AKP ភ្នំពេញ ថ្ងៃទី២៧ ខែមិថុនា ឆ្នាំ២០២៦–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាព្រឹកថ្ងៃទី២៧ ខែមិថុនា ឆ្នាំ២០២៦នេះ នឹង
អញ្ជើញជាអធិបតី ក្នុងកម្មវិធីសំណេះសំណាល មហាគ្រួសារសហគ្រាសធុនតូច មធ្យម និងសិប្បកម្មកម្ពុជា ក្នុងឱកាសអបអរ ទិវាជាតិសហគ្រាសធុនមីក្រូ តូច និងមធ្យម របស់សមាគមមូលនិធិសម្តេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា នៅមជ្ឈមណ្ឌល សាលសន្និបាត និងពិព័រណ៍កោះពេជ្រ។

សមាគមមូលនិធិសម្តេចតេជោ រៀបចំពិធីសំណេះសំណាលនេះឡើង ដើម្បីផ្តល់តម្លៃ និងលើកទឹកចិត្តដល់បងប្អូនសហគ្រិននៅទូទាំងប្រទេស ក្នុងការចាប់យកឱកាសមាស ពង្រឹងខ្សែច្រវាក់ផលិតកម្ម បង្កើតការងារ ជំរុញការកែច្នៃ និងពង្រីកទីផ្សារ ទាំងក្នុងស្រុក និងអន្តរជាតិ ជាពិសេស ក្នុងបរិការណ៍ដែលផលិតផលក្នុងស្រុកកំពុងទទួលបានការគាំទ្រយ៉ាងខ្លាំងក្លាពីសំណាក់ប្រជាពលរដ្ឋ ដែលនេះជាកម្លាំងចលករដ៏សំខាន់ជួយឱ្យផលិតផលខ្មែរអាចជំនួសទំនិញនាំចូលបានប្រមាណ ៣០% នៃតម្រូវការ ទីផ្សារសរុប ព្រមទាំងចូលរួមបង្កើតការងារជូនដល់បងប្អូនពលករដែលវិលត្រឡប់មកពីក្រៅប្រទេសបានយ៉ាងច្រើនកុះករ ធ្វើឱ្យសេដ្ឋកិច្ចជាតិយើងកាន់តែមានភាពធន់ និងរឹងមាំយូរអង្វែង។

ដើម្បីជំរុញចលនានេះឱ្យកាន់តែខ្លាំងក្លា សមាគមបានដើរតួនាទីយ៉ាងសកម្មក្នុងការរៀបចំ «ពិព័រណ៍ផលិតផលខ្មែរ ក្រោម ប្រធានបទរួមគ្នាផលិត រួមគ្នាប្រើផលិតផលជាតិ » ចំនួន៣ដងរួចមកហើយ ព្រមទាំងនៅតែបន្តធ្វើពិព័រណ៍ផលិតផលខ្មែរតទៅទៀត ដើម្បីបង្កើតឱកាសផ្គូផ្គងអាជីវកម្ម និងពង្រីកទីផ្សារជូនសមាជិក។
ទន្ទឹមនឹងនេះ សមាគមក៏បានពង្រឹងកិច្ចសហការយ៉ាង ជិតស្និទ្ធជាមួយក្រសួង-ស្ថាប័នជាច្រើន ដូចជា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលជាស្ថាប័នបង្គោល ក្រសួងពាណិជ្ជកម្ម ក្រសួងកសិកម្មរុក្ខាប្រមាញ់ និងនេសាទ ក្រសួងការងារ និងបណ្តុះបណ្តាលវិជ្ជាជីវៈ ក្រសួងបរិស្ថាន ក្រសួងទេសចរណ៍ និងមូលនិធិអភិវឌ្ឍន៍ជំនាញ (SDF) ក្នុងការសម្របសម្រួល បង្កើតបរិយាកាសធុរកិច្ចល្អប្រសើរ និងផ្តល់ការគាំទ្រ ផ្នែកបច្ចេកទេស និងជំនាញដល់ម្ចាស់សហគ្រាសទូទាំងរាជធានីខេត្ត។

ជាពិសេស ក្នុងពេលថ្មីៗកន្លងទៅនេះ សម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) ក្រោមការគាំទ្រ របស់សមាគមមូលនិធិសម្តេចតេជោ បានសហការរៀបចំ «វេទិកាពិភាក្សារវាងគយ ជាមួយ FASMEC » ដើម្បីដោះស្រាយបញ្ហា ប្រឈម សម្របសម្រួលនីតិវិធីពាណិជ្ជកម្ម ផ្សព្វផ្សាយច្បាប់ និងបទប្បញ្ញត្តិគយនានា ក្នុងគោលបំណងបង្កលក្ខណៈងាយស្រួល ដល់ការនាំចេញ-នាំចូល និងលើកកម្ពស់ការប្រកួតប្រជែងរបស់សហគ្រាសក្នុងស្រុក។ បន្ថែមលើនេះ សម្រាប់ទិសដៅការងារនាពេលខាងមុខដ៏ខ្លីនេះ សមាគមបាននិងកំពុងរៀបចំផែនការ ដើម្បីសហការជាមួយ ក្រសួងបរិស្ថាន ក្នុងការរៀបចំ វេទិកាពិភាក្សា ដើម្បីតម្រង់ទិស និងជួយដល់សហគ្រាសធុនតូច និងមធ្យម ឱ្យយល់ដឹងពីការផលិតដោយចីរភាព ការគ្រប់គ្រងសំណល់ និងការប្រើប្រាស់ថាមពលកកើតឡើងវិញ ដែលជាតម្រូវការចាំបាច់សម្រាប់ទីផ្សារទំនើបនាពេលបច្ចុប្បន្ន៕

ដោយ៖ គង់ សិរីរ័ត្ន