AKP កំពង់ធំ ថ្ងៃទី១៦ ខែកក្កដា ឆ្នាំ២០២៦--លោក លឹម សុថាត នាយសង្កាត់រដ្ឋបាលជលផលកំពង់ស្វាយក្រោម បានដឹកនាំកម្លាំងមន្ត្រីជាប់កិច្ចសន្យាសហការជាមួយកម្លាំងកងរាជអាវុធហត្ថស្នាក់ការ B06 ចុះទប់ស្កាត់ និងបង្ក្រាបបទល្មើសជលផលនៅចំណុចព្រែកឆ្កោក ឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ កាលពីថ្ងៃទី១៥ ខែកក្កដា ឆ្នាំ២០២៦។

នៅថ្ងៃជាមួយគ្នានេះដែរ លោក ហួន ផល នាយសង្កាត់រដ្ឋបាលជលផលពាមបាង បានដឹកនាំមន្រ្តី និងមន្រ្តីជាប់កិច្ចសន្យា ចូលរួមជាមួយលោកអនុសេនីយ៍ឯក លុយ សុភាព នាយទាហានថ្នាក់ដឹកនាំតំបន់ប្រតិបត្តិការសឹករងកំពង់ធំ យោធភូមិភាគទី៤ សហការជាមួយកម្លាំងទីបញ្ជាការស្រាលប្រចាំការ ឃុំពាមបាង បានចេញប្រតិបត្តិការត្រួតពិនិត្យ និងបង្រ្កាបបទល្មើសនេសាទ ចំណុចព្រែកពាមឆេះកែវ ដល់ពេជ្រចក្រី ឃុំពាមបាង ស្រុកស្ទោង ខេត្តកំពង់ធំ។

ជាលទ្ធផលជាក់ស្ដែង កម្លាំងជំនាញចម្រុះអនុវត្តន៍បាន១ករណីដោយបានរុះរើបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន៖ របាំងព្រួលកាត់ព្រែកចំនួន១៧របាំង ប្រវែង៥២០ម៉ែត្រ ឡុកស្បៃមុងចំនួន១៣គ្រឿង លូ ឬលបស្បៃមុងចំនួន១៦មាត់ បង្គោលចំនួន១០០ដើម កៅស៊ូបិទផ្ជិតមុខទឹកប្រវែង៤៨០ម៉ែត្រ និងលបឫស្សីចំនួន១៨លប៕

ដោយ ស៊ុម វណ្ណា