AKP ភ្នំពេញ ថ្ងៃទី២១ ខែសីហា ឆ្នាំ២០២៦ -- ទីក្រុងសេអ៊ូលកំពុងរៀបចំពង្រីកការកម្សាន្តពេលយប់របស់ខ្លួនលើសពីអាហារពេលល្ងាច និងភេសជ្ជៈដោយមានផែនការសម្រាប់ការទស្សនាសារមន្ទីរពេលយប់ជ្រៅ ការឡើងភ្នំវគ្គសមាធិនៅវត្ត ការតាំងពិព័រណ៍យន្តហោះគ្មានមនុស្សបើក និងទីផ្សារម្ហូបអាហារ ដែលជាផ្នែកមួយនៃការជំរុញថ្មីមួយដើម្បីប្រែក្លាយទីក្រុងនេះទៅជាគោលដៅទេសចរណ៍ ២៤ម៉ោង។

រដ្ឋាភិបាលទីក្រុងសេអ៊ូលបានបង្ហាញផែនការនេះកាលពីថ្ងៃព្រហស្បតិ៍ដោយកំណត់ពេលវេលារវាងម៉ោង ៦:០០ល្ងាច និងម៉ោង ៦:០០ព្រឹក និងរួមបញ្ចូលតំបន់វប្បធម៌ ទេសចរណ៍ និងពាណិជ្ជកម្មជាមួយនឹងសេវាកម្មដឹកជញ្ជូនដែលត្រូវបានពង្រីក។

គំនិតផ្តួចផ្តើមនេះ កើតឡើងខណៈដែលភ្ញៀវទេសចរអន្តរជាតិកំពុងស្នាក់នៅយូរជាងមុន និងចំណាយកាន់តែច្រើននៅក្នុងរដ្ឋធានីមួយនេះ។នៅក្នុងឆមាសទីមួយនៃឆ្នាំនេះ ភ្ញៀវទេសចរបរទេសចំនួន ៨,២៣​​លាននាក់បានទៅទស្សនាទីក្រុងសេអ៊ូល ដែលកើនឡើង ២១,៣% ពីរយៈពេលដូចគ្នាកាលពីឆ្នាំមុន។ ការចំណាយលើកាតឥណទានរបស់ពួកគេបានឈានដល់៥,៦ពាន់ពាន់លានវ៉ុន (៤ពាន់លានដុល្លារអាម៉េរិក) ដែលកើនឡើង៥៦,៨%។

ក្រោមផែនការនេះ ទីក្រុងនេះមានគោលបំណងបង្កើតចំណូលបន្ថែមចំនួន ៥ពាន់ពាន់លានវ៉ុនពីការប្រើប្រាស់ពេលយប់ប្រចាំឆ្នាំ និងទាក់ទាញភ្ញៀវទេសចរឱ្យបានចំនួន ៣០លាននាក់ក្នុងរយៈពេលប្រាំឆ្នាំ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)