AKP ភ្នំពេញ ថ្ងៃទី១០ ខែកញ្ញា ឆ្នាំ២០២៦-- ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នារសៀលថ្ងៃទី១០ ខែកញ្ញា ឆ្នាំ២០២៦ បានអញ្ជើញចូលរួមកិច្ចប្រជុំក្រៅផ្លូវការរវាងរដ្ឋមន្ត្រីសុខាភិបាលអាស៊ាន និងតំណាងអង្គការសុខភាពពិភពលោកប្រចាំតំបន់អាស៊ីអាគ្នេយ៍ (SEARO) និងតំបន់ប៉ាស៊ីហ្វិកខាងលិច (WPRO) ក្រោមប្រធានបទ «អាស៊ានមានសុខភាពល្អ៖ រួមគ្នាឆ្ពោះទៅរកប្រព័ន្ធសុខាភិបាលប្រកបដោយសមធម៌ និងត្រៀមខ្លួនជាស្រេចសម្រាប់អនាគត» (Healthy ASEAN: Together Towards Equitable, Future-Ready Health Systems) នៅទីក្រុងគូឡាឡាំពួ ប្រទេសម៉ាឡេស៊ី។ កិច្ចប្រជុំនេះត្រូវបានសម្របសម្រួលដឹកនាំដោយរដ្ឋមន្ត្រីក្រសួងសុខាភិបាលម៉ាឡេស៊ី ប្រធានកិច្ចប្រជុំរដ្ឋមន្ត្រីសុខាភិបាលអាស៊ានលើកទី១៧ ដោយមានការចូលរួមពីរដ្ឋមន្ត្រីសុខាភិបាលនៃប្រទេសសមាជិកអាស៊ាន និងតំណាងនាយកតំបន់ WHO SEARO និង WPRO។

ឯកឧត្តមសាស្ត្រាចារ្យរដ្ឋមន្ត្រីបានថ្លែងបទអន្តរាគមន៍លើប្រធានបទ «ការបង្កើតកម្លាំងសរុប៖ ការកំណត់អាទិភាពរួមប្រចាំតំបន់ ដើម្បីលើកកម្ពស់ប្រព័ន្ធសុខាភិបាល » (Creating Synergies: Setting shared regional priorities to further enhance health systems) ដោយបានទាញការយកចិត្តទុកដាក់លើអាទិភាពគន្លឹះចំនួន ៣ ដើម្បីពង្រឹងកិច្ចសហប្រតិបត្តិការរវាងអាស៊ាន និងអង្គការសុខភាពពិភពលោក (WHO)៖ ១. ចំពោះជំងឺមិនឆ្លង៖ បន្តពង្រឹងសមិទ្ធផលក្នុងការគ្របដណ្តប់សុខភាពសកល និងការឆ្លើយតបគ្រោះអាសន្ន យកចិត្តទុកដាក់ការប្រយុទ្ធនឹងជំងឺមិនឆ្លង ផ្លាស់ប្តូរបទពិសោធន៍ក្នុងការការពារ និងអន្តរាគមន៍តាំងពីដំណាក់កាលដំបូង។ ២. បង្កើនប្រសិទ្ធភាពយន្តការដែលមានស្រាប់ ពុំចាំបាច់បង្កើតយន្តការថ្មី បំប្លែងកិច្ចសហប្រតិបត្តិការទៅជាគោលដៅជាក់ស្តែង អាចវាស់វែងបាន និងកៀរគរហិរញ្ញប្បទាន ប្រកបដោយចីរភាព។ ៣. ភ្ជាប់អន្តរវិស័យ និងក្របខណ្ឌអាស៊ាន-អង្គការសហប្រជាជាតិ: ពង្រឹងរចនាសម្ព័ន្ធសុខាភិបាលតំបន់ (ផែនការសកម្មភាពតំបន់សម្រាប់សន្តិសុខសុខភាព) និងបង្កើនកិច្ចសហប្រតិបត្តិការឆ្លងវិស័យ (បរិស្ថាន, មហន្តរាយ, កិច្ចគាំពារសង្គម) ដោយប្រើប្រាស់វិធីសាស្ត្រ «សុខភាពតែមួយ» (One Health)។

ជាមួយគ្នានេះដែរ ឯកឧត្តមសាស្ត្រាចារ្យរដ្ឋមន្ត្រី បានគូសរំលេចថា អាស៊ាន និង WHO ត្រូវខិតខំធ្វើការប្រទាក់ក្រឡាបន្ថែមលើអាទិភាពសុខភាព ដោយបំប្លែងការប្តេជ្ញាចិត្តទៅជាសកម្មភាពដែលអាចវាស់វែងបាន ដែលនឹងអាចកសាងប្រព័ន្ធសុខាភិបាល រឹងមាំ មានភាពធន់ សមធម៌ និងត្រៀមខ្លួនជាស្រេចសម្រាប់អនាគត៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)