AKP ភ្នំពេញ ថ្ងៃ១០ ខែកញ្ញា ឆ្នាំ២០២៦ -- ទីផ្សារមូលបត្រកម្ពុជា (CSX) បានរៀបចំ «ពិធីចុះបញ្ជីលក់សញ្ញាបណ្ណចីរភាពជាផ្លូវការរបស់គ្រឹះស្ថានមីក្រូហិរញ្ញវត្ថុ អិលអូអិលស៊ី (ខេមបូឌា) ភីអិលស៊ី» នាព្រឹកថ្ងៃទី១០ ខែកញ្ញា ឆ្នាំ២០២៦ នេះ ក្រោមអធិបតីភាព ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាល CSX ដោយមានការចូលរួមពីតំណាងស្ថាប័នរដ្ឋ និងវិស័យឯកជនយ៉ាងច្រើនរូប។
ការបោះផ្សាយ និងចុះបញ្ជីលក់សញ្ញាបណ្ណចីរភាពមានបុគ្គលធានារបស់គ្រឹះស្ថានមីក្រូហិរញ្ញវត្ថុ LOLC នេះ មានទំហំទឹកប្រាក់សរុប ២០លានដុល្លារអាម៉េរិក អត្រាការប្រាក់ ៥,៧៥% សម្រាប់រយៈពេល ៥ឆ្នាំ។ នេះជាលើកទី២ ហើយ ដែល LOLC បានកៀរគរទុនពីទីផ្សារមូលបត្រកម្ពុជា (លើកទី១ ក្នុងឆ្នាំ២០១៩ ទំហំ ២០លានដុល្លារអាម៉េរិក) ដែលនាំឱ្យទុនសរុបដែលកៀរគរបានពី CSX កើនដល់ ៤០លានដុល្លារអាម៉េរិក។

ឯកឧត្តមបណ្ឌិតសភាចារ្យ ហ៊ាន សាហ៊ីប បានគូសរំលេចថា ការចូលរួមក្នុងផ្សារមូលបត្របានស្តែងឱ្យឃើញពី ១.តម្លាភាព និងអភិបាលកិច្ច៖ បញ្ជាក់ពីអនុលោមភាពផ្លូវច្បាប់ ស្តង់ដារបាយការណ៍ហិរញ្ញវត្ថុ និងស្ថិរភាពប្រតិបត្តិការ។ ២.ទំនុកចិត្តពីវិនិយោគិន៖ ទទួលបានការគាំទ្រយ៉ាងច្រើនពីវិនិយោគិនជាតិ និងអន្តរជាតិ។ ៣.ការរួមចំណែកអភិវឌ្ឍន៍ទីផ្សារមូលធន៖ បង្កើតជម្រើសវិនិយោគចម្រុះ និងមានសុវត្ថិភាព។
ពាក់ព័ន្ធនឹងការធានាទុន ឯកឧត្តម ស៊ូ សុជាតិ អគ្គនាយកនៃនិយ័តករមូលបត្រកម្ពុជា បានបញ្ជាក់ថា សមិទ្ធផលនេះកើតចេញពីការចូលរួមរបស់សាជីវកម្មធានាឥណទានកម្ពុជា (CGCC) ដែលធ្វើជាបុគ្គលធានាមូលបត្របំណុល ដើរតួនាទីជា «ខែលការពារហានិភ័យ» និងលើកកម្ពស់កម្រិតឥណទានទីផ្សារ (Market Credit)។

ទន្ទឹមនឹងនេះដែរ ឯកឧត្តម ហុង សុហួរ អគ្គនាយក CSX បានជម្រាបជូនថា គិតត្រឹមពេលនេះ CSX មានក្រុមហ៊ុនចុះបញ្ជីសរុប ២៨ក្រុមហ៊ុន (មូលបត្រកម្មសិទ្ធិ១២ និងសញ្ញាបណ្ណសាជីវកម្ម១៦) ដោយកៀរគរទុនសរុបបានប្រមាណ ៧២០លានដុល្លារអាម៉េរិក។ សម្រាប់សកម្មភាពជួញដូរ គិតត្រឹម ៨ខែ ក្នុងឆ្នាំ២០២៦ បរិមាណជួញដូរភាគហ៊ុនប្រចាំថ្ងៃជាមធ្យមមានជាង ២៣ម៉ឺនភាគហ៊ុន (កើនឡើងជិត ១៥០% ធៀបនឹងឆ្នាំ២០២៥) ក្នុងទំហំជួញដូរមធ្យម ៣០ម៉ឺនដុល្លារអាម៉េរិកក្នុងមួយថ្ងៃ។ តួយ៉ាង នៅក្នុងខែសីហា ឆ្នាំ២០២៦៖ ការជួញដូរកើនឡើងគំហុកដល់ជាង ៥៨ម៉ឺនភាគហ៊ុនក្នុងមួយថ្ងៃ (ទំហំជួញដូរប្រមាណ ៨០ម៉ឺនដុល្លារអាម៉េរិក្នុងមួយថ្ងៃ) ហើយចំនួនគណនីជួញដូរកើនដល់ប្រមាណ ៨២.០០០គណនី។
ជាមួយគ្នានេះ ឯកឧត្តមបណ្ឌិតសភាចារ្យ ហ៊ាន សាហ៊ីប បានលើកទឹកចិត្តដល់សហគ្រិន និងវិស័យឯកជន ឱ្យខិតខំទាញយកអត្ថប្រយោជន៍អតិបរមាពីការកៀរគរទុនតាមរយៈ CSX ដើម្បីពង្រីកខ្សែច្រវាក់ផលិតកម្ម បង្កើនសមត្ថភាពប្រកួតប្រជែង និងកាត់បន្ថយការពឹងផ្អែកលើការនាំចូល។

ដោយឡែក លោក សុខ វឿន ប្រធាននាយកប្រតិបត្តិនៃក្រុមហ៊ុន LOLC បានមានប្រសាសន៍បន្ថែមថា មូលបត្របំណុលចីរភាពនេះ ត្រូវបានរៀបចំឡើងក្នុងគោលបំណងប្រមូលមូលនិធិរយៈពេលវែងសម្រាប់គាំទ្រគម្រោង និងសកម្មភាពដែលផ្តល់ប្រយោជន៍ជាក់ស្តែងដល់បរិស្ថាន និងសង្គម។ ការបោះផ្សាយនេះ បង្ហាញពីការប្តេជ្ញាចិត្តរបស់ LOLC ក្នុងការធ្វើអាជីវកម្មប្រកបដោយការទទួលខុសត្រូវ ស្របតាមគោលការណ៍បរិស្ថាន សង្គម និងអភិបាលកិច្ច (ESG) ព្រមទាំងចូលរួមគាំទ្រគោលដៅអភិវឌ្ឍន៍ប្រកបដោយចីរភាពរបស់រាជរដ្ឋាភិបាល។ លោកបានបញ្ជាក់ថា មូលនិធិដែលទទួលបានពីការបោះផ្សាយនេះ នឹងត្រូវយកទៅប្រើប្រាស់សម្រាប់ការផ្តល់ហិរញ្ញប្បទានដល់គម្រោងគាំទ្រផ្នែកបរិស្ថានប្រមាណ ២០% និងផ្នែកសង្គមប្រមាណ ៨០%៕
ដោយ៖ ទូច វលក្ខ័ណ