AKP ភ្នំពេញ ថ្ងៃទី២៨ ខែសីហា ឆ្នាំ២០២៦ -- ឯកឧត្តម ងី ច័ន្ទ្រផល អនុប្រធានគណៈកម្មការដឹកនាំសន្និសីទបានគូសបញ្ជាក់ថា សន្និសីទនេះបានប្រមូលផ្តុំថ្នាក់ដឹកនាំសភា និង តំណាងមកពីសភានានា ព្រមទាំងតំណាងអង្គការអន្តរជាតិដែលបានចូលរួម ដើម្បីផ្លាស់ប្តូរពីទស្សនៈអំពីបញ្ហាប្រឈមសំខាន់ៗក្នុងតំបន់ និងពិភពលោក ដោយអង្គសន្និសីទបានលើកឡើងអំពីសារៈសំខាន់នៃកិច្ចសន្ធនា ការគោរពគ្នាទៅវិញទៅមក ការផ្សះផ្សារវិវាទដោយសន្តិវិធី ការគោរពច្បាប់អន្តរជាតិ ការអភិវឌ្ឍប្រកបដោយចីរភាព និងការពង្រឹងកិច្ចសហប្រតិបត្តិការរវាងសភានានា។

ថ្លែងក្នុងសន្និសីទសារព័ត៌មានបន្ទាប់ពីសន្និសីទប្រធានសភា នៃអន្តរសភាលើកទី២ ដែលកម្ពុជា ធ្វើជាម្ចាស់ផ្ទះបានបិទបញ្ចប់ដោយជោគជ័យ នាព្រឹកថ្ងៃទី២៨ ខែសីហា ឆ្នាំ២០២៦ នៅរាជធានីភ្នំពេញ ឯកឧត្តម ងី ច័ន្ទ្រផល បានលើកឡើងថា សន្និសីទដែលបានបិទបញ្ចប់នៅថ្ងៃនេះបន្ទាប់ពីយើងបានធ្វើកិច្ចសន្ទនាសភាកម្រិតខ្ពស់រយៈពេល៣ថ្ងៃ ដែលមានគោលបំណងពង្រឹងកិច្ចសហប្រតិបត្តិការ លើកកម្ពស់សន្តិភាព និងជំរុញវិបុលភាពរួម។ ឯកឧត្ដមបានបញ្ជាក់ថា សន្និសីទដែលរៀបចំដោយព្រឹទ្ធសភានៃព្រះរាជាណាចក្រកម្ពុជា បានប្រមូលផ្តុំប្រធានសភា ថ្នាក់ដឹកនាំសភា និងតំណាងមកពីសភានានាដែលបានចូលរួម ព្រមទាំងតំណាងអង្គការអន្តរជាតិ ដើម្បីផ្លាស់ប្តូរទស្សនៈអំពីបញ្ហាប្រឈមសំខាន់ៗក្នុងតំបន់ និងពិភពលោក និងតួនាទីនៃការទូតសភា ក្នុងការដោះស្រាយបញ្ហាប្រឈមទាំងនោះ ដោយអង្គសន្និសីទបានគូសបញ្ជាក់អំពីសារៈសំខាន់នៃកិច្ចសន្ទនា ការគោរពគ្នាទៅវិញទៅមក ការដោះស្រាយវិវាទដោយសន្តិវិធី ការគោរពច្បាប់អន្តរជាតិ ការអភិវឌ្ឍប្រកបដោយចីរភាព និងការពង្រឹងកិច្ចសហប្រតិបត្តិការរវាងសភានានា។

ឯកឧត្តម ងី ច័ន្ទ្រផល បានគូសបញ្ជាក់បន្ថែមថា ការធ្វើជាម្ចាស់ផ្ទះរបស់កម្ពុជាសម្រាប់សន្និសីទប្រធានសភា នៃអន្តរសភាលើកទី២នេះ ក៏ជាការបន្តនូវការរួមចំណែករបស់កម្ពុជា ចំពោះរបៀបវារៈសកលស្តីពីសន្តិភាព និងកិច្ចសន្ទនាកាលពីខែវិច្ឆិកា ឆ្នាំ២០២៤ ដែលរាជធានីភ្នំពេញបានធ្វើជាម្ចាស់ផ្ទះនៃសម័យប្រជុំពេញអង្គលើកទី១១ របស់សភាអន្តរជាតិដើម្បីភាពអត់ឱន និងសន្តិភាព ដែលបានអនុម័តធម្មនុញ្ញសន្តិភាពសកលសម្រាប់មនុស្សជាតិ និងភពផែនដី ដែលធម្មនុញ្ញនេះបានលើកកម្ពស់វិធីសាស្ត្រគ្រប់ជ្រុងជ្រោយចំពោះសន្តិភាព ដែលផ្អែកលើការបង្ការជម្លោះ ការកសាងសន្តិភាព និងបេសកកម្មសុឆន្ទៈ ការស្តារឡើងវិញក្រោយជម្លោះ និងការឆ្លើយតបផ្នែកមនុស្សធម៌ យុត្តិធម៌អន្តរកាល ព្រមទាំងសន្តិសុខស្បៀង និងការអភិវឌ្ឍប្រកបដោយចីរភាព ដើម្បីឆ្លើយតបទៅនឹងការប្រែប្រួលធាតុអាកាស។ ឯកឧត្តមបានសង្កត់ធ្ងន់ថា៖ «កម្ពុជា នៅតែប្តេជ្ញាចិត្តក្នុងការជំរុញគោលការណ៍ទាំងនេះ និងលើកកម្ពស់កិច្ចសន្ទនា ភាពអត់ឱន កិច្ចសហប្រតិបត្តិការអន្តរជាតិ និងការគោរពច្បាប់អន្តរជាតិជាមូលដ្ឋានគ្រឹះសម្រាប់សន្តិភាពយូរអង្វែង និងការអភិវឌ្ឍប្រកបដោយចីរភាព»។

ឯកឧត្តម ងី ច័ន្ទ្រផល បានបញ្ជាក់ទៀតថា អង្គសន្និសីទបានដាក់ចេញនូវសេចក្តីសម្រេចទីក្រុងភ្នំពេញ ដែលជាឯកសារនយោបាយដ៏មានសារៈសំខាន់សម្រាប់សន្និសីទប្រធានសភាអន្តរសភាលើកទី២ នៅរាជធានីភ្នំពេញ។ នៅថ្ងៃទី២៨ ខែសីហា ឆ្នាំ២០២៦ សន្និសីទបានអនុម័តជាផ្លូវការនូវសេចក្តីប្រកាសរាជធានីភ្នំពេញ ដែលឆ្លុះបញ្ចាំងអំពីការប្តេជ្ញាចិត្តរួមរបស់សភា ដែលចូលរួមក្នុងការពង្រឹងការទូតសភា និងកិច្ចសហប្រតិបត្តិការ ដើម្បីគាំទ្រដល់សន្តិភាព ច្បាប់អន្តរជាតិ ការអភិវឌ្ឍប្រកបដោយចីរភាព និងវិបុលភាពរួម។ ឯកឧត្ដមបន្ដថា សេចក្តីប្រកាសនេះ ជាតំណាងឱ្យលទ្ធផលរួមដ៏សំខាន់មួយនៃសន្និសីទលើកទី២ និងផ្តល់នូវក្របខ័ណ្ឌសម្រាប់បន្តអនុវត្តគោលបំណងរបស់សន្និសីទ ក្រោយពីសន្និសីទនៅរាជធានីភ្នំពេញបានបញ្ចប់។ ឯកឧត្ដមបានឱ្យដឹងទៀតថា ក្នុងនាមកម្ពុជាជាម្ចាស់ផ្ទះនៃសន្និសីទប្រធានសភានៃអន្តរសភាលើកទី២ កម្ពុជាបានបញ្ជាក់ជាថ្មីនូវការប្តេជ្ញាចិត្តរបស់ខ្លួន ក្នុងការលើកកម្ពស់កិច្ចសន្ទនា និងកិច្ចសហប្រតិបត្តិការជាឧបករណ៍ដ៏សំខាន់សម្រាប់ការកសាងសន្តិភាព និងការដោះស្រាយបញ្ហាប្រឈមរួម។

ក្នុងឱកាសនោះ ឯកឧត្តម ងី ច័ន្ទ្រផល បានអះអាងបន្ថែមថា៖ «សន្និសីទបានបង្ហាញថា ការទូតសភាអាចបំពេញបន្ថែមដល់ការទូតបែបប្រពៃណី តាមរយៈការបង្កើតលំហសម្រាប់កិច្ចសន្ទនារវាងសមាជិកសភា ការលើកកម្ពស់ការយោគយល់គ្នាទៅវិញទៅមក និងការជួយប្រែក្លាយការប្តេជ្ញាចិត្តអន្តរជាតិ ទៅជាសកម្មភាពសភាជាក់ស្តែង ដោយការពិភាក្សាពេញមួយសន្និសីទលើកទី២នេះ ត្រូវបានប្រព្រឹត្តទៅនៅក្នុងស្មារតីនៃការចូលរួមប្រកបដោយស្ថាបនា ការគោរពគ្នាទៅវិញទៅមក និងការខិតខំស្វែងរកការឯកភាពគ្នា ទោះបីមានភាពខុសគ្នានៃទស្សនៈជាតិក៏ដោយ»៕

ដោយ៖ ចាន់ សុភឿន