AKP ភ្នំពេញ ថ្ងៃទី២៩ ខែសីហា ឆ្នាំ២០២៦ -- គណៈប្រតិភូអ្នកសារព័ត៌មានកម្ពុជា ដឹកនាំដោយ លោក ជ្រីម ឆេងលីម អគ្គលេខាធិការរង នៃអគ្គលេខាធិការដ្ឋានក្រសួងព័ត៌មាន និងជាប្រធានគណៈប្រតិភូ ព្រមទាំងមានការចូលរួមពីមន្ត្រីជំនាញ និងផលិតករព័ត៌មានមកពីអគ្គនាយកដ្ឋានព័ត៌មាន និងសោតទស្សន៍ អគ្គនាយកដ្ឋានវិទ្យុជាតិកម្ពុជា អគ្គនាយកដ្ឋានទូរទស្សន៍ជាតិកម្ពុជា អគ្គនាយកដ្ឋានទីភ្នាក់ងារសារព័ត៌មានកម្ពុជា (AKP) និងលេខាធិការដ្ឋាន ស.ស.អ បានបញ្ចប់បេសកកម្ម និងទស្សនកិច្ចសិក្សារយៈពេល ៦ ថ្ងៃ (ចាប់ពីថ្ងៃទី២៣ ដល់ថ្ងៃទី២៨ ខែសីហា ឆ្នាំ២០២៦) នៅសាធារណរដ្ឋសង្គមនិយមវៀតណាម ដោយជោគជ័យ។

ដំណើរទស្សនកិច្ចសិក្សានេះ ត្រូវបានរៀបចំឡើង ក្នុងក្របខ័ណ្ឌនៃការអនុវត្ត «ផែនការ សហប្រតិបត្តិការលើវិស័យព័ត៌មាន ឆ្នាំ២០២៦-២០៣០» ដែលបានចុះហត្ថលេខាដោយ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានកម្ពុជា និងលោកជំទាវ Lam Thi Phuong Thanh រដ្ឋមន្ត្រីក្រសួងវប្បធម៌ កីឡា និងទេសចរណ៍វៀតណាម។ កម្មវិធីនេះមានគោលបំណងសំខាន់ក្នុងការលើកកម្ពស់សមត្ថភាពវិជ្ជាជីវៈសារព័ត៌មាន ស្វែងយល់ពីខ្សែច្រវាក់ផលិតកម្មព័ត៌មានទំនើប ការធ្វើបរិវត្តកម្មឌីជីថល (Digital Transformation) ព្រមទាំងការផ្លាស់ប្តូរបទពិសោធន៍លើការគ្រប់គ្រងព័ត៌មាន និងការទប់ស្កាត់ព័ត៌មានក្លែងក្លាយ (Fake News) ដើម្បីរឹតចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ កម្ពុជា-វៀតណាម ឱ្យកាន់តែរឹងមាំបន្ថែមទៀត។

ក្នុងស្មារតីនៃការអនុវត្តផែនការសហប្រតិបត្តិការនេះ ឯកឧត្តមរដ្ឋមន្ត្រី បានយកចិត្តទុកដាក់ខ្ពស់លើការរៀបចំ និងចាត់បញ្ជូនមន្ត្រីជំនាញជួរមុខមកពីគ្រប់ផ្នែកពាក់ព័ន្ធ ដើម្បីសិក្សាដកស្រង់បទពិសោធន៍ បច្ចេកវិទ្យាទំនើបៗ និងការពង្រឹងកិច្ចសហប្រតិបត្តិការប្រព័ន្ធផ្សព្វផ្សាយរវាងប្រទេសទាំងពីរ ឱ្យកាន់តែជិតស្និទ្ធ និងមានប្រសិទ្ធភាពខ្ពស់។ 

ក្នុងអំឡុងពេលនៃការបំពេញបេសកកម្មនៅរដ្ឋធានីហាណូយ និងខេត្តក្វាងនីញ (Quang Ninh) គណៈប្រតិភូកម្ពុជាបានចូលរួមជំនួបពិភាក្សាការងារ និងផ្លាស់ប្តូរបទពិសោធន៍ផ្ទាល់ជាមួយស្ថាប័នព័ត៌មានធំៗរបស់វៀតណាម រួមមាន៖ វិទ្យុសម្លេងវៀតណាម (VOV) និងទូរទស្សន៍ជាតិវៀតណាម (VTV)៖ បានពិភាក្សាលើការផលិតមាតិកាបែបទំនើប និងការប្រើប្រាស់បច្ចេកវិទ្យាឌីជីថលក្នុងការផ្សព្វផ្សាយ។ទីភ្នាក់ងារសារព័ត៌មានវៀតណាម (VNA)៖ បានផ្លាស់ប្តូរបទពិសោធន៍លើការគ្រប់គ្រងព័ត៌មាន បច្ចេកទេសបោះពុម្ពផ្សាយ និងយន្តការឆ្លើយតបចំពោះព័ត៌មានក្លែងក្លាយ។

មន្ទីរវប្បធម៌ កីឡា និងទេសចរណ៍ ខេត្តក្វាងនីញ ព្រមទាំងកាសែត និងវិទ្យុ-ទូរទស្សន៍ខេត្តក្វាងនីញ៖ បានស្វែងយល់ពីយុទ្ធសាស្ត្រផ្សព្វផ្សាយព័ត៌មានទេសចរណ៍ តំបន់ និងការគ្រប់គ្រងប្រព័ន្ធផ្សព្វផ្សាយថ្នាក់មូលដ្ឋាន។

បន្ថែមពីលើកិច្ចប្រជុំផ្លូវការ គណៈប្រតិភូកម្ពុជាក៏បានចូលរួមកម្មវិធីពិសាអាហារស្វាគមន៍ រៀបចំដោយភាគីអាជ្ញាធរផ្សព្វផ្សាយនៃប្រទេសវៀតណាម ព្រមទាំងបានធ្វើទស្សនកិច្ចឈ្វេងយល់ពីវប្បធម៌ និងតំបន់ប្រវត្តិសាស្ត្រសំខាន់ៗក្នុងរដ្ឋធានីហាណូយ និងខេត្តក្វាងនីញផងដែរ។

ចំណេះដឹង និងបទពិសោធន៍ថ្មីៗនៃដំណើរទស្សនកិច្ចនេះ នឹងក្លាយជាទុនដ៏សំខាន់ដល់មន្រ្តីព័ត៌មានក្នុងការនាំយកមកអភិវឌ្ឍ និងពង្រឹងប្រសិទ្ធភាពការងារព័ត៌មាន និងសោតទស្សន៍នៅកម្ពុជា ឱ្យកាន់តែឆ្លើយតបទៅនឹងសម័យកាលឌីជីថល ព្រមទាំងចែករំលែកអំពីបទពិសោធន៍ដែលទទួលបានដល់មន្រ្តីដទៃទៀត ផងដែរ៕

ដោយ៖ ទូច វលក័្ខណ