AKP សៀមរាប ថ្ងៃទី១៨ ខែមិថុនា ឆ្នាំ២០២៦ -- ដើម្បីអបអរសាទរខួបលើកទី២៥០ នៃការបង្កើតសហរដ្ឋអាមេរិក ស្ថានទូតអាមេរិកប្រចាំនៅភ្នំពេញ និងមន្ត្រីការិយាល័យភាសាអង់គ្លេសថ្នាក់តំបន់នៃស្ថានទូតសហរដ្ឋអាមេរិកប្រចាំនៅហាណូយ សហការជាមួយអង្គការមូលនិធិអាស៊ី នៅព្រឹកថ្ងៃទី១៨ មិថុនា ២០២៦ នេះ បានធ្វើជាម្ចាស់ផ្ទះរៀបចំកិច្ចប្រជុំកំពូល សម្រាប់កម្មវិធីបង្រៀនអង់គ្លេស Access ថ្នាក់តំបន់នៅក្នុងខេត្តសៀមរាប។ ព្រឹត្តិការណ៍រយៈពេលបីថ្ងៃ នៅក្នុងខេត្តសៀមរាប ក្រោមប្រធានបទ “ការគិតគូរឡើងវិញ លើវិស័យអប់រំ» ដែលប្រមូលផ្តុំសិស្សានុសិស្ស និងលោកគ្រូ-អ្នកគ្រូ ដែលទទួលបានអាហារូបករណ៍ភាសាអង់គ្លេស ក្រោមកម្មវិធី Access មកពីប្រទេសកម្ពុជា ឡាវ វៀតណាម រួមទាំងអ្នកជំនាញវិស័យអប់រំ មកពីសហរដ្ឋអាមេរិក ដើម្បីបង្កើតបណ្តាញទំនាក់ ទំនងក្នុងតំបន់ ពង្រឹងសមត្ថភាពភាសា និងអភិវឌ្ឍន៍សមត្ថភាពដឹកនាំ។

កិច្ចប្រជុំកំពូលនេះផ្តោតសំខាន់លើការរៀនសូត្រតាមរយៈការអនុវត្តផ្ទាល់ និងវិធីសាស្ត្របង្រៀនបែបអាមេរិក ដោយបង្ហាញឱ្យឃើញពីទំនាក់ទំនងអប់រំ និងបង្កើនទំនាក់ទំនងប្រជាជនរវាងសហរដ្ឋអាមេរិក និងតំបន់អាស៊ីអាគ្នេយ៍។

លោក Benjamin Chiang ភារធារីនៃស្ថានទូតអាមេរិកប្រចាំនៅភ្នំពេញ បានមានប្រសាសន៍ថា ការជួបជុំគ្នានៅថ្ងៃនេះ គឺឆ្លុះបញ្ចាំងពីការប្តេជ្ញាចិត្តរួមគ្នារបស់យើងក្នុងការលើកកម្ពស់ឧត្តមភាពអប់រំ ពង្រឹងការបណ្តុះបណ្តាលសមត្ថភាពភាសា និងត្រៀមយុវជនជំនាន់ក្រោយ សម្រាប់ទីផ្សារការងារនាពេលអនាគត។ លោកបានលើកទឹកចិត្តដល់សិក្ខាកាមទាំងអស់ ឱ្យចេះចាប់យកឱកាសនេះ ដើម្បីពង្រឹងសមត្ថភាពភាសាអង់គ្លេស ជំនាញទំនាក់ទំនង និងជំនាញដឹកនាំរបស់ខ្លួន ព្រមទាំងចូលរួមយ៉ាងសកម្មក្នុងការស្វែងរកដំណោះស្រាយប្រកបដោយអត្ថន័យសម្រាប់សហគមន៍របស់ពួកគេ។

កម្មវិធីអាហារូបករណ៍ភាសាអង់គ្លេស Access បានគាំទ្រដល់អ្នកសិក្សាវ័យក្មេងរាប់ពាន់នាក់នៅទូទាំង តំបន់ តាមរយៈការបង្កើនឱកាស ដើម្បីទទួលបានការអប់រំភាសាអង់គ្លេស និងការបង្កើតឱកាសសម្រាប់ការរីកចម្រើនផ្នែកសិក្សាធិការ និងវិជ្ជាជីវៈ។ សិស្សានុសិស្ស នឹងចូលរួមក្នុងសកម្មភាពផ្សេងៗ មានដូចជាការអនុវត្តគម្រោងរួមគ្នា សិក្ខាសាលាស្តីពី ភាពជាអ្នកដឹកនាំ និងកម្មវិធីវប្បធម៌ ដែលរៀបចំឡើងដើម្បីជំរុញការតភ្ជាប់ទំនាក់ទំនងក្នុងតំបន់ និងការត្រៀមខ្លួនសម្រាប់ទីផ្សារការងារ។

ឯកឧត្តមបណ្ឌិត សោម រតនា អនុរដ្ឋលេខាធិការនៃក្រសួងអប់រំ យុវជន និងកីឡាកម្ពុជា បានមានប្រសាសន៍ថា អស់រយៈពេលជាច្រើនឆ្នាំមកនេះ ស្ថានទូតសហរដ្ឋអាមេរិកបានក្លាយជាដៃគូដែលមិនអាចខ្វះបាន ក្នុងការការពង្រឹងការអប់រំភាសាអង់គ្លេសនៅទូទាំងនៅប្រទេសកម្ពុជា តាមរយៈការបណ្តុះបណ្តាលគ្រូបង្រៀនការដាក់ឱ្យមានអ្នកជំនាញភាសាអង់គ្លេស (English Language Fellows) កម្មវិធីផ្លាស់ប្តូរ ការអប់រំ កម្មវិធីអភិវឌ្ឍន៍វិជ្ជាជីវៈ និងឱកាសរៀនសូត្រតាមអនឡាញដោយឥតគិតថ្លៃ (MOOCs)។ ការវិនិយោគដ៏យូរអង្វែងទាំងនេះ បានជួយកែលម្អការបង្រៀន និងការរៀនភាសាអង់គ្លេស ពង្រីកឱកាស អប់រំសម្រាប់យុវជនកម្ពុជា និងពង្រឹងចំណងមិត្តភាពរវាងប្រជាជន និងប្រជាជន ដែលបន្តតភ្ជាប់ប្រទេសយើងទាំងពីរ។

កម្មវិធី Access គឺជាកម្មវិធីមួយក្នុងចំណោមកម្មវិធីគាំទ្រដំបូងៗ ដែលបានផ្លាស់ប្តូរអនាគតរបស់យុវជននៅជុំវិញពិភពលោក តាមរយៈការផ្តល់ការអប់រំភាសាអង់គ្លេសប្រកបដោយគុណភាពដល់ សិស្សានុសិស្សដែលមកពីមជ្ឈដ្ឋានចម្រុះ។ សំខាន់ជាងនេះទៅទៀត កម្មវិធីនេះបានជួយឱ្យសិស្សអភិវឌ្ឍន៍ទំនុកចិត្ត ជំនាញភាពជាអ្នកដឹកនាំ សមត្ថភាពត្រិះរិះពិចារណា និងការយល់ដឹងកាន់តែទូលំទូលាយអំពី ពិភពលោក៕

ដោយ៖ ឃុត សៅ