AKP សៀមរាប ថ្ងៃទី១៦ ខែកក្កដា ឆ្នាំ២០២៦--ផ្លូវបេតុង១ខ្សែប្រវែង ៦៦០ម៉ែត្រ ទទឹង ៦ម៉ែត្រ ដែលស្ថិតនៅភូមិតាគង់ សង្កាត់សំបួរ ដោយជាប់នឹងព្រំប្រទល់ជាមួយភូមិគ្រួសសង្កាត់ស្វាយដង្គំ និងភូមិរកាធំ សង្កាត់ស្រង៉ែ ក្នុងក្រុងសៀមរាប ដែលជាអំណោយរបស់សប្បុរសជនជាជនជាតិបរទេស និងខ្មែរ ផ្តល់ថវិកាតាមរយៈរដ្ឋបាលសង្កាត់សំបួរ ធ្វើការសាងសង់ដើម្បីជួយសម្រួលដល់ការធ្វើដំណើរបងប្អូនប្រជាពលរដ្ឋក្នុងមូលដ្ឋាន និងលើកកម្ពស់សោភណភាពក្នុងសហគមន៍ ត្រូវបានសម្ពោធដាក់ឱ្យប្រើប្រាស់ជាផ្លូវការហើយនាព្រឹកថ្ងៃទី១៦ ខែកក្កដា ឆ្នាំ២០២៦នេះ។

លោក ឈ្លឿន ឡា ចៅសង្កាត់សំបួរ បានថ្លែងថា ការធ្វើផ្លូវបេតុងនេះមានប្រវែង៦៦០ម៉ែត្រ ទទឹង ៦ម៉ែត្រ គឺចំណាយថវិកាអស់ជាង១២ម៉ឺនដុល្លារអាម៉េរិក ដោយមានការដាក់លូអមសងខាងផ្លូវ និងបំពាក់អំពូលសូឡាផងដែរ។ លោក ឈ្លឿន ឡា បន្ថែមថា ផ្លូវបេតុងនេះមិនត្រឹមតែជាសមិទ្ធផលរូបវន្តថ្មីមួយនៅក្នុងមូលដ្ឋានរបស់យើងប៉ុណ្ណោះទេ ប៉ុន្តែវាគឺជាស្ពានចម្លងដ៏សំខាន់បង្ហាញពីទឹកចិត្តសប្បុរសធម៌ និងការរួមចំណែកយ៉ាងធំធេងពីសំណាក់សប្បុរសជន ជាមួយរាជរដ្ឋាភិបាល និងអាជ្ញាធរមូលដ្ឋានក្នុងការអភិវឌ្ឍហេដ្ឋារចនាសម្ព័ន្ធជនបទ។

ក្នុងនាមអាជ្ញាធរសង្កាត់ទាំង៣ លោក ឈ្លឿន ឡា សូមថ្លែងអំណរគុណយ៉ាងជ្រាលជ្រៅបំផុតចំពោះសប្បុរសជនទាំងអស់ ដែលបានលះបង់ថវិកាផ្ទាល់ខ្លួនផ្តល់ជូនតាមរយៈអាជ្ញាធរដើម្បីកសាងផ្លូវនេះឡើង ដែលវាជួយសម្រួលដល់ការធ្វើដំណើររបស់បងប្អូនប្រជាពលរដ្ឋ សិស្សានុសិស្សបានយ៉ាងងាយស្រួល មិនថាខែប្រាំង ឬខែវស្សា ព្រមទាំងជួយលើកកម្ពស់សេដ្ឋកិច្ច និងជីវភាពរស់នៅរបស់ប្រជាជនក្នុងតំបន់នេះផ្ទាល់តែម្តង។

លោក ដេវីត ហ្រ្គេនជើ ម្ចាស់ក្រុមហ៊ុនអចលនទ្រព្យ IPS តំណាងឱ្យសប្បុរសជនដែលជាជនជាតិបរទេស និងខ្មែរ ដែលមានទីលំនៅនៅក្នុងសង្កាត់នោះ បានមានប្រសាសន៍ថា លោកពិតជាការបានចូលរួមចំណែកថវិកាកសាងផ្លូវបេតុងនេះ គឺជាក្តីប្រាថ្នាដ៏ធំបំផុតរបស់លោកដើម្បីឃើញភូមិរបស់យើងមានការប្រែប្រួលមុខមាត់ថ្មី បងប្អូន និងក្មួយៗសិស្សានុសិស្សធ្វើដំណើរបានស្រួល មិនពិបាកដូចមុន។ ផ្លូវបេតុងមួយខ្សែនេះកើតឡើងបាន គឺដោយសារតែកម្លាំងសាមគ្គីភាព និងទឹកចិត្តដ៏សប្បុរសរបស់បងប្អូនយើងទាំងអស់គ្នាទាំងក្នុងនិងក្រៅប្រទេស។ ថវិកាដែលយើងបានរួមគ្នានៅថ្ងៃនេះ មិនត្រឹមតែសាងសង់ផ្លូវមួយខ្សែប៉ុណ្ណោះទេ ប៉ុន្តែវាបានតភ្ជាប់បេះដូង និងក្តីសង្ឃឹមរបស់សហគមន៍យើងឱ្យកាន់តែរឹងមាំទ្វេឡើង។

លោក ហាយ យង់ អភិបាលរងក្រុងសៀមរាប បានមានប្រសាសន៍ថា សមិទ្ធផលផ្លូវបេតុងប្រវែងជាង ៦០០ ម៉ែត្រ ដែលបានកើតឡើងដោយសារសទ្ធាជ្រះថ្លា និងទឹកចិត្តសប្បុរសរបស់សប្បុរសជន ព្រមទាំងការចូលរួមគាំទ្រពីអាជ្ញាធរ និងប្រជាពលរដ្ឋទាំងអស់ហើយផ្លូវមួយខ្សែនេះ មិនមែនគ្រាន់តែជាផ្លូវសម្រាប់ធ្វើដំណើរប៉ុណ្ណោះទេ ប៉ុន្តែជាសមិទ្ធផលដ៏មានតម្លៃ ដែលបានបង្ហាញពីសាមគ្គីភាព ការចូលរួម និងការទទួលខុសត្រូវរួមគ្នា ក្នុងការអភិវឌ្ឍមូលដ្ឋានឱ្យកាន់តែរីកចម្រើន។ លោកអភិបាលរងក្រុងបន្តថា សមិទ្ធផលនេះនឹងជួយសម្រួលដល់ការធ្វើដំណើររបស់ប្រជាពលរដ្ឋ ការដឹកជញ្ជូនកសិផល ការសិក្សារបស់សិស្សានុសិស្ស ការទទួលបានសេវាសុខាភិបាល និងការអភិវឌ្ឍសេដ្ឋកិច្ចក្នុងសហគមន៍។ លើសពីនេះ វាក៏ជាមូលដ្ឋានសំខាន់សម្រាប់ទាក់ទាញការវិនិយោគ និងជំរុញការអភិវឌ្ឍឃុំទាំងមូលឱ្យកាន់តែមានសក្ដានុពល។

លោក ហាយ យង់ ក៏បានថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ ដែលបានឧបត្ថម្ភថវិកា កម្លាំងកាយ កម្លាំងចិត្ត និងពេលវេលា ដើម្បីធ្វើឱ្យសមិទ្ធផលនេះក្លាយជាការពិតទឹកចិត្តដ៏ថ្លៃថ្លារបស់លោក លោកស្រី នឹងត្រូវបានប្រជាពលរដ្ឋចងចាំ និងធ្វើជាគំរូដ៏ល្អសម្រាប់មនុស្សជំនាន់ក្រោយ។

លោកអភិបាលរងក្រុងសៀមរាប បានថ្លែងអំពាវនាវជាថ្មីម្តងទៀតដល់បងប្អូនប្រជាពលរដ្ឋដែលរស់នៅអាស្រ័យផលលើដងផ្លូវនេះ សូមជួយថែផ្លូវ រក្សាសណ្ដាប់ធ្នាប់បរិស្ថាន ការគ្រប់គ្រងសំរាម ក្នុងការចូលរួមលើកកម្ពស់សោភណភាពទីក្រុងសៀមរាបឱ្យស័ក្ដិសមជាទីក្រុងទេសចរណ៍ផងដែរ។ លោកក៏បានសំណូពរ និងអំពាវនាវដល់បងប្អូនប្រជាពលរដ្ឋឱ្យចូលរួមថែរក្សាផ្លូវបេតុងថ្មី ដើម្បីធានាគុណភាពប្រើប្រាស់បានយូរអង្វែង សម្រួលដល់ការធ្វើដំណើរប្រចាំថ្ងៃ និងលើកកម្ពស់សោភណភាពភូមិដ្ឋាន ហើយការចូលរួមថែរក្សាផ្លូវ គឺជាកាតព្វកិច្ច និងជាមោទនភាពរបស់ប្រជាពលរដ្ឋគ្រប់រូបក្នុងមូលដ្ឋានផងដែរ៕

ដោយ ឃុត សៅ