AKP ភ្នំពេញ ថ្ងៃទី២១ ខែសីហា ឆ្នាំ២០២៦--យ៉ាងហោចណាស់មានអ្នកដំណើរចំនួន ៣២នាក់បានស្លាប់ និង៩៥នាក់ផ្សេងទៀតរងរបួសធ្ងន់-ស្រាល ក្នុងហេតុការណ៍គ្រោះថ្នាក់ចរាចរណ៍រយៈពេល១០ថ្ងៃ គិតចាប់ពីថ្ងៃទី១១ រហូតដល់ថ្ងៃទី២០ ខែសីហា ឆ្នាំ២០២៦ សរុប ៦៧ករណីនៅទូទាំងប្រទេស។ នេះបើតាមការឱ្យដឹងពីក្រសួងមហាផ្ទៃ។

បើធៀបនឹងរយៈពេល១០ថ្ងៃដំបូងក្នុងខែសីហាដដែលចំនួនអ្នកស្លាប់បានថយចុះរហូតដល់ទៅ ២០នាក់។ អត្រានៃការថយចុះករណីស្លាប់នេះត្រូវបានចាត់ទុកជាសញ្ញាណវិជ្ជមានមួយ ដែលទំនងកើតចេញពីការខិតខំចាត់វិធានការតាមផ្លូវច្បាប់របស់សមត្ថកិច្ចចំពោះករណីគ្រោះថ្នាក់ចរាចរណ៍ធំៗចុងក្រោយ និងក៏ដោយសារស្មារតីភ្ញាក់រលឹករបស់អ្នកបើកបរផងដែរ។

យ៉ាងណាក៏ដោយ មូលហេតុដែលបណ្ដាលឱ្យកើតមានគ្រោះថ្នាក់ចរាចរណ៍ មិនមានអ្វីប្រែប្រួលនោះទេ ពោលគឺ ដើមចមនៃបញ្ហានេះគឺបណ្ដាលមកពីការបើកបរលើសល្បឿនកំណត់ មិនគោរពសិទ្ធិអាទិភាព បើកបរមិនប្រកាន់ស្តាំ វ៉ាជែង បត់មិនប្រយ័ត្ន បើកបរក្នុងស្ថានភាពស្រវឹង មិនគោរពសញ្ញាចរាចរណ៍ និងកត្តាយានយន្ត។

សូមជម្រាបថា ក្នុងឆមាសទី១ ឆ្នាំ២០២៦ មានគ្រោះថ្នាក់ចរាចរណ៍កើតឡើងសរុប ១.២៧៩លើក បណ្ដាលឱ្យមនុស្សស្លាប់ ៧៧៣នាក់ និងរបួសធ្ងន់ ស្រាលសរុប ១.៩៤៤នាក់។ មូលហេតុនៃគ្រោះថ្នាក់រួមមាន បើកបរលើសល្បឿនកំណត់ ៤៦% មិនគោរពសិទ្ធិអាទិភាព ២២% មិនប្រកាន់ស្ដាំ ១២% ប្រជែងគ្រោះថ្នាក់៧% បត់មិនប្រយ័ត្ន ៦% បើកបរក្នុងស្ថានភាពស្រវឹង ៤% មិនគោរពសញ្ញាចរាចរណ៍ ២% និងកត្តាយានយន្ត ១%៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)