AKP ភ្នំពេញ ថ្ងៃទី១៨ ខែមិថុនា ឆ្នាំ២០២៦ --
ឯកឧត្តម សុខ ប្រសិទ្ធិ ទីប្រឹក្សាផ្ទាល់ សម្តេចមហាបវរធីបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងជារដ្ឋលេខាធិការក្រសួងព័ត៌មាន នាព្រឹកថ្ងៃទី១៨ ខែមិថុនា ឆ្នាំ២០២៦ បានអញ្ជើញទស្សនកិច្ចនៅមន្ទីរពេទ្យ Thong Nhat និងចូលរួមកិច្ចប្រជុំជាមួយ លោកសាស្ត្រាចារ្យវេជ្ជបណ្ឌិត LE DINH THANH ប្រធានមន្ទីរពេទ្យ Thong Nhat នៅទីក្រុងហូជីមិញ ប្រទេសវៀតណាម ដើម្បីពង្រឹងទំនាក់ទំនងនៃការផ្លាស់ប្តូរ​​ កិច្ចសហប្រតិបត្តិការក្នុងវិស័យបណ្តុះបណ្តាលតាមរយៈអាហារូបករណ៍ ជំនាញសុខាភិបាល និងការគាំទ្រដល់អ្នកជំនាញវេជ្ជសាស្ត្រ ព្រមទាំងសេវាកម្មថែទាំសុខភាព និងកិច្ចសហប្រតិបត្តិការបន្ថែមរហូតឈានដល់ការចុះអនុស្សរណៈជាមួយគ្នា ដើម្បីទទួលបានសេវាកម្មវេជ្ជសាស្រ្តសម្រាប់មន្រ្តីក្រសួងព័ត៌មាន។

សូមបញ្ជាក់ផងដែរថា មន្ទីរពេទ្យ Thong Nhat ជាមន្ទីរពេទ្យពហុជំនាញឈានមុខគេ ដែលមានជំនាញខាងជំងឺមនុស្សចាស់ និងការថែទាំសរសៃឈាមបេះដូង ដែលមានមន្ទីរពិសោធន៍៤៥កន្លែង និងគ្រែចំនួន ៤០០ គ្រែ បានកើនឡើងដល់ជាង ១ ១៣២ គ្រែ ដោយមានគោលដៅឈានដល់ ១ ៣៥០ គ្រែ នៅដំណាច់ឆ្នាំ២០២៦នេះ និងមានអ្នកជំងឺមកពិនិត្យ និងព្យាបាល ចន្លោះប្រហែល ៥ ០០០នាក់ ក្នុង១ថ្ងៃ។ មន្ទីរពេទ្យនេះ ត្រូវបានបង្កើតឡើងនៅឆ្នាំ ១៩៧៥ បន្ទាប់ពីបញ្ចប់សង្គ្រាមនិងការបង្រួបបង្រួមប្រទេសវៀតណាម។ រីឯដើមកំណើតនៃមន្ទីរពេទ្យនេះ ពីមុនជាមន្ទីរពេទ្យ យោធា K71 ដែលធ្លាប់ជាមជ្ឈមណ្ឌល ដ៏សំខាន់ ក្នុងការព្យាបាលក្នុងអំឡុង   សង្គ្រាមត្រជាក់នៃប្រទេសវៀតណាម។

មន្ទីរពេទ្យ Thống Nhất ត្រូវបានគេចាត់ទុកថាជាមជ្ឈមណ្ឌលឈានមុខមួយសម្រាប់ការពិនិត្យនឹងព្យាបាលមនុស្សចាស់នៅភូមិភាគខាងត្បូងវៀតណាម ដោយសារចំនួនប្រជាជនវ័យចាស់បានកើនឡើងយ៉ាងឆាប់រហ័សក្នុងនោះផងដែរ មន្ទីរពេទ្យបានអភិវឌ្ឍន៍ជំនាញសំខាន់ៗក្នុងការព្យាបាលជំងឺជាច្រើនប្រភេទដែលជួបប្រទះជាញឹកញាប់ និង បន្តសិក្សាស្រាវជ្រាវដើម្បី ឱ្យក្លាយទៅជាមន្ទីរពេទ្យ ស្តង់ដារលេខ ១ របស់ប្រទេសវៀតណាម ។

ក្នុងឱកាសនេះដែរ ឯកឧត្តម បានអញ្ជើញលោកសាស្រ្តាចារ្យវេជ្ជបណ្ឌិត ប្រធានមន្ទីរពេទ្យ Thong Nhat មកទស្សនកិច្ចនៅប្រទេសកម្ពុជា ក្នុងគោលបំណងពង្រឹង ពង្រីកចំណងមិត្តភាព ផ្លាស់ប្ដូរ និងចែករំលែកបទពិសោធន៍គ្នាទៅវិញទៅមកជាមួយក្រសួងព័ត៌មាន ក្នុងកិច្ចជំនួបជាមួយ ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន និងក្រសួង ស្ថាប័ននានា ដែលជាសេនាធិការរបស់រាជរដ្ឋាភិបាល ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា៕

ដោយ៖ រិទ្ធី