AKP ភ្នំពេញ ថ្ងៃទី១៩ ខែសីហា ឆ្នាំ២០២៦–សម្តេចកិត្ដិសង្គហបណ្ដិត ម៉ែន សំអន បានបញ្ជាក់ថា ការផ្តល់សេវាព្យាបាលជំងឺដោយឥតគិតថ្លៃ និងបានរួមចំណែកជាមួយរាជរដ្ឋាភិបាល ក្នុងកាត់បន្ថយការចំណាយ និងលើកកម្ពស់គុណភាពជីវិតរបស់ប្រជាពលរដ្ឋ ។
សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា បានបញ្ជាក់បែបនេះខណៈ សម្ដេចអញ្ជើញជួបសំណេះសំណាលជាមួយបងប្អូនប្រជាពលរដ្ឋ លោកយាយ លោកតា ព្រមទាំងក្រុមគ្រូពេទ្យសប្បុរសធម៌ ប៉ាយសួយឡាយយិនកម្ពុជានាឱកាស ចុះពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃ រយៈពេល៣ថ្ងៃ១៨-២០ សីហា ស្ថិតនៅស្រុករមាសហែក ខេត្ដស្វាយរៀង ដែលប្រព្រឹត្ដទៅថ្ងៃទី១៩ ខែសីហា ឆ្នាំ២០២៦ ។

សម្តេច ម៉ែន សំអន បានបញ្ជាក់ថា សកម្មភាពមនុស្សធម៌នាពេលនេះ គឺពិតជាបានចូលរួមចំណែកយ៉ាងសំខាន់ជាមួយរាជរដ្ឋាភិបាលកម្ពុជា ក្នុងការអនុវត្តយុទ្ធសាស្ត្របញ្ចកោណ ដំណាក់កាលទី១ ជាពិសេសកោណទី១ ការអភិវឌ្ឍធនធានមនុស្ស ដែលផ្តោតលើការលើកកម្ពស់សុខុមាលភាព និងសុខភាពសាធារណៈ ដោយផ្តោតលើការអភិវឌ្ឍធនធានមនុស្ស និងជំរុញ ការគ្របដណ្តប់សុខភាពជាសកល តាមរយៈការពង្រីកប័ណ្ណមូលនិធិសមធម៌សុខាភិបាល ប័ណ្ណក្រីក្រ និង ប.ស.ស ។ល។ តាមរយៈ ការពង្រឹងប្រព័ន្ធថែទាំសុខភាព និងការផ្តល់សេវាសុខាភិបាលគ្របដណ្តប់ជាសកល គឺជាអាទិភាពគន្លឹះដើម្បីធានាថា ប្រជាពលរដ្ឋមានសុខភាពល្អបរិបូរណ៍ ក្នុងការចូលរួមអភិវឌ្ឍសង្គម-សេដ្ឋកិច្ចជាតិ។

សម្តេចកិត្តិសង្គហបណ្ឌិត ម៉ែន សំអន បានអរគុណចំពោះ ក្រុមគ្រូពេទ្យសប្បុរសធម៌ប៉ាយសួយឡាយយិនកម្ពុជា ដែលបានលះបង់កម្លាំងកាយ ចិត្ត ធនធាន និងពេលវេលា ចុះមកផ្តល់សេវាពិនិត្យ ពិគ្រោះ និងព្យាបាលជំងឺដោយឥតគិតថ្លៃ ក្នុងរយៈ ពេលពីថ្ងៃនេះនៅស្រុកកំពង់រោទិ៍ និងស្រុករមាស ហែក ជូនដល់បងប្អូនប្រជាពលរដ្ឋដល់មូលដ្ឋានផ្ទាល់។សកម្មភាពនេះគឺបានបង្ហាញពីសកម្មភាពមនុស្សធម៌ និងបានចូលរួមចំណែកជាមួយរាជរដ្ឋាភិបាល ក្នុងកាត់បន្ថយការចំណាយនិងលើកកម្ពស់គុណភាពជីវភាព ជីវិតរបស់ប្រជា ពលរដ្ឋយ៉ាងពិតប្រាកដ៕.

ដោយ៖ សួស សំរិត