AKP បន្ទាយមានជ័យ ថ្ងៃទី២៨ ខែកក្កដា ឆ្នាំ២០២៦--កម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ មិនត្រឹមតែជាយន្តការដ៏មានប្រសិទ្ធភាពក្នុងការទាក់ទាញសិស្សឱ្យមកសិក្សា និងកាត់បន្ថយអត្រាបោះបង់ការសិក្សាប៉ុណ្ណោះទេ ប៉ុន្តែថែមទាំងជាកាតាលីករជួយជំរុញជីវភាពប្រជាកសិករក្នុងមូលដ្ឋានដោយផ្ទាល់។ ថ្លែងនៅក្នុងកិច្ចប្រជុំបូកសរុបលទ្ធផលការងារប្រចាំឆមាសទី១ លោក ឃូ ពៅ អភិបាលរងខេត្តបបន្ទាយមានជ័យ តំណាង ឯកឧត្តម អ៊ុ រាត្រី អភិបាល នៃគណៈអភិបាលខេត្ត បានដាក់ចេញនូវការណែនាំយ៉ាងម៉ឺងម៉ាត់ដល់គ្រប់សាលារៀន និងភាគីពាក់ព័ន្ធទាំងអស់ត្រូវបន្តអនុវត្ត និងពង្រឹងគុណភាពកម្មវិធីនេះឱ្យរឹតតែមានប្រសិទ្ធភាពខ្ពស់ និងប្រកបដោយចីរភាព។

នៅក្នុងពិធីបើកកិច្ចប្រជុំនាព្រឹកថ្ងៃអង្គារ ទី២៨ ខែកក្កដា ឆ្នាំ២០២៦ នេះ លោក ឃូ ពៅ បានគូសបញ្ជាក់ថា រាជរដ្ឋាភិបាលកម្ពុជាជានិច្ចកាលតែងតែយកចិត្តទុកដាក់ខ្ពស់លើសុខុមាលភាព និងការអប់រំរបស់កុមារ ដែលជាទំពាំងស្នងឫស្សីរបស់ជាតិ។ លោកបានមានប្រសាសន៍ថា កម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ គឺជាយុទ្ធសាស្ត្រ «ឈ្នះ-ឈ្នះ» ដោយសិស្សទទួលបានអាហារមានអាហារូបត្ថម្ភគ្រប់គ្រាន់ និងសុវត្ថិភាពសម្រាប់ការលូតលាស់ទាំងកាយសម្បទានិងប្រាជ្ញាស្មារតី ចែករំលែកបន្ទុកគ្រួសារក្រីក្រ ហើយកសិករក្នុងសហគមន៍មានទីផ្សារច្បាស់លាស់ក្នុងការលក់បន្លែ ត្រី សាច់ និងកសិផលផ្សេងៗ។

លោកអភិបាលរងខេត្ត ក៏បានជំរុញបន្ថែមដល់នាយក-នាយិកាសាលារៀន អាជ្ញាធរដែនដី និងមន្ទីរជំនាញ ត្រូវសហការគ្នាឱ្យបានជិតស្និទ្ធ បន្តត្រួតពិនិត្យគុណភាព អនាម័យ និងសុវត្ថិភាពចំណីអាហារជាប្រចាំ ដោយត្រូវទិញកសិផលផ្ទាល់ពីប្រជាសហគមន៍ដើម្បីឱ្យថវិការដ្ឋ និងជំនួយផ្សេងៗជ្រួតជ្រាបទៅដល់ដៃប្រជាពលរដ្ឋក្នុងមូលដ្ឋានពិតប្រាកដ។

រាយការណ៍អំពីលទ្ធផលបច្ចេកទេស និងស្ថានភាពអនុវត្តជាក់ស្តែង លោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្តបន្ទាយមានជ័យ បានបង្ហាញឱ្យឃើញពីការខិតខំប្រឹងប្រែង និងលទ្ធផលផ្លែផ្កាគួរឱ្យកត់សម្គាល់ក្នុងឆមាសទី១ កន្លងមកនេះ។ លោកនាយកមន្ទីរបានគូសបញ្ជាក់ថាការកើនឡើងនៃអត្រាចូលរៀនតាមរយៈការអនុវត្តកម្មវិធីនេះ អត្រាសិស្សមកសាលារៀនទៀងទាត់មានការកើនឡើងគួរឱ្យកត់សម្គាល់ ហើយអត្រាអវត្តមាន និងបោះបង់ការសិក្សារបស់សិស្សនៅកម្រិតបឋមសិក្សាបានថយចុះ។

ការគាំទ្រសហគមន៍កសិកម្ម មន្ទីរបានសម្របសម្រួលបង្កើតបណ្តាញផ្គត់ផ្គង់រវាងសាលារៀន និងសហគមន៍កសិកម្មក្នុងស្រុក ដោយធានាបាននូវការទិញ-លក់កសិផលស្រស់ៗ និងគ្មានសារធាតុគីមី។

ការចូលរួមពីអាជ្ញាធរ និងមាតាបិតាកម្មវិធីនេះបានបង្កើតនូវស្មារតីម្ចាស់ការ និងកិច្ចសហការយ៉ាងរឹងមាំរវាងគណៈគ្រប់គ្រងសាលា អាជ្ញាធរមូលដ្ឋាន និងសហគមន៍មាតាបិតាសិស្សក្នុងការចម្អិន និងរៀបចំអាហារ។

កិច្ចប្រជុំបូកសរុបនេះ ត្រូវបានរៀបចំឡើងនៅសាលប្រជុំមន្ទីរអប់រំ យុវជន និងកីឡាខេត្តបន្ទាយមានជ័យ ដោយមានការអញ្ជើញចូលរួមយ៉ាងច្រើនកុះករពីសំណាក់ លោក លោកស្រី តំណាងមន្ទីរ-អង្គភាពពាក់ព័ន្ធ, អភិបាលរងស្រុក, តំណាងអាជ្ញាធរដែនដី, ប្រធានការិយាល័យអប់រំ, នាយក-នាយិកាសាលារៀន ព្រមទាំងតំណាងសហគមន៍កសិកម្មជាច្រើនរូប។
អង្គប្រជុំក៏បានបើកការពិភាក្សាដេញដោល ផ្លាស់ប្តូរបទពិសោធន៍ និងលើកឡើងពីបញ្ហាប្រឈមមួយចំនួន ដើម្បីរួមគ្នាស្វែងរកដំណោះស្រាយ សំដៅពង្រឹងការអនុវត្ត «កម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍» ក្នុងឆមាសទី២ ឱ្យរឹតតែទទួល បានលទ្ធផលកាន់តែប្រសើរថែមទៀត៕

ដោយ ឈុន សារ៉ាត