AKP បន្ទាយមានជ័យ ថ្ងៃទី១៤ ខែកញ្ញា ឆ្នាំ២០២៦–

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាល ចុះពិនិត្យវឌ្ឍនភាពកសិដ្ឋានសហគមន៍កសិកម្មទំនើបបុរីបីពាន់ខ្នង ជំរុញការបង្កើតមុខរបរជូនប្រជាពលរដ្ឋភៀសសឹក។

ការចុះពិនិត្យនេះ រៀបចំឡើងក្នុងគោលបំណងបង្កើតការងារ និងមុខរបរ ព្រមទាំងលើកកម្ពស់ជីវភាពរស់នៅរបស់បងប្អូនប្រជាពលរដ្ឋដែលកំពុងភៀសសឹកពីសង្គ្រាមឈ្លានពានរបស់ភាគីថៃមកលើកដែនអធិបតេយ្យភាពកម្ពុជាដែលកំពុងរស់នៅបណ្តោះអាសន្នក្នុងភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ កាលពីថ្ងៃអាទិត្យ ទី១៣ ខែកញ្ញា ឆ្នាំ២០២៦នេះ។

ការចុះពិនិត្យនេះ បង្ហាញឱ្យឃើញពីការយកចិត្តទុកដាក់របស់ក្រុមការងាររាជរដ្ឋាភិបាល និងក្រសួងកសិកម្ម ក្នុងការស្វែងរកដំណោះស្រាយជាក់ស្តែងសម្រាប់ប្រជាពលរដ្ឋដែលរងផលប៉ះពាល់ និងត្រូវផ្លាស់ទីមករស់នៅក្នុងតំបន់សុវត្ថិភាព ដោយមិនត្រឹមតែផ្តល់ជំនួយសង្គ្រោះបន្ទាន់ប៉ុណ្ណោះទេ ប៉ុន្តែថែមទាំងរៀបចំឱ្យមានមូលដ្ឋានសម្រាប់ការរស់នៅ និងប្រកបមុខរបរបានប្រកបដោយចីរភាព។

កសិដ្ឋានសហគមន៍កសិកម្មទំនើបបុរីបីពាន់ខ្នង ត្រូវបានរៀបចំឡើងក្នុងចក្ខុវិស័យផ្តល់ឱកាសឱ្យប្រជាពលរដ្ឋភៀសសឹក អាចចូលរួមក្នុងសកម្មភាពផលិតកម្មកសិកម្ម និងបង្កើតប្រាក់ចំណូលសម្រាប់គ្រួសារ។ ការរៀបចំហេដ្ឋារចនាសម្ព័ន្ធ និងមូលដ្ឋានផលិតកម្មនេះ ក៏ជាផ្នែកមួយនៃការត្រៀមលក្ខខណ្ឌឱ្យប្រជាពលរដ្ឋអាចផ្លាស់ប្តូរពីការរស់នៅដោយពឹងផ្អែកលើជំនួយសង្គ្រោះបន្ទាន់ ទៅរកការរស់នៅដោយមានមុខរបរ និងប្រាក់ចំណូលផ្ទាល់ខ្លួន។

ក្នុងឱកាសចុះពិនិត្យ ឯកឧត្តម ឌិត ទីណា បានយកចិត្តទុកដាក់ពិនិត្យលើវឌ្ឍនភាពការងារហេដ្ឋារចនាសម្ព័ន្ធ ព្រមទាំងស្ថានភាពជាក់ស្តែងនៅទីតាំង ដើម្បីធានាថា ការរៀបចំកសិដ្ឋានសហគមន៍នេះ អាចឆ្លើយតបបានទៅនឹងតម្រូវការរបស់ប្រជាពលរដ្ឋ និងអាចប្រើប្រាស់ជាមូលដ្ឋានសម្រាប់ការផលិតកសិកម្មនៅពេលខាងមុខ។

ជាមួយគ្នានេះ ការអភិវឌ្ឍកសិដ្ឋានសហគមន៍កសិកម្មទំនើប ក៏មានសារៈសំខាន់ក្នុងការបង្កើតប្រព័ន្ធផលិតកម្មដែលមានការរៀបចំច្បាស់លាស់ ពីការផលិត ការគ្រប់គ្រងធនធាន ការប្រើប្រាស់បច្ចេកទេសកសិកម្ម រហូតដល់ការស្វែងរកទីផ្សារ។ វាអាចជួយឱ្យកសិករមានលទ្ធភាពផលិតបានកាន់តែមានប្រសិទ្ធភាព កាត់បន្ថយហានិភ័យ និងបង្កើនឱកាសទទួលបានប្រាក់ចំណូលប្រកបដោយស្ថិរភាព។

ជាពិសេស សម្រាប់ប្រជាពលរដ្ឋដែលកំពុងរស់នៅក្នុង ភូមិរង់ចាំ ការមានទីតាំងប្រកបមុខរបរ និងផលិតកម្មនៅក្បែរតំបន់រស់នៅ អាចក្លាយជាកត្តាសំខាន់មួយក្នុងការផ្តល់ក្តីសង្ឃឹម និងភាពជឿជាក់ថា ជីវភាពរបស់ពួកគេអាចត្រូវបានស្តារឡើងវិញតាមរយៈការងារ និងសមត្ថភាពផលិតដោយខ្លួនឯង។

កិច្ចខិតខំប្រឹងប្រែងនេះ ក៏ឆ្លុះបញ្ចាំងពីទស្សនៈដែលផ្តល់អាទិភាពដល់ការជួយប្រជាពលរដ្ឋឱ្យមាន “មុខរបរ និងចំណូល” ជាមួយនឹងការផ្តល់ជំនួយចាំបាច់ក្នុងដំណាក់កាលលំបាក។ ការបង្កើតសហគមន៍កសិកម្មទំនើប ដូច្នេះ មិនមែនគ្រាន់តែជាការរៀបចំទីតាំងផលិតកម្មកសិកម្មមួយកន្លែងនោះទេ ប៉ុន្តែជាការរៀបចំមូលដ្ឋានសម្រាប់ស្តារជីវភាព និងបង្កើនភាពធន់របស់ប្រជាពលរដ្ឋក្នុងរយៈពេលវែង។

ការចុះពិនិត្យរបស់ឯកឧត្តម ឌិត ទីណា និងក្រុមការងារ នៅពេលនេះ ក៏បានបង្ហាញពីការបន្តចុះមូលដ្ឋាន និងតាមដានការងារដោយផ្ទាល់ ដើម្បីឱ្យគម្រោងដែលពាក់ព័ន្ធនឹងជីវភាពប្រជាពលរដ្ឋ អាចដំណើរការទៅមុខប្រកបដោយប្រសិទ្ធភាព និងឆ្លើយតបនឹងស្ថានភាពជាក់ស្តែងនៅមូលដ្ឋាន។

ពីទីតាំងភៀសសឹកទៅកាន់ទីតាំងផលិតកម្ម ការរៀបចំកសិដ្ឋានសហគមន៍កសិកម្មទំនើបបុរីបីពាន់ខ្នង កំពុងបង្ហាញពីជំហានមួយដែលផ្តោតលើការផ្តល់ឱកាសឱ្យប្រជាពលរដ្ឋអាចឈរជើងដោយខ្លួនឯង តាមរយៈការងារ មុខរបរ និងការផលិតកសិកម្ម។ នេះជាការបន្តកសាងមូលដ្ឋានជីវភាពថ្មី ស្របតាមស្មារតីយកប្រជាពលរដ្ឋជាស្នូល និងធានាថា ការស្តារជីវភាពត្រូវដើរទន្ទឹមគ្នាជាមួយការផ្តល់សន្តិសុខ និងសុវត្ថិភាពដល់ប្រជាពលរដ្ឋ៕

ដោយ៖ ឈុន សារ៉ាត