AKP កំពង់ធំ ថ្ងៃ១២ ខែកក្កដា ឆ្នាំ២០២៦ -- សាខាកាកបាទក្រហមកម្ពុជាខេត្តកំពង់ធំ សហការ ជាមួយវិទ្យាល័យតាំងក្រសាំង បានរៀបចំបើកវគ្គបណ្ដុះបណ្ដាល ស្តីពីប្រវត្តិចលនាកាកបាទក្រហម អឌ្ឍចន្ឌក្រហម គោលការណ៍គ្រឹះ និងវិជ្ជាសង្គ្រោះបឋម ជូនដល់យុវជនកាកបាទក្រហមកម្ពុជា នៅវិទ្យាល័យតាំងក្រសាំង ស្រុកសន្ទុក ខេត្តកំពង់ធំ កាលពីថ្ងៃទី១១ ខែកក្កដា ឆ្នាំ២០២៦ដោយបានការអញ្ជើញចូលរួមពីលោកស្រី ឡេង សុឃីម នាយិការងសាខាកាកបាទក្រហមកម្ពុជាខេត្តកំពង់ធំ លោក ថោង នី នាយកវិទ្យាល័យតាំងក្រសាំង មន្ត្រីក្រុមប្រត្តិបត្តិ និងមន្រ្តីការិយាល័យអប់រំ យុវជន និងកីឡាស្រុកសន្ទុក អ្នកស្ម័គ្រចិត្ត និងយុវជនកាកបាទក្រហមកម្ពុជាចំនួន ៤៥នាក់។

លោកស្រី ឡេង សុឃីម បានលើកឡើងថា ការបើកវគ្គបណ្ដុះបណ្ដាលនេះ ក្នុងគោលបំណងដើម្បីឱ្យយុវជន កាកបាទក្រហមកម្ពុជាបានយល់ដឹងអំពីប្រវត្តិចលនាកាកបាទក្រហម អឌ្ឍចន្ទក្រហម និងវិជ្ជាសង្គ្រោះបឋម ដើម្បីជួយសង្គ្រោះជនរងគ្រោះឱ្យបានត្រឹមត្រូវទៅតាមបច្ចេកទេស ហើយយកចំណេះដឹងថ្មីនេះទៅធ្វើការអប់រំផ្សព្វផ្សាយបន្តដល់បងប្អូន និងសហគមន៍រៀងៗខ្លួន។

ក្នុងឱកាសនោះ លោកស្រី ឡេង សុឃីម នាយិការងសាខាកាកបាទក្រហមកម្ពុជាខេត្តកំពង់ធំ បានពាំនាំមកនូវប្រសាសន៍ផ្តាំផ្ញើសាកសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ព្រមទាំងឯកឧត្តម នួន ផារ័ត្ន ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ធំ ជូនចំពោះប្អូនៗ និងក្មួយៗទាំងអស់ដោយក្តីនឹករឭកបំផុត និងថ្លែងអំណរគុណយ៉ាងជ្រាលជ្រៅចំពោះការលះបង់ពេលវេលាដ៏មានតម្លៃចូលរួមក្នុងការងារមនុស្សធម៌របស់កាកបាទក្រហម ក៍ដូចជាវគ្គបណ្ដុះបណ្ដាលនេះផងដែរ។

លោក ថោង នី នាយកវិទ្យាល័យតាំងក្រសាំង បានផ្តល់នូវអនុសាសន៍សំខាន់ៗពីរចំណុចដល់ប្អូនៗ និងក្មួយៗទាំងអស់ ដោយប្អូនៗ និងក្មួយទាំងអស់ជាកម្លាំងចូលរួមយ៉ាងសំខាន់ក្នុងការជួយដល់ប្រជាពលរដ្ឋក្នុងសហគមន៍ ហើយប្អូនៗ និងក្មួយៗទាំងអស់ក៏ជាឆ្អឹងខ្នងរបស់កាកបាទក្រហមកម្ពុជា និងជាទំពាំងស្នងឬស្សីរបស់សង្គមជាតិផងដែរ។

សូមបញ្ជាក់ថា សម្រាប់ប្រធានបទដែលយកមកបង្ហាញរួមមាន ១. ប្រវត្តិចលនាកាកបាទក្រហម អឌ្ឍចន្ទក្រហម គោលការណ៍គ្រឹះ។ ២. ការប្រើប្រាស់បដិរូប។ ៣. ការជួយជនរងគ្រោះសន្លប់បាត់បងស្មារតី (មានដង្ហើម)។ ៤. ការធ្វើ CPR (មនុស្សពេញវ័យ កុមារ និងទារក)។ ៥. ការជួយជនរងគ្រោះស្លាក់ (មនុស្សពេញវ័យ កុមារ និងទារក)។ ៦. វិធានការការពារជំងឺមិនឆ្លងធំទាំង ៤ប្រភេទ និង ៧. សុវត្ថិភាពចរាចរណ៍ផ្លូវគោកប្រកបដោយបរិយាប័ន្ន៕

ដោយ៖ ស៊ុម វណ្ណា