស់បំព្រងក្នុងខេត្តសៀមរាប,​ការផ្ដិតរូបភាព សមរាត្រី នភប្រាសាទអង្គរវត្ត។

​លោក ង៉ូវ សេងកាក់ អភិបាលរងខេត្តសៀមរាប បានគូសបញ្ជាក់ថា ព្រឹត្តិការណ៍នេះមានសារៈសំខាន់ខ្លាំងណាស់ក្នុងការផ្សព្វផ្សាយសក្ដានុពលទេសចរណ៍។ ដើម្បីធានាឱ្យកម្មវិធីប្រព្រឹត្តទៅដោយរលូន អាជ្ញាធរខេត្តបានណែនាំដល់កងកម្លាំងទាំង៣ប្រភេទ និងមន្ទីរ-អង្គភាពពាក់ព័ន្ធ ឱ្យសហការគ្នាយ៉ាងម៉ឺងម៉ាត់លើការងារសន្តិសុខ និងសម្រួលចរាចរណ៍តាមតម្រាយផ្លូវជិះកង់ ដើម្បីកាត់បន្ថយការកកស្ទះ និងបង្កើតអនុស្សាវរីយ៍ដ៏ល្អប្រសើរជូនដល់ភ្ញៀវទេសចរជាតិ និងអន្តរជាតិ៕

ដោយ៖ ឃុត សៅ