AKP ភ្នំពេញ ថ្ងៃទី៣ ខែសីហា​ ឆ្នាំ២០២៦

ព្រឹត្តិការណ៍ ពន្លឿនការលូតលាស់កម្ពុជា គឺជាសកម្មភាពដំបូងបង្អស់ ដែលស្ថិតក្រោមយុទ្ធនាការជាតិ «អនុភាពបច្ចេកវិទ្យាខ្មែរ» រៀបចំដោយ B2B Asia News បានប្រព្រឹត្តទៅនៅទីតាំងហ្វេកតូរី ភ្នំពេញ កាលពីថ្ងៃទី៣១ ខែកក្កដា ឆ្នាំ២០២៦ ដោយបានប្រមូលផ្តុំសហគ្រិនក្នុងស្រុក ស្ថាបនិកក្រុមហ៊ុនបច្ចេកវិទ្យាបង្កើតថ្មី  ម្ចាស់អាជីវកម្មធុនតូច និងមធ្យម អ្នកបង្កើតស្នាដៃថ្មី សិស្ស-និស្សិត និងអ្នកជំនាញបច្ចេកវិទ្យាចម្រុះគ្នាសម្រាប់កម្មវិធីពេញមួយថ្ងៃក្នុងការពង្រឹងជំនាញបច្ចេកវិទ្យាដោយដាក់ឱ្យអនុវត្តន៍ជាក់ស្តែង និងជំរុញកម្លាំងចលករួមគ្នាដើម្បអនាគតឌីជីថលកម្ពុជា។

ព្រឹត្តិការណ៍នេះ បានចាប់ផ្តើមជាមួយនឹងវគ្គសិក្ខាសាលាដ៏មានសារៈសំខាន់ ក្នុងនោះ ផ្តោតលើការលើកកម្ពស់ការយល់ដឹងផ្នែកឌីជីថល និងការបង្កើតជំនាញឌីជីថល ដែលបង្រៀនដោយដោយអ្នកជំនាញមានបទពិសោធន៍ក្នុងឧស្សាហកម្មមកពី BKD Academy, 2080 Ventures និង PharmKulen។ អ្នកចូលរួមទទួលបាននូវចំណេះដឹងអនុវត្តន៍ជាក់ស្តែងអំពីជំនាញឌីជីថលទៅក្នុងកិច្ចការប្រចាំថ្ងៃ ការបង្កើតគំនិតច្នៃប្រឌិត និងការសរសេរកម្មវិធីដោយប្រើប្រាស់បញ្ញាសិប្បនិម្មិត(AI)ជាជំនួយការចម្បងបង្កើតជាគំនិតអាជីវកម្មបច្ចេកវិទ្យាបង្កើតថ្មី  ព្រមទាំងរបៀបដែលត្រូវជ្រើសរើសឧបករណ៍បញ្ញាសិប្បនិម្មិតមកអនុវត្តជាក់ស្តែងសម្រាប់អាជីវកម្មធុនតូច។

ជាមួយគ្នានេះ ក៏មានពិព័រណ៍ «ទីផ្សារបច្ចេកវិទ្យា» ដោយបានផ្តល់ឱកាសឱ្យអ្នកចូលរួម ជួបប្រាស្រ័យទាក់ទងផ្ទាល់ជាមួយក្រុមហ៊ុនបច្ចេកវិទ្យាបង្កើតថ្មី និងអាជីវកម្មធុនតូច និងមធ្យមផ្នែកឌីជីថល ក្រុមហ៊ុនបច្ចេកវិទ្យា និងសហគ្រិនជាង ២០រូប។ លើសពីនេះ ក៏មានវគ្គក្នុងការបង្ហាញស្នាដៃនវានុវត្តន៍នៅលើឆាកជាពិសេស ដែលបានរៀបរាប់ពីសមិទ្ធផលរបស់អ្នកបង្កើតថ្មីផ្នែកបច្ចេកវិទ្យាឌីជីថលឈានមុខគេចំនួន ១០ រូបនៅកម្ពុជា បានឡើងធ្វើបទបង្ហាញអំពីដំណោះស្រាយ និងផលិតផលឌីជីថលដែលបានដាក់ឱ្យប្រើប្រាស់ជាផ្លូវការរួចមកហើយ។

ក្នុងពិធីបើកព្រឹត្តិការណ៍នេះ លោក Anthony Galliano អគ្គនាយកនៃ B2B Asia News បានលើកឡើងអំពីដំណើរនៃការផ្លាស់ប្តូរទៅរកឌីជីថលដែលប្រទេសកម្ពុជាកំពុងតែបន្តឈានទៅមុខ និងរបៀបដែលយុទ្ធនាការ «អនុភាពបច្ចេកវិទ្យាខ្មែរ» ជាចំណែកក្នុងការជួយជ្រោមជ្រែង និងលើកកម្ពស់អ្នកបង្កើតថ្មីទាំងឡាយនៅក្នុងវិស័យបច្ចេកវិទ្យាឌីជីថលក្នុងស្រុក។ លោកបានបញ្ជាក់ថា ពេលដែលពួកយើងបានផ្តើមគំនិតបង្កើតយុទ្ធនាការ អនុភាពបច្ចេកវិទ្យាខ្មែរ លើកដំបូង ពួកយើងបានចោទសួរខ្លួនឯងនូវសំណួរដ៏សំខាន់មួយ៖ តើអនាគតនៃសេដ្ឋកិច្ចឌីជីថលរបស់កម្ពុជាមានរូបរាងបែបណា ហើយនរណាជាអ្នកកំពុងស្ថាបនានូវអនាគតមួយនេះ? ចម្លើយគឺកំពុងតែមានវត្តមាននៅក្នុងបន្ទប់នេះស្រាប់។ លោកបានសង្កត់ធ្ងន់ថា៖ «អនាគតនេះកំពុងតែត្រូវបានសរសេរកូដនៅក្នុងការិយាល័យនានាទូទាំងរាជធានីភ្នំពេញ កំពុងត្រូវបំពាក់នៅលើម៉ាស៊ីនបម្រើសេវាក្លោដក្នុងស្រុក និងកំពុងត្រូវបានភ្ជាប់ទៅក្នុងអាជីវកម្មធុនតូចតាមបណ្តាខេត្តនានានៃកម្ពុជា។ តាមរយៈ អនុភាពបច្ចេកវិទ្យាខ្មែរ ពួកយើងកំពុងបោះជំហានទៅមុខ ដើម្បីលើកស្ទួយបច្ចេកវិទ្យាដែលត្រូវបានបង្កើតឡើងក្នុងស្រុក ហេដ្ឋារចនាសម្ព័ន្ធឌីជីថល ដំណោះស្រាយក្លោដ និងវេទិការពាណិជ្ជកម្មអេឡិចត្រូនិក។»

យុទ្ធនាការ "អនុភាពបច្ចេកវិទ្យាខ្មែរ" គឺជាគំនិតផ្តួចផ្តើមឈានមុខគេដែលមានរយៈពេលប្រាំមួយ(៦)ខែ រៀបចំឡើងដោយ B2B Asia News ដោយមានការគាំទ្រពីក្រសួងប្រៃសណីយ៍ និងទូរគមនាគមន៍ (MPTC), មូលនិធិនៃការកសាងសមត្ថភាព និងការស្រាវជ្រាវ និងការអភិវឌ្ឍលើវិស័យទូរគមនាគមន៍ និងបច្ចេកវិទ្យាគមនាគមន៍ និងព័ត៌មាន(មូលនិធិ ស.អ.) និងសហគ្រិនខ្មែរ ។ យុទ្ធនាការនេះ មានគោលបំណងលើកកម្ពស់បច្ចេកវិទ្យាក្នុងស្រុក ជំរុញកិច្ចសហប្រតិបត្តិការឆ្លងវិស័យ និងអបអរសាទរដំណោះស្រាយឌីជីថលស្នាដៃកូនខ្មែរ ដែលត្រូវបានបង្កើតឡើងជាចលនាមួយដើម្បីផ្លាស់ប្តូរការយល់ឃើញ និងកសាងទំនុកចិត្តលើការបង្កើតថ្មីក្នុងស្រុក ហើយយុទ្ធនាការនេះដើរតួជាស្ពានតភ្ជាប់យ៉ាងសំខាន់រវាងអ្នកបង្កើតបច្ចេកវិទ្យាកម្ពុជា ជាមួយអ្នកធ្វើសេចក្ដីសម្រេចចិត្តក្នុងក្រុមហ៊ុន វិនិយោគិន និងអ្នករៀបចំគោលនយោបាយ។

តាមរយៈការបង្ហាញនូវប្រព័ន្ធបច្ចេកវិទ្យា ឧបករណ៍ឌីជីថល និងគំរូអាជីវកម្មដែលអាចពង្រីកវិសាលភាពបាន ដែលត្រូវបានអភិវឌ្ឍដោយស្នាដៃកូនខ្មែរផ្ទាល់ "អនុភាពបច្ចេកវិទ្យាខ្មែរ" មានគោលបំណងបង្ហាញឱ្យឃើញថា វិស័យបច្ចេកវិទ្យារបស់កម្ពុជា មិនត្រឹមតែមានសមត្ថភាពក្នុងការដោះស្រាយបញ្ហាប្រឈមក្នុងទីផ្សារក្នុងស្រុកប៉ុណ្ណោះទេ ប៉ុន្តែថែមទាំងមានបំពាក់នូវសមត្ថភាពកាន់តែខ្លាំងឡើងក្នុងការប្រកួតប្រជែងក្នុងកម្រិតតំបន់ផងដែរ។

ក្នុងឱកាសនោះ លោកស្រី Sarvinoz Nuritdinova អគ្គនាយិកានៃស្ថាប័ន B2B Asia News បានកត់សម្គាល់ថា ចាប់តាំងពីសិក្ខាសាលាឯកទេសដ៏មានសារប្រយោជន៍ រហូតដល់សកម្មភាពដ៏ថាមពលនិងមមាញឹកនៅតាមស្តង់ពិព័រណ៍បច្ចេកវិទ្យានីមួយៗយើងអាចមើលឃើញយ៉ាងច្បាស់ថា ប្រព័ន្ធអេកូឡូស៊ីបច្ចេកវិទ្យានៅកម្ពុជា កំពុងតែរីកចម្រើន មានការបង្កើតថ្មី និងត្រៀមខ្លួនជាស្រេចក្នុងការនាំមុខ ក៏ដូចជាពង្រឹងឌីជីថលកម្ពុជា។ លោកស្រីបានថ្លែងបញ្ជាក់ថា កម្មវិធីពន្លឿនការលូតលាស់បច្ចេកវិទ្យាកម្ពុជា គ្រាន់តែជាជំហានដំបូងនៅក្នុងដំណើរប្រឡូកក្នុងវិស័យឌីជីថលរយៈពេល ៦ ខែ នេះប៉ុណ្ណោះ។ យើងបានចាប់ផ្តើមបង្កើតកម្លាំងចលករជាផ្លូវការសម្រាប់យុទ្ធនាការ គឺជាអនុភាពបច្ចេកវិទ្យា នេះហើយ។

លោកស្រីអគ្គនាយិកាបានបន្ថែមថា៖ «នៅពេលដែលយើងរៀបចំបញ្ចប់កម្មវិធី ពន្លឿនការលូតលាស់បច្ចេកវិទ្យាកម្ពុជា ខ្ញុំពោរពេញទៅដោយក្តីសង្ឃឹ“មយ៉ាងមុតមាំ។ ថ្ងៃនេះយើងបានឃើញពីអនាគតនៃបច្ចេកវិទ្យាកម្ពុជាកំពុងតែដំណើរការយ៉ាងរស់រវើក។ ប្រសិនបើថ្ងៃនេះគឺជាការរត់ប្រណាំងចម្ងាយ សូមចងចាំថា យើងកំពុងតែរត់ប្រណាំងចម្ងាយដ៏ឆ្ងាយ ដូចការត់ម៉ារ៉ាតុងជាមួយគ្នា»៕

ដោយ៖ រិទ្ធី