AKP ភ្នំពេញ ថ្ងៃទី២០ ខែមិថុនា ឆ្នាំ២០២៦–

តំណាងកសិករមកពីបណ្តាខេត្តនានា ដែលបានចូលរួមក្នុងកម្មវិធីទិវាជំនួបអ្នកប្រើប្រាស់ ក្រោមប្រធានបទ៖ «ពង្រឹងការយល់ដឹងរបស់អ្នកប្រើប្រាស់អំពីកសិផលសុវត្ថិភាព ដែលផលិតតាមការអនុវត្តកសិអេកូឡូស៊ី» នៅសួនទន្លេវ៉ៃគោ ទីរួមខេត្តស្វាយរៀង ក្រោមការរៀបចំឡើងដោយបណ្តាញកសិអេកូឡូស៊ី ហៅកាត់ បណ្តាញ ALISEA រសៀលថ្ងៃទី២០ ខែមិថុនា ឆ្នាំ២០២៦ បានអញ្ជើញទៅទស្សនានៅកន្លែងប្រមូលផ្តុំកសិផល និងវេចខ្ចប់នៅមជ្ឈមណ្ឌលប្រមូលផ្តុំកសិផលស្វាយរៀង សម្រាប់ការនាំយកទៅលក់នៅផ្សារទំនើបអ៊ីអនទាំងបីទីតាំង រួមទាំងសាខារបស់ផ្សារមួយនេះចំនួនពីរទីតាំងផ្សេងទៀត ក្នុងរាជធានីភ្នំពេញ។

លោកស្រី រាជ សារ៉ី តំណាងសហគមន៍ផ្គត់ផ្គង់កសិផលស្វាយរៀង (សាក់) បានឱ្យដឹងថា សហគមន៍ត្រូវបានបង្កើតឡើងនៅថ្ងៃទី២១ ខែតុលា ឆ្នាំ២០១១ ដោយមានការជួយសម្របសម្រួល និងគាំទ្រពីសំណាក់អង្គការអ្នកស្ម័គ្រចិត្តអន្តរជាតិនៃយ៉ាម៉ាកាតា (អាយ.វី.វាយ) មន្ទីរកសិកម្ម រុក្ខាប្រមាញ់ និងនេសាទ និងមន្ទីរពាណិជ្ជកម្មខេត្តស្វាយរៀង រួមទាំងអង្គការដៃគូផ្សេងៗទៀត។ សហគមន៍បង្កើតឡើងក្នុងគោលបំណងដើម្បីជួយសម្រួលដល់ការដឹកនាំ និងគ្រប់គ្រងលើសកម្មភាពអាជីវកម្មកសិកម្ម ពិសេសក្នុងការទិញ និងលក់កសិផលរបស់កសិករឲ្យមានប្រសិទ្ធភាព។ បច្ចុប្បន្នសហគមន៍ផ្គត់ផ្គង់កសិផលស្វាយរៀង(សាក់) មានសមាជិកចំនួន ៣៤២គ្រួសារដែលមានភាគហ៊ុននៅក្នុងសហគមន៍។

លោកស្រី រាជ សារ៉ី បានថ្លែងថា សហគមន៍ផ្គត់ផ្គង់កសិផលស្វាយរៀង (សាក់) មានទស្សនៈវិស័យ និងបេសកកម្មធ្វើឲ្យកសិករក្លាយជាអ្នកដាំបន្លែអាជីព ចេះសហការគ្នាបានល្អ លក់ផលិតផលប្រកបដោយសុវត្ថិភាពនៅលើទីផ្សារ ដែលធានាបាននូវប្រាក់ចំណូលខ្ពស់។ ពង្រឹងសមត្ថភាពសមាជិកលើបច្ចេកទេសដាំដុះ និងផែនការផលិតកម្មតាមតម្រូវការទីផ្សារ ចងក្រងបណ្តាញអ្នកផលិតបន្លែ ដើម្បីធានាបាននូវបរិមាណ និងគុណភាព បង្កើនទំនាក់ទំនងល្អជាមួយដៃគូ និងអតិថិជន ដើម្បីពង្រីកទីផ្សារកសិផលជាដើម។

លោកស្រីថា សហគមន៍មានតួនាទីក្នុងការទទួលទិញកសិផលពីកសិករ រួមមាន បន្លែស្លឹក បន្លែផ្លែ បន្លែមើម រួចលក់បន្តទៅទីផ្សារ ដោយបច្ចុប្បន្នសហគមន៍មានការដឹកជញ្ជូនបន្លែទៅផ្គត់ផ្គង់ទីផ្សារទំនើបនានានៅភ្នំពេញមានផ្សារទំនើបអ៊ីអនជាដើម ដោយបន្លែទាំងនេះទទួលបានការគាំទ្រយ៉ាងខ្លាំងពីអតិថិជន ព្រោះវាជាបន្លែសុវត្ថិភាព គ្មានជាតិគីមី (មានវិញ្ញាបនបត្របញ្ជាក់) ផ្តល់នូវសុវត្ថិភាពខ្ពស់ និងមានអនា
ម័យត្រឹមត្រូវ។ ទន្ទឹមនេះ លោកស្រី រាជ សារ៉ី ក៏បានត្អូញត្អែរដែរថា សហគមន៍កំពុងជួបប្រទះនូវបញ្ហាប្រឈមមួយចំនួនដូចជា កង្វះប្រភពទឹកនៅរដូវប្រាំង និងការប្រែប្រួលអាកាសធាតុ (ខ្យល់ កំដៅថ្ងៃខ្លាំង) ជំនាញបច្ចេកទេសរបស់កសិករនៅមានកម្រិត ថ្លៃដើមផលិតខ្ពស់ កង្វះដើមទុន និងទីផ្សារមិនទាន់សូវមានលំនឹងជាដើម៕

ដោយ៖ ចាន់ សុភឿន