AKP ភ្នំពេញ ថ្ងៃទី១៨ ខែសីហា ឆ្នាំ២០២៦--សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី ១៨ ខែសីហា ឆ្នាំ២០២៦នេះបានចាត់ឱ្យឯកឧត្តម យូ ឡាណា អគ្គលេខាធិការរងទី២ កាកបាទក្រហមកម្ពុជា និងអមដំណើរដោយឯកឧត្តម មាន ចាន់យ៉ាដា សមាជិកគណៈកម្មាធិការកណ្តាល និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តឧត្តរមានជ័យ ព្រមទាំងថ្នាក់ដឹកនាំ សមាជិក សមាជិកា អ្នកស្ម័គ្រចិត្ត និងយុវជនកាកបាទក្រហមកម្ពុជា អញ្ជើញចុះសួរសុខទុក្ខ និងនាំយកព្រះរាជអំណោយដ៏ឧត្តុង្គឧត្តមរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុតទៅចែកជូនដល់គ្រួសារភៀសសឹក និងអតីតយុទ្ធជន ចំនួន ១០៦២ គ្រួសារ ដែលបានមកតាំងទីលំនៅ និងជម្លៀសមកស្នាក់នៅជាបណ្តោះអាសន្ននៅក្នុងភូមិផ្ទះបៃតង ដែលមកពីស្រុកបន្ទាយអំពិល ក្រុងសំរោង និងស្រុកចុងកាល់ ក្នុងខេត្តឧត្តរមានជ័យ ។

ឯកឧត្តមអគ្គលេខាធិការរងទី២បាននាំយកនូវព្រះរាជបន្ទូលផ្តាំផ្ញើសួរសុខទុក្ខ ក្តីនឹករលឹក និងក្តីអាណិតអាសូរដ៏ជ្រាលជ្រៅបំផុតពីព្រះករុណា ព្រះមហាក្សត្រ នៃព្រះរាជាណាចក្រកម្ពុជា ជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គមានព្រះរាជហឫទ័យ ខ្វល់ខ្វាយ គិតគូរជាប់ជានិច្ចពីសុខទុក្ខ របស់ប្រជានុរាស្ត្ររបស់ព្រះអង្គគ្រប់ពេលវេលា និងគ្រប់ទីកន្លែង ព្រោះថាទុក្ខលំបាករបស់ប្រជានុរាស្ត្រ គឺជាទុក្ខលំបាករបស់ព្រះអង្គផ្ទាល់ផងដែរ។

ឯកឧត្តមអគ្គលេខាធិការរងទី២ ក៏បាននាំនូវប្រសាសន៍អំពាវនាវពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់ក្មួយៗ ដែលជាស្ត្រីមានផ្ទៃពោះ និងស្ត្រីទើបសម្រាលកូនរួច ជាពិសេសស្ត្រីដែលស្ថិតក្នុងវ័យបន្តពូជ សូមទៅពិនិត្យផ្ទៃពោះឱ្យបាន៤យ៉ាងតិច នៅមណ្ឌលសុខភាពឬមន្ទីរពេទ្យបង្អែកដែលនៅជិតបំផុត ដើម្បីបង្ការការឆ្លងជំងឺពីម្តាយទៅកូន មានដូចជាជំងឺអេដស៍ និងជំងឺកាមរោគជាដើម។

ទន្ទឹមនេះក្រុមការងារក៏បាននាំយកនូវសារអប់រំសុខភាពមួយចំនួនគឺ សូមឱ្យបងប្អូនទាំងអស់រក្សាសុខភាពឱ្យបានល្អទាំងផ្លូវកាយ និងផ្លូវចិត្ត តាមរយៈការរស់នៅស្អាត ផឹកស្អាត និងហូបស្អាត និងចូលរួមបង្ការជំងឺមិនឆ្លង៤សំខាន់ៗរួមមាន ជំងឺទឹកនោមផ្អែម ជំងឺបេះដូងសសៃឈាម ជំងឺមហារីក និងជំងឺរលាភផ្លូវដង្ហើមរាំរ៉ៃ ដែលកំពុងប្រឈមក្នុងចំណោមប្រជាពលរដ្ឋទូទៅនាពេលបច្ចុប្បន្ន បណ្តាលមកពីកា ផ្អែមពេក ប្រៃពេក ខ្លាញ់ពេក អាហារកំប៉ុងច្រើនពេក ការផឹកគ្រឿងស្រវឹង ការជក់បារី និងទម្លាប់នៃការរស់នៅជាប្រចាំថ្ងៃ។

គ្រួសារភៀសសឹក និងអតីតយុទ្ធជនទាំង១០៦២គ្រួសារ ដោយក្នុងមួយគ្រួសារទទួលបាន៖ អង្ករ ៣០គីឡូក្រាម, មី១កេស,ត្រីខ១យួរ,ទឹកស៊ីអ៊ីវ ១យួរ, ទឹកត្រី ១យួរ, ប្រេងឆា២ដប, ម្សៅសាប៊ូ ១ថង់, ឃីត (សារុង ក្រមា មុង ភួយ) ១ឃីត និងថវិកាមួយចំនួន ដែលជាព្រះរាជអំណោយទាំងនេះ ជាព្រះរាជូបត្ថម្ភដ៏ឧត្តុង្គឧត្ដមផ្ទាល់របស់ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់ជាទីបំផុត។

ជាមួយគ្នានេះ កាកបាទក្រហមកម្ពុជា ក៏បានប្រគល់ជូននូវធុងទឹកចំនួន២៣០ធុង សម្រាប់ឱ្យប្រជាពលរដ្ឋភៀសសឹកនៅតំបន់នោះសម្រាប់ប្រើប្រាស់ផងដែរ៕

ដោយ ពេជ្រ សំអឿន(ប្រភព៖កាកបាទក្រហមកម្ពុជា)