AKP បន្ទាយមានជ័យ ថ្ងៃទី១២ ខែសីហា ឆ្នាំ២០២៦--ឯកឧត្តមបណ្ឌិត សាន វិសាល រដ្ឋលេខាធិការក្រសួងអភិវឌ្ឍន៍ជនបទ និងជាសមាជិកគណៈកម្មាធិការលទ្ធកម្ម (គ.ល) រួមជាមួយគណៈប្រតិភូអន្តរក្រសួង បានអញ្ជើញចុះពិនិត្យ និងវាយតម្លៃបញ្ចប់សុពលភាពលើលទ្ធផលការងារជួសជុលកែលម្អហេដ្ឋារចនាសម្ព័ន្ធរូបវន្ត នៅឃុំបត់ត្រង់ ស្រុកមង្គលបូរី ខេត្តបន្ទាយមានជ័យ នៅថ្ងៃពុធ ទី១២ ខែសីហា ឆ្នាំ២០២៦នេះ។

ក្នុងឱកាសចុះបេសកកម្មដ៏មានសារៈសំខាន់នេះ ឯកឧត្តមបណ្ឌិតរដ្ឋលេខាធិការ បានធ្វើការសំណូមពរយ៉ាងទទូចដល់អាជ្ញាធរមូលដ្ឋាន ភូមិ-ឃុំ ព្រមទាំងប្រជាពលរដ្ឋទាំងអស់ឱ្យចាត់ទុកសមិទ្ធផលទាំងនេះជា «របស់ខ្លួន» និងត្រូវរួមគ្នាថែទាំយ៉ាងហ្មត់ចត់បំផុត។
គម្រោងអភិវឌ្ឍន៍ខាងលើនេះ ត្រូវបានអនុវត្តន៍ដោយនាយកដ្ឋានវិស្វកម្ម នៃក្រសួងការពារជាតិ ដោយមានការចូលរួមសហការពីមន្ទីរអភិវឌ្ឍន៍ជនបទខេត្តបន្ទាយមានជ័យ អាជ្ញាធរមូលដ្ឋាន និងប្រជាពលរដ្ឋក្នុងតំបន់។ សមិទ្ធផលការងារដែលបានដាក់ឱ្យប្រើប្រាស់ និងចុះពិនិត្យវាយតម្លៃរួមមាន ផ្លូវក្រាលដីល្បាយថ្មភ្នំចំនួន ១ខ្សែ ប្រវែង ៣ ០០០ម៉ែត្រ ទទឹង ៥ម៉ែត្រ និងកម្រាស់ ០,២ម៉ែត្រ។ ស្ពានបេតុង ចំនួន ១កន្លែង ប្រវែង ១៥ម៉ែត្រ និងទទឹង ៨ម៉ែត្រ លូប្រអប់មុខពីរចំនួន ១កន្លែង ផ្លាកឈ្មោះផ្លូវ៖ ចំនួន ២កន្លែង ដែលទីតាំងគម្រោងស្ថិតនៅភូមិអន្លង់ថ្លាន់លិច ឃុំបត់ត្រង់ ស្រុកមង្គលបូរី ខេត្តបន្ទាយមានជ័យ។

«ផ្លូវ ស្ពាន និងលូ ដែលបានស្ថាបនាហើយបានល្អប្រសើរ និងមានគុណភាពខ្ពស់នេះ គឺកើតចេញពីកិច្ចខិតខំប្រឹងប្រែងរបស់រាជរដ្ឋាភិបាល។ ដូច្នេះ អាជ្ញាធរមូលដ្ឋានភូមិ-ឃុំ ដែលមាននាទីទទួលបន្ទុកថែទាំបន្ត ត្រូវសហការណែនាំឱ្យប្រជាពលរដ្ឋចូលរួមក្នុងការថែទាំឱ្យបានល្អ និងត្រូវមានការយាមកាមយ៉ាងហ្មត់ចត់ ដើម្បីរក្សាគុណភាពឱ្យបានគង់វង្សយូរអង្វែង ដោយត្រូវបណ្តុះស្មារតីចាត់ទុកផ្លូវ ស្ពាន និងលូនេះ ជារបស់ពួកគាត់ផ្ទាល់»។ នេះជាប្រសាសន៍របស់ឯកឧត្តមបណ្ឌិត សាន វិសាល។

ការចុះពិនិត្យ និងវាយតម្លៃបញ្ចប់សុពលភាពនេះ មិនត្រឹមតែជាការធានាឱ្យបាននូវតម្លាភាព និងគុណភាពនៃការសាងសង់តាមបទដ្ឋានបច្ចេកទេសប៉ុណ្ណោះទេ ប៉ុន្តែថែមទាំងជាការបំផុសស្មារតីស្នេហាជាតិ និងការទទួលខុសត្រូវខ្ពស់ពីសំណាក់ប្រជាពលរដ្ឋមូលដ្ឋាន ក្នុងការថែរក្សាការពារសមិទ្ធផលសង្គមជាតិឱ្យគង់វង្សសម្រាប់កូនចៅជំនាន់ក្រោយ ជាពិសេសគឺការលើកកម្ពស់ជីវភាពរស់នៅ និងការធ្វើដំណើរកាន់តែមានភាពងាយស្រួលក្នុងតំបន់ជនបទ៕

ដោយ ឈុន សារ៉ាត