AKP ព្រះសីហនុ ថ្ងៃទី២៨ ខែសីហា ឆ្នាំ២០២៦--នៅព្រឹកថ្ងៃសុក្រ ទី២៨ ខែសីហា ឆ្នាំ២០២៦ ‎ក្រុមការងារបច្ចេកទេសទទួលបន្ទុកអនុវត្តន៍កម្មវិធី ASPIRE-TA ខេត្តព្រះសីហនុ ដឹកនាំដោយលោក សុខ រិទ្ធី គ្រូឧទ្ទេស នៃមន្ទីរកសិកម្ម រុក្ខា ប្រមាញ់ និងនេសាទខេត្តព្រះសីហនុ បានបើកវគ្គបណ្តុះបណ្តាល ស្តីពី បច្ចេកទេសក្រោយពេលប្រមូលផល និងការគ្រប់គ្រងផលិតផលកសិកម្មលើខ្សែច្រវាក់តម្លៃមាន់ស្រែ ដល់សមាជិកសហគមន៍កសិកម្មមាន់ស្រែ អូរជ្រៅរុងរឿង នៅសាលាសង្កាត់អូរជ្រៅ ក្រុងកំពង់សោម ខេត្តព្រះសីហនុ។

លោក សុខ រិទ្ធី បានឱ្យដឹងថា វគ្គបណ្តុះបណ្តាលនេះ រៀបចំឡើងក្នុងគោលបំណង៖ ១.បញ្ជ្រាបការយល់ដឹងអំពីបច្ចេកទេសក្រោយពេលប្រមូលផល និងការគ្រប់គ្រងផលិតផលកសិកម្ម មាន់ស្រែ, ២.រក្សាគុណភាព, ៣.រក្សាសោភណភាព និង ៤.រក្សាតម្លៃមាន់ស្រែនៅក្នុងសហគមន៍។

ជាលទ្ធផល សមាជិកសហគមន៍កសិកម្មមាន់ស្រែអូរជ្រៅរុងរឿងបានយល់ដឹងអំពី៖‎ ១.ការប្រមូលផល (Harvesting)៖‎ -ការបញ្ឈប់ចំណីមាន់,‎ -ពេលវេលាចាប់មាន់។ ‎២.របៀបចាប់ និងដឹកជញ្ជូនមាន់៖ ‎-ការចាប់មាន់ដោយថ្នមៗ,‎ -ទ្រុងដឹកជញ្ជូន, ‎-ការការពារកម្ដៅ។ ‎៣.បច្ចេកទេសធ្វើមាន់ (បើលក់សាច់)៖ ‎-ការបង្ហូរឈាមមាន់, ‎-សីតុណ្ហភាពទឹក, ‎-ការលាងសម្អាតមាន់។ ‎៤.ការវេចខ្ចប់ និងថែរក្សាទុក (Storage)៖ ‎-ការវេចខ្ចប់មាន់, ‎-ការបញ្ចុះកម្ដៅមាន់ (Chilling)។ ‎៥.ការត្រួតពិនិត្យគុណភាព និងការបែង ចែកប្រភេទមាន់៖ ‎-ចំណាត់ថ្នាក់ (ដូចជាការបែងចែកមាន់តាមទម្ងន់ និងរូបរាង (មាន់ស្អាត គ្មានស្នាមជាំ) ដើម្បីកំណត់តម្លៃលក់ឱ្យបានសមរម្យ)។

ទន្ទឹមនឹងនោះ ‎ក៏មានកំណត់ត្រាដូចជា ការកត់ត្រាចំនួនមាន់ដែលបានលក់ទម្ងន់សរុប និងចំណូលដែលទទួលបានដើម្បីងាយស្រួលក្នុងការគ្រប់គ្រងអាជីវកម្ម ឱ្យកាន់តែមានប្រសិទ្ធភាព ឈានទៅពង្រីកសហគមន៍អ្នកចិញ្ចឹមមាន់ស្រែនៅតាមមូលដ្ឋានដើម្បីផ្គត់ផ្គង់ទីផ្សារ ជាពិសេសជួយបង្កើនជីវភាពប្រជាពលរដ្ឋនៅមូលដ្ឋាន៕

ដោយ ងូ សុមុនី