AKP ភ្នំពេញ ថ្ងៃទី០៧ ខែកក្កដា ឆ្នាំ២០២៦-- សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា និងសហការី អញ្ជើញចុះសាកសួរសុខទុក្ខ និងនាំយកអំណោយ ព្រមទាំងថវិកា ជូនយោធិនចំនួន៤រូប រងរបួសដោយសារគ្រាប់បែក អំឡុងពេលដើរល្បាតនៅព្រំដែនខេត្តឧត្តរមានជ័យ ដែលបច្ចុប្បន្នត្រូវមកព្យាបាលនៅមន្ទីរពេទ្យមិត្តភាពកម្ពុជា-ចិន ព្រះកុសុមៈ និងមន្ទីរពេទ្យកាល់ម៉ែត រាជធានីភ្នំពេញ នារសៀលថ្ងៃទី០៦ ខែកក្កដា ឆ្នាំ២០២៦។

លោកជំទាវអគ្គលេខាធិការបាននាំនូវប្រសាសន៍ផ្តាំផ្ញើសួរសុខទុក្ខ និងការយកចិត្តទុកដាក់ខ្ពស់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។ លោកជំទាវជំរាបជូនថា ក្រោមការយកចិត្តទុកដាក់របស់ថ្នាក់ដឹកនាំទាំងអស់ ជាពិសេសសម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា បានចាត់ឱ្យលោកជំទាវ មកសួរសុខទុក្ខក្មួយៗដោយផ្ទាល់ និងបានដឹងពីសុខទុក្ខនិងការព្យាបាលផង។ ដូចនេះ សូមក្មួយៗទាំងអស់ត្រូវរឹងមាំឡើងខិតខំសម្រាកព្យាបាល ឱ្យបានល្អ ជាពិសេសសូមក្មួយៗសម្រាកឱ្យបានស្រួលទាំងផ្លូវកាយនិងផ្លូវចិត្ត ជាមួយគ្នានេះជូនពរឱ្យក្មួយៗដែលយោធិនទាំង៤រូប ឆាប់បានជាសះស្បើយ និងមានសុខភាពល្អឡើងវិញ។

យោធិនទាំង៤រូប បានថ្លែងអំណរគុណយ៉ាងជ្រាលជ្រៅ ចំពោះការយកចិត្តទុកដាក់ និងការឧបត្ថម្ភរបស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា និងសូមគោរពជូនពរសម្តេចកិត្តិព្រឹទ្ធបណ្ឌិត សូមប្រកបដោយសុខភាពល្អ កម្លាំងមាំមួន និងបន្តដឹកនាំការងារមនុស្សធម៌ដោយជោគជ័យ។

សូមបញ្ជាក់ដែរថា ក្រោយការព្យាបាលយ៉ាងយកចិត្តទុកដាក់របស់ក្រុមគ្រូពេទ្យ ក្មួយៗដែលជាយោធិនទាំង៤រូប មិនប៉ះពាល់ដល់អាយុជីវិតឡើយ គឺការសង្គ្រោះទទួលបានជោគជ័យ និងកំពុងបន្តតាមដានយ៉ាងយកចិត្តទុកដាក់ពីក្រុមគ្រូពេទ្យជំនាញនៃមន្ទីរពេទ្យមិត្តភាពកម្ពុជា-ចិន ព្រះកុសុមៈ និងមន្ទីរពេទ្យកាល់ម៉ែត៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)