AKP ភ្នំពេញ ថ្ងៃទី២០ ខែកក្កដា ឆ្នាំ២០២៦--នាយកដ្ឋានគោលនយោបាយ នៃក្រសួងអប់រំ យុវជន និងកីឡា បានរៀបចំសិក្ខាសាលាពិគ្រោះយោបល់ស្ដីពីការពិនិត្យឡើងវិញនូវក្របខ័ណ្ឌគន្លងអាជីពគ្រូបង្រៀន និងសេចក្ដីណែនាំប្រតិបត្តិ ដើម្បីពិនិត្យ ពិភាក្សា និងប្រមូលធាតុចូលពីភាគីពាក់ព័ន្ធ សម្រាប់ការធ្វើបច្ចុប្បន្នភាពឯកសារក្របខ័ណ្ឌគន្លងអាជីពគ្រូបង្រៀនឱ្យមានភាពគ្រប់ជ្រុងជ្រោយ និងអនុវត្តន៍បានប្រកបដោយប្រសិទ្ធភាពស្របតាមបរិបទជាក់ស្ដែង។

សិក្ខាសាលានេះ ធ្វើឡើងនៅវិទ្យាស្ថានគរុកោសល្យកំពង់ចាម រយៈពេល២ថ្ងៃ (២០-២១ កក្កដា ២០២៦) ដោយមានការចូលរួមពីតំណាងក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ និងតំណាងថ្នាក់ក្រោមជាតិមកពីបណ្ដាខេត្តចំនួន ៧ សរុបប្រមាណ ៧០នាក់ ក្រោមការការគាំទ្រពីកម្មវិធី GPE5/STEPCamII។

ក្នុងពិធីបើកសិក្ខាសាលានេះ ឯកឧត្តមបណ្ឌិត លីម សុធា អគ្គនាយកនៃអគ្គនាយកដ្ឋានគោលនយោបាយ និងផែនការ នៃក្រសួងអប់រំ យុវជន និងកីឡា បានផ្ដល់អនុសាសន៍លើការអភិវឌ្ឍអង្គគ្រូបង្រៀនឱ្យមានសមត្ថភាពខ្ពស់ ដើម្បីរួមចំណែកលើកកម្ពស់គុណភាពអប់រំ បច្ចេកវិទ្យា និងវិទ្យាសាស្ត្រ ព្រមទាំងត្រៀមលក្ខណៈសម្រេចបាននូវការប្ដេជ្ញាចិត្តចំពោះ TES+4 សំដៅឆ្លើយតបទៅនឹងលទ្ធផលតេស្តអន្តរជាតិដូចជា PISA និង SEA-PLM ឱ្យកាន់តែប្រសើរឡើង។

បើតាមបណ្ឌិត ឃុត សុខា ប្រធាននាយកដ្ឋានគោលនយោបាយ បានឱ្យដឹងថា ចាប់តាំងពីឆ្នាំ២០២១មក ក្រសួងបានសម្រេចសមិទ្ធផលជាច្រើនក្នុងការដំឡើងឋានៈវិជ្ជាជីវៈជូនបុគ្គលិកអប់រំ រួមមាន ការវាយតម្លៃជ្រើសរើសនាយកល្អ គ្រូល្អ និងអ្នកឯកទេសអប់រំល្អជាបន្តបន្ទាប់។ ការពិនិត្យកែសម្រួលនេះធ្វើឡើងដើម្បីបន្ស៊ីទៅនឹងព្រះរាជក្រឹត្យឆ្នាំ២០២៦ ស្តីពីលក្ខន្តិកៈនៃអង្គគ្រូបង្រៀន ក៏ដូចជាគោនយោបាយថ្មីៗដូចជា ស្តង់ដាសាលារៀនគំរូ និងយុទ្ធសាស្ត្រអប់រំឌីជីថល។ ដំណើរការកែសម្រួលនេះត្រូវបានបែងចែកជា៤ដំណាក់កាលរួមមាន៖ ការវិភាគបន្ស៊ីគោលនយោបាយ, ការចុះស្ទង់មតិភាគីពាក់ព័ន្ធ, ការរៀបចំសិក្ខាសាលាពិគ្រោះយោបល់ និងការប្រជុំបច្ចេកទេសកម្រិតខ្ពស់ដើម្បីសម្រេចចុងក្រោយ។

លោកបានបញ្ជាក់ថា ផ្អែកលើការពិភាក្សាក្របខ័ណ្ឌថ្មីនេះនឹងរក្សាគន្លងអាជីពទាំង៣ (បង្រៀន គ្រប់គ្រង ឯកទេសអប់រំ) និងឋានៈវិជ្ជាជីវៈទាំង៣កម្រិត (ល្អ ឈានមុខ ឆ្នើម) ប៉ុន្តែនឹងមានការកែសម្រួលសូចនាករវាយតម្លៃយន្តការវាយតម្លៃនៅកម្រិតគ្រឹះស្ថានសិក្សា និងប្រព័ន្ធលើកទឹកចិត្តឱ្យកាន់តែច្បាស់លាស់ថែមទៀតផងដែរ៕

ដោយ៖ ចាន់ សុភឿន (ប្រភព៖ ក្រសួងអប់រំ)