AKP ភ្នំពេញ ថ្ងៃទី២៥ ខែមិថុនា ឆ្នាំ២០២៦ -- ក្នុងអំឡុងពេលនៃដំណើរទស្សនកិច្ចត្រួតពិនិត្យទៅកាន់ទីក្រុងតេចូវ ក្នុងខេត្តសាន់ទុង នៅភាគខាងកើតប្រទេសចិន លោក ស៊ី ជីនពីង បានសង្កត់ធ្ងន់ទៅលើសារៈសំខាន់នៃការជំរុញសមត្ថភាពផលិតកម្មកសិកម្ម និងគុណភាព។ លោកបានគូសបញ្ជាក់ថា ការធានាចំពោះការផ្គត់ផ្គង់គ្រាប់ធញ្ញជាតិ និងផលិតផលកសិកម្មសំខាន់ៗដែលមានស្ថេរភាពនៅតែជាអាទិភាពចម្បង។ ដើម្បីគាំទ្រដល់កិច្ចការនេះ លោកបានអំពាវនាវឱ្យមានការអនុវត្តយ៉ាងរឹងមាំនៃគោលនយោបាយផលិតកម្មគ្រាប់ធញ្ញជាតិដែលមានការគាំទ្រ ការកែលម្អហេដ្ឋារចនាសម្ព័ន្ធ និងសមត្ថភាពបង្ការ និងសង្គ្រោះគ្រោះមហន្តរាយឱ្យកាន់តែប្រសើរឡើង ដើម្បីធានាបាននូវការប្រមូលផលយ៉ាងច្រើន។

ខណៈកំពុងទៅទស្សនកិច្ចតាមភូមិនានាក្នុងតំបន់ លោក ស៊ី បានចូលរួមដោយផ្ទាល់ជាមួយអ្នកជំនាញកសិកម្ម និងគ្រួសារនានា ដើម្បីត្រួតពិនិត្យការប្រមូលផលស្រូវសាលី និងការដាំពោត។ លោកបានទៅទស្សនាវាលស្រែ និងផ្ទះសម្បែងក្នុងតំបន់ ដោយសាកសួរអំពីជីវិតរស់នៅប្រចាំថ្ងៃ ការងារ ប្រាក់ចំណូល និងសេវាសាធារណៈ។ លោក ស៊ី បានសង្កត់ធ្ងន់ថា សមាជិកបក្ស និងមន្ត្រីត្រូវតែធ្វើការយ៉ាងសកម្ម ដើម្បីផ្តល់អត្ថប្រយោជន៍ជាក់ស្តែង ដោះស្រាយការលំបាក និងបង្កើនសុខុមាលភាព និងសន្តិសុខទូទៅរបស់ប្រជាជននៅជនបទ។

ដោយឆ្លុះបញ្ចាំងពីខួបលើកទី១០៥ នៃបក្សកុម្មុយនិស្តចិននៅថ្ងៃទី០១ខែកក្កដា លោក ស៊ី បានកត់សម្គាល់ពីសមិទ្ធផលប្រវត្តិសាស្ត្រដែលបក្សសម្រេចបាន។ លោកបានជំរុញឱ្យមានការខិតខំប្រឹងប្រែង និងការតាំងចិត្តរួមគ្នាលើដំណើរវែងឆ្ងាយថ្មី ឆ្ពោះទៅរកការកសាងប្រទេសសង្គមនិយមទំនើបមួយ។ នៅទីបំផុត លោកបានបញ្ជាក់សារជាថ្មីនូវការប្តេជ្ញាចិត្តរបស់បក្សក្នុងការបង្កើតអនាគតដ៏ភ្លឺស្វាង និងបន្តបំពេញសេចក្តីប្រាថ្នារបស់ប្រជាជនសម្រាប់ជីវិតកាន់តែប្រសើរឡើង៕

ដោយ៖ យា ចិន្ដាខន្ដី (ប្រភព៖ ឆាយណាដេលី)