AKP កំពង់ធំ ថ្ងៃទី២២ ខែសីហា ឆ្នាំ២០២៦--

ខណ្ឌរដ្ឋបាលជលផលកំពង់ធំសហការជាមួយកម្លាំងចម្រុះ បានចុះប្រតិបត្តិការ ទប់ស្កាត់ និងបង្ក្រាបបទល្មើសនេសាទដើម្បីការពារនិងអភិរក្សធនធានជល ផលក្នុងភូមិសាស្ត្រខេត្តកំពង់ធំ។

ជាក់ស្តែងកាលពីថ្ងៃទី២១ខែសីហាឆ្នាំ២ឥ២៦ លោកស្រី ប៉ែន ណារ៉េន នាយរងសង្កាត់រដ្ឋបាលជលផលសណ្ដាន់ បានសហការជាមួយកម្លាំងស្នាក់ការក២កំពង់ធំ និងកម្លាំងសឹករងស្រុកសណ្ដាន់ ចុះទប់ស្កាត់ និងបង្ក្រាបបទល្មើសជលផល នៅចំណុចភូមិឈើទាល ឃុំឈើទាល ស្រុកសណ្ដាន់ ខេត្តកំពង់ធំ។

ជាលទ្ធផលសម្រេចបាន១ករណី ដោយបានរុះរើ និងបំផ្លាញចោលនៅនឹងកន្លែងនូវឧបករណ៍នេសាទខុសច្បាប់ រួមមាន÷ របាំងស្បៃមុងចំនួន១៧របាំង ប្រវែងសរុប៨៧៥ម៉ែត្រ របាំងសាច់អួនក្រឡាញឹកចំនួន៨របាំង ប្រវែង៣៦០ម៉ែត្រ ឡុកចំនួន១០គ្រឿង លូចំនួន១០មាត់ បង្គោលចំនួន ២៦៨ដើម និងចាក់លែងត្រីចម្រុះទម្ងន់ ១៥គីឡូក្រាម ចូលទៅក្នុងបឹងធម្មជាតិវិញ។

នៅថ្ងៃជាមួយគ្នានេះដែរលោក កែវ សុឃឿន មន្ត្រីសង្កាត់រដ្ឋបាលជលផលបារាយណ៍ (ប្រចាំស្រុកតាំងគោក) បានចូលរួមជាមួយកម្លាំងទីបញ្ជាការស្រាលកោះរះ ចុះទប់ស្កាត់ និងបង្ក្រាបបទល្មើសជលផលនៅចំណុចជៀប ចំបក់ និងកន្ទួត ស្ថិតក្នុងភូមិសាស្ត្រឃុំជ្រលង ស្រុកតាំងគោក ខេត្តកំពង់ធំ។ ជាលទ្ធផលកម្លាំងចម្រុះបានអនុវត្ត ១ករណី ដោយបានរុះរើ និងបំផ្លាញចោលនៅនឹងកន្លែងនូវឧបករណ៍នេសាទខុសច្បាប់ រួមមាន÷ របាំងស្បៃមុងចំនួន១០របាំង ប្រវែង២០០ម៉ែត្រ ឡុកចំនួន ៧គ្រឿង លប/លូចំនួន៧មាត់និង បង្គោលចំនួន៨៤ដើម៕

ដោយ៖ ស៊ុម វណ្ណា