AKPកំពង់ធំថ្ងៃទី២០ខែកក្កដាឆ្នាំ២០២៦--ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំកាលពីថ្ងៃទី១៩ខែកក្កដាឆ្នាំ២០២៦បានអញ្ជើញចុះពិនិត្យវឌ្ឍនភាពនៃការអនុវត្តគម្រោងលើកកម្ពស់ជីវភាពប្រជាជនខេត្តកំពង់ធំ នៅសហគមន៍កសិកម្មសំ ព្រោជមានជ័យ នៅឃុំសំព្រោជ ស្រុកស្ទោង។ 

ដំណើរចុះបំពេញបេសកកម្មការងារនេះ មានការចូលរួមអមដំណើរពីសំណាក់ឯកឧត្តមរដ្ឋមន្រ្តី ថោ ជេដ្ឋា, ឯកឧត្ដម ប៉ែន ធីរុង្គ ប្រធានក្រុមការងារ​លើកក ម្ពស់​ជីវភាព​ប្រជាជនខេត្ត​កំព​ង់​ធំ, ឯកឧត្ដម នួន ផារ័ត្ន អភិបាលខេត្តកំពង់ធំ, តំណាងក្រសួងកសិកម្ម រុក្ខាប្រមាញ់ និងនេសាទ។

ឯកឧត្តម​ឧបនាយករដ្ឋមន្ត្រីប្រចាំការ វង្សី វិស្សុត បានគូសបញ្ជាក់ថា បេស កកម្មរបស់ក្រុមការងារចុះមូលដ្ឋាន​ខេត្តកំពង់ធំ គឺម្ខាងខិតខំជំរុញការអភិវឌ្ឍមូលដ្ឋានសេដ្ឋកិច្ចខេត្តកំពង់ធំ ចាប់ពីថ្នាក់ខេត្តរហូតដល់គ្រប់មូលដ្ឋាន​ភូមិ ឃុំ ទាំងអស់និងម្ខាងទៀតធានាថា រាល់ការអភិវឌ្ឍ ត្រូវតែផ្តល់ផលទៅដល់ការលើកកម្ពស់ជីវភាព និងការ​កាត់បន្ថ យភាពក្រីក្ររបស់ប្រជាជន។ 

ឯកឧត្តមឧបនាយករដ្ឋមន្រ្តីប្រចាំការ បានបន្តថា ការអភិវឌ្ឍនៅទីកន្លែង​ណាក៏ដោយ គឺសំខាន់សំដៅដល់ប្រជាជនជាស្នូល ពោលគឺត្រូវធ្វើ​យ៉ាងណាឱ្យប្រជាជនមានជីវភាពធូរធារ,មានការងារធ្វើ, មានមុខរបរ, មានប្រាក់ចំណូល, មានផ្ទះសម្បែងសមរម្យ, មានបាយហូបគ្រប់គ្រាន់,ទទួលបានការ​ព្យាបាលសុខភាព ហើយកូនៗរបស់ពួកគាត់ទទួលបានការអប់រំប្រកបដោយគុណភាព និងមិនមានបន្ទុកបំណុល​វ័ណ្ឌក ព្រមទាំងទទួលបាននូវសេវាសាធារណៈគ្រប់ប្រភេទដែលជាភារកិច្ចរបស់រដ្ឋត្រូវផ្តល់ជូនពួកគាត់។

បន្ទាប់ពីបានស្តាប់របាយការណ៍របស់ ឯកឧត្ដម ប៉ែន ធីរុង្គ ប្រធានក្រុមការងារ​លើកកម្ពស់​ជីវភាព​ប្រជា​​ជន​ខេត្ត​កំព​ង់​ធំ និងរបាយការណ៍របស់លោកស្រីប្រធានសហគមន៍រួចមក,ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានវាយតម្លៃខ្ពស់ចំពោះសហគមន៍កសិកម្មសំព្រោជមានជ័យ ដែលមាន​ថ្នាក់ដឹកនាំ និងសមាជិកភាគច្រើនជាស្ដ្រី ហើយមានការប្ដេជ្ញាចិត្តខ្ពស់ ពិសេសការសម្រេចបាននូវវឌ្ឍនភាពគួរឱ្យកត់សម្គាល់។

ឯកឧត្តមឧបនាយករដ្ឋមន្ត្រីប្រចាំការ បានថ្លែងអំណរគុណយ៉ាងជ្រាលជ្រៅចំពោះ ក្រសួងធនធានទឹកនិងឧតុនិយម ក្រុមការងារចុះមូលដ្ឋានគ្រប់ថ្នាក់ រដ្ឋបាលខេត្តកំពង់ធំ និងអាជ្ញាធរមូលដ្ឋានគ្រប់ថ្នាក់ ដែលបានខិតខំប្រឹងប្រែង​កសាង​ហេដ្ឋារចនាសម្ព័ន្ធ អភិវឌ្ឍសេដ្ឋកិច្ចមូលដ្ឋាននិងការផ្តល់សេវាសាធារណៈបានយ៉ាងល្អប្រសើរជូនដល់ប្រជាពលរដ្ឋ ព្រមទាំងបានទាក់ទា ញគម្រោងវិនិយោគធំៗមកខេត្តកំពង់ធំ ទាំងគម្រោងជាវិនិយោគសាធារណៈ និងគម្រោងវិនិយោគឯកជន ពិសេសក្នុងវិស័យកសិកម្ម និងកសិ-ឧស្សាហកម្ម។ 

ទន្ទឹមនេះ ឯកឧត្តមឧបនាយក​រដ្ឋមន្ត្រីប្រចាំការ ក៏បានថ្លែងអំណរគុណចំពោះដៃគូអភិវឌ្ឍន៍នានា រួមមាន ADB, អង្គការ HEIFER, អង្គការសហប្រតិបត្តិការ​ដើម្បី​អភិវឌ្ឍន៍​នៅកម្ពុជា (CoDeC), គម្រោង​​ជំរុញ​ទីផ្សារ​សម្រាប់​កសិកម្មខ្នាតតូច (AIMS), អង្គការ World Vision និងអង្គការក្ដីសង្ឃឹមលូថេរ៉ានកម្ពុជា ជាពិសេសក្រុមការងារលើកកម្ពស់ជីវភាពប្រជាជនខេត្តកំពង់ធំ និងសហគ្រិនខ្មែរ (KE) ដែលបានចូលរួមឧបត្ថម្ភគាំទ្រសហគមន៍កសិកម្មសំព្រោជមានជ័យ។

ឆ្លើយតបទៅនឹងបញ្ហាប្រឈម និងសំណូមពរជាក់ស្តែងដែលបងប្អូនប្រជាសហគមន៍បានលើកឡើង, ឯកឧត្តម​​ឧបនាយករដ្ឋមន្ត្រីប្រចាំការ វង្សី វិស្សុត បានសម្រេចផ្តល់នូវដំណោះស្រាយភ្លាមៗនៅនឹងកន្លែង ដោយបានទទួលយក និងផ្តល់ការគាំទ្រលើការងារសំខាន់ៗដូចជា÷ ទី១.ការជួយស្ថាបនាកំណាត់ផ្លូវប្រវែង ៨០០ម៉ែត្រ បន្ថែម​ពី​កំណាត់ផ្លូវដែលទើបសាងសង់ប្រវែង១១០០ម៉ែត្រ។ ទី២.ការសាងសង់អគារការិយាល័យសម្រាប់សហគមន៍កសិកម្មសំព្រោជមានជ័យ។ ទី៣.ផ្ដល់ម៉ាស៊ីន២គ្រឿងសម្រាប់ធ្វើជីកំប៉ុស។ ទី៤.ការជួយជីកពង្រីកនិងកែលម្អ  ស្រះទឹកក្នុងសហគមន៍ឱ្យបានស្អាតល្អនិងអាច​បម្រើដល់សកម្មភាពផលិតបានគ្រប់គ្រាន់។ ទី៥. ការរៀបចំ វគ្គ​បណ្តុះបណ្តាលបច្ចេកទេសកសិកម្ម និងជំនាញ​ពាក់ព័ន្ធបន្ថែម និងការគ្រប់គ្រងហិរញ្ញវត្ថុឱ្យបានច្បាស់លាស់។ ការប្រកាសផ្តល់នូវដំណោះស្រាយជាក់ស្តែងតប​តាមសំណូមពររបស់សហគមន៍ បានធ្វើឱ្យបងប្អូន ប្រជាសហគមន៍មានភាពរីករាយ ពេញចិត្ត និងទទួលបាននូវក្តី​សង្ឃឹមយ៉ាងមុតមាំចំពោះមុខរបររបស់ខ្លួន។ទន្ទឹមនឹងការផ្តល់ជំនួយ និងដំណោះស្រាយទាំងនេះ ឯកឧត្តម វង្សី វិស្សុត បានផ្តល់នូវអនុសាសន៍ណែនាំដ៏មានតម្លៃដល់បងប្អូនសហគមន៍ទាំងមូល នូវទស្សនវិជ្ជាសំខាន់នៃការចុះជួយរបស់ក្រុមការងារលើកកម្ពស់ជីវភាពប្រជាជន គឺ «ជួយប្រជាជនឱ្យចេះរកត្រី មិនមែនមកផ្តល់ត្រីឱ្យនោះទេ»ហើយជោគជ័យនៃបេសកកម្មរបស់ក្រុមការងារ គឺនៅពេលណាដែលបងប្អូនឈប់ត្រូវការជំនួយពីនរណាទាំងអស់ ពោលគឺអាចរស់ដោយខ្លួនឯង​បាន អាចពឹងខ្លួនឯងបាន និងអាចរីកចម្រើនដោយខ្លួនឯងបាន តាមរយៈការពង្រឹងភាពជាម្ចាស់ និងសមត្ថភាព​ខ្លួនឯង​ឱ្យបានរឹងមាំជាប់ជាប្រចាំ។ ទន្ទឹមនេះ ដើម្បីឱ្យសហគមន៍អាចរីកចម្រើនធំធាត់ និងអាចរស់បានដោយខ្លួនឯងនាពេលអនាគត

ទាមទារឱ្យសហគមន៍ត្រូវពង្រឹការដឹក នាំ ,ការគ្រប់គ្រង, ការប្រើប្រាស់និងចាត់ចែងហិរញ្ញវត្ថុ, មានសាមគ្គីភាពល្អ, ចេះយោគយល់គ្នា, មានវិន័យ, ភាពស្មោះត្រង់, ឧស្សាហ៍ព្យាយាម និងការទទួលខុសត្រូវ ព្រមទាំងមានការចូលរួម ដោយរួមទាំងការចូលរួមជាទុនបដិភាគ។ 

ទន្ទឹមនេះ ឯកឧត្តមឧបនាយករដ្ឋមន្ត្រី​ប្រចាំការ បានណែនាំនិងសំណូមពរឱ្យអាជ្ញាធរមូលដ្ឋានគ្រប់ថ្នាក់ ក្រុមការងារចុះមូលដ្ឋាន និងដៃគូអភិវឌ្ឍន៍ បន្តជួយគាំទ្រដល់សហគមន៍ឱ្យទទួលបានជោគជ័យ ហើយជះផលទៅដល់ការលើកកម្ពស់ជីវភាពបងប្អូននៅក្នុងសហគមន៍ ក៏ដូចជាប្រជាជននៅមូលដ្ឋានឃុំទាំងមូលឱ្យកាន់តែមានភាពធូរធារប្រសើរឡើង។

គួរបញ្ជាក់ដែរថា គម្រោងលើកកម្ពស់ជីវភាពប្រជាជនខេត្តកំពង់ធំ ត្រូវបានដាក់ឱ្យដំណើរការជាផ្លូវការកាលពីខែមេសា ឆ្នាំ២០២៥ កន្លងទៅ ដែលត្រូវអនុវត្តក្នុងរយៈពេល ៤ឆ្នាំ (២០២៥-២០២៨) ដោយផ្តល់ជាទុនបដិភាគដល់សហគមន៍កសិកម្មចំនួន៧៥ នៅក្នុងបណ្តាស្រុក ក្រុងទាំង៩ នៃខេត្តកំពង់ធំ និងមានថវិកាសរុប​ប្រមាណជាង ៤៣ម៉ឺនដុល្លារអាម៉េរិក ដែលគាំទ្រដោយឯកឧត្តម វង្សី វិស្សុត និងក្រុមការងារ ព្រមទាំងសប្បុរសជន ដោយក្នុងនោះ ថវិកាផ្ទាល់របស់ឯកឧត្តម វង្សី វិស្សុត ចំនួន ២០ម៉ឺនដុល្លារអាម៉េរិក។ គិតមកដល់ ពេលនេះគឺបានចុះ​​កិច្ចសន្យា​អនុវត្តគម្រោងជាមួយ ២២សហគមន៍កសិកម្ម និង ២ក្រុមផលិត គិតជាទឹកប្រាក់ប្រមាណជិត ២០ម៉ឺនដុល្លារអាម៉េរិក។ គម្រោងនេះ មានគោលដៅជំរុញការធ្វើពិពិធកម្ម និងលើកកម្ពស់សមត្ថភាពផលិតកម្មកសិកម្មខ្នាតតូច ដែលហុចផលរហ័ស និងត្រូវការទុនតិច ដោយមិនមែន​ជាការផ្តោតលើផលិតកម្មសម្រាប់តែការហូបចុកលក្ខណៈគ្រួសារនោះទេ ប៉ុន្តែសម្រាប់លក់នៅលើទីផ្សារ និងជាគម្រោងដើម្បីបង្កើតការងារបន្ថែម មុខរបរបន្ថែម និងប្រាក់ចំណូលបន្ថែម ពីលើមុខរបរស្នូលប្រចាំថ្ងៃរបស់ប្រជាជន ដូចជាការធ្វើស្រែ ការធ្វើចម្ការ និងនេសាទជាដើម៕

ដោយ៖ ស៊ុម វណ្ណាប្រភពទីស្ដីការគណៈរដ្ឋមន្ត្រី