AKP ឧត្តរមានជ័យ ថ្ងៃទី១៨ ខែមិថុនា ឆ្នាំ២០២៦-- មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តឧត្តរមានជ័យ កាលពីថ្ងៃទី១៧ ខែមិថុនា ឆ្នាំ២០២៦ បើកកិច្ចប្រជុំបូកសរុបរបាយការណ៍បិទផ្សាយឯកសារវិនិច្ឆ័យទិន្នន័យក្បាលដី ក្នុងសង្កាត់បន្សាយរាក់ និងសង្កាត់កូនគ្រៀល ក្រុងសំរោង ខេត្តឧត្តរមានជ័យ ដោយកិច្ចប្រជុំដ៏មានសារៈសំខាន់នេះបានប្រព្រឹត្តទៅនៅសាលប្រជុំមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តឧត្តរមានជ័យ ក្រោមអធិបតីភាពលោក រិទ្ធី ប៉ាក់ អភិបាលរងនៃគណៈអភិបាលខេត្តឧត្តរមានជ័យ ដោយមានការចូលរួមពីប្រធានមន្ទីររៀបចំដែនដីខេត្ត ក្រុមការងារបច្ចេកទេសសុរិយោដី អាជ្ញាធរសង្កាត់បន្សាយរាក់ និងសង្កាត់កូនគ្រៀល ព្រមទាំងមន្ត្រីជំនាញពាក់ព័ន្ធជាច្រើនរូបទៀត។

លោក រិទ្ធី ប៉ាក់ បានថ្លែងថា ការជំរុញវឌ្ឍនភាពការងារចុះបញ្ជីដីធ្លីលក្ខណៈជាប្រព័ន្ធ និងការបិទផ្សាយឯកសារវិនិច្ឆ័យ គឺជាយន្តការគន្លឹះប្រកបដោយតម្លាភាព ក្នុងការធានានូវសិទ្ធិស្របច្បាប់ និងការកាត់បន្ថយទំនាស់ដីធ្លីជូនប្រជាពលរដ្ឋ។ ការពិនិត្យ ពិភាក្សា និងបូកសរុបលទ្ធផលជាក់ស្តែងដែលសម្រេចបាន ក្នុងដំណើរការបិទផ្សាយឯកសារវិនិច្ឆ័យទិន្នន័យក្បាលដី នៅក្នុងសង្កាត់ទាំង០២ កន្លងមក ធានាបាននូវភាពត្រឹមត្រូវ សុក្រឹត និងឆ្លើយតបទៅនឹងនីតិវិធីបច្ចេកទេសរបស់ក្រសួង មន្ទីរជំនាញ។ ពិនិត្យដោះស្រាយពាក្យបណ្តឹងតវ៉ា យន្តការប្រជុំនេះ ក៏បានផ្ទៀងផ្ទាត់លើការដាក់ពាក្យស្នើសុំកែតម្រូវទិន្នន័យ ឬពាក្យបណ្ដឹងតវ៉ានានារបស់ប្រជាពលរដ្ឋក្នុងអំឡុងពេលបិទផ្សាយ ដើម្បីឱ្យក្រុមការងារចម្រុះធ្វើការសម្របសម្រួល និងដោះស្រាយស្របតាមច្បាប់ភូមិបាល ធានាផលប្រយោជន៍ស្របច្បាប់ជូនម្ចាស់ដី។

លោកក៏បានជំរុញឱ្យក្រុមការងារបច្ចេកទេស និងរដ្ឋបាលក្រុង សង្កាត់ ត្រូវបន្តសហការគ្នាខ្ពស់ ក្នុងការរៀបចំសម្អាតទិន្នន័យចុងក្រោយឱ្យបានលឿន ដើម្បីពន្លឿនការចេញបណ្ណកម្មសិទ្ធិ (ប្លង់រឹង) ជូនបងប្អូនប្រជាពលរដ្ឋឱ្យបានឆាប់រហ័ស និងសូមថ្លែងអំណរគុណយ៉ាងជ្រាលជ្រៅចំពោះ មន្ទីររៀបចំដែនដីខេត្ត និងអាជ្ញាធរមូលដ្ឋានសង្កាត់ទាំង២ ដែលបានខិតខំប្រឹងប្រែងរួមគ្នាក្នុងបេសកកម្មចុះបញ្ជីដីធ្លីនេះ ហើយសូមអំពាវនាវដល់បងប្អូនប្រជាពលរដ្ឋ មេត្តាបន្តចូលរួមសហការតាមដានព័ត៌មាន ដើម្បីទទួលបានសិទ្ធិការពារដីធ្លីស្របច្បាប់ប្រកបដោយភាពកក់ក្តៅបំផុត៕

ដោយ ទិត ស្រ៊