AKP ភ្នំពេញ ថ្ងៃទី២១ ខែសីហា ឆ្នាំ២០២៦ -- ថ្មីៗនេះ មានការអត្ថាធិប្បាយមួយបានប្រៀបធៀបការអភិវឌ្ឍបញ្ញាសិប្បនិម្មិត (AI) កម្រិតខ្ពស់ទៅនឹងអាវុធនុយក្លេអ៊ែរ (ផ្តោតលើការបំផ្លិចបំផ្លាញ និងការគ្រប់គ្រងយ៉ាងតឹងរ៉ឹង) ឬថាមពលនុយក្លេអ៊ែរ (បង្ហាញពីហានិភ័យដែលអាចគ្រប់គ្រងបាន និងការចូលប្រើប្រាស់រួមគ្នា)។ ដោយឈរលើមាគ៌ាចុងក្រោយនេះ ប្រទេសចិនបានកំណត់ AI ជាប្រយោជន៍សាធារណៈសម្រាប់ផលប្រយោជន៍ជាសកលដោយតស៊ូមតិសម្រាប់នវានុវត្តន៍នៃប្រភពបើកចំហ អភិបាលកិច្ចស្មើភាពគ្នានិងការអភិវឌ្ឍប្រកបដោយបរិយាបន្នតាមរយៈគំនិតផ្តួចផ្តើមដែលបានគូសបញ្ជាក់នៅក្នុងព្រឹត្តិការណ៍សន្និសីទ AI ពិភពលោក ឆ្នាំ២០២៦(WAIC)។

ដើម្បីធ្វើឱ្យមានតុល្យភាពនៃវឌ្ឍនភាពបច្ចេកវិទ្យាជាមួយនឹងសន្តិសុខប្រទេសចិនតស៊ូមតិចំពោះក្របខ័ណ្ឌផ្តោតលើប្រជាជន ដែលធានាថា AI នៅតែស្ថិតនៅក្រោមការគ្រប់គ្រងរបស់មនុស្ស។ ដោយស្របតាមកង្វល់សុវត្ថិភាពជាសកល ប្រទេសចិនបានបង្កើតក្របខ័ណ្ឌសុវត្ថិភាព AI ដ៏ទូលំទូលាយ ផែនការសកម្មភាព និងពិធីសារវាយតម្លៃហានិភ័យ ខណៈដែលប្រើប្រាស់គោលការណ៍ទស្សនវិជ្ជារួមបញ្ចូលដើម្បីលើកកម្ពស់កិច្ចសហប្រតិបត្តិការអន្តរជាតិ និងការផ្លាស់ប្តូរវប្បធម៌ជាជាងការបែងចែកបច្ចេកវិទ្យា។

ដើម្បីភ្ជាប់គម្លាតឌីជីថល ប្រទេសចិនកំពុងពង្រីកគំនិតផ្តួចផ្តើមអន្តរជាតិជាក់ស្តែង រួមទាំងការបង្កើតអង្គការសហប្រតិបត្តិការ AI ពិភពលោក ដែលមាន ៣៨ប្រទេសចូលរួម និងប្តេជ្ញាបណ្តុះបណ្តាលអ្នកជំនាញ AI ចំនួន៥.០០០នាក់មកពីប្រទេសកំពុងអភិវឌ្ឍន៍ក្នុងរយៈពេលប្រាំឆ្នាំខាងមុខ។ ដើម្បីអបអរសាទរខួបលើកទី៧០ នៃការវិវត្តន៍បញ្ញាសិប្បនិម្មិត (AI) ចាប់តាំងពីឆ្នាំ១៩៥៦ ប្រទេសចិនបានសង្កត់ធ្ងន់លើការចែករំលែកគំរូប្រភពបើកចំហការស្រាវជ្រាវអន្តរជាតិរួមគ្នា និងឧបករណ៍ជាក់ស្តែង ដើម្បីធានាថា AIដំណើរការជាកិច្ចខិតខំប្រឹងប្រែងរួមគ្នាជាសកល៕

ដោយ៖ យា ចិន្ដាខន្ដី (ប្រភព៖ BRNN)