AKP ភ្នំពេញ ថ្ងៃទី១៧ ខែមិថុនា ឆ្នាំ២០២៦ -- ប្រធានាធិបតីឥណ្ឌូណេស៊ីលោក ប្រាបូវ៉ូ ស៊ូប៊ីយ៉ាន់តូ បានជួបពិភាក្សាជាមួយប្រធានាធិបតីអាល្លឺម៉ង់លោក ហ្រ្វេន-វ៉លទ័រ ស្តេនមើញែរ នៅទីក្រុងហ្សាកាតា កាលពីថ្ងៃទី១៥ខែមិថុនា ឆ្នាំ២០២៦ ដែលក្នុងអំឡុងពេលនោះ ពួកគេបានបញ្ជាក់ពីការប្តេជ្ញាចិត្តរបស់ប្រទេសទាំងពីរក្នុងការពង្រឹងភាពជាដៃគូយុទ្ធសាស្ត្រ ក្នុងចំណោមទេសភាពពិភពលោកដែលកំពុងវិវឌ្ឍន៍យ៉ាងឆាប់រហ័ស។

ប្រទេសអាល្លឺម៉ង់បានពិពណ៌នាអំពីដំណើរទស្សនកិច្ចនេះថា ជាសញ្ញាដ៏រឹងមាំមួយនៃការប្តេជ្ញាចិត្តរយៈពេលវែងរបស់ទីក្រុងប៊ែរឡាំងចំពោះទំនាក់ទំនងជាមួយប្រទេសឥណ្ឌូណេស៊ី ដែលជាប្រទេសសេដ្ឋកិច្ចធំបំផុតរបស់តំបន់អាស៊ីអាគ្នេយ៍។ ចំណែកឯលោកប្រធានាធិបតី ប្រាបូវ៉ូ បានសង្កត់ធ្ងន់ថា ប្រទេសឥណ្ឌូណេស៊ីឱ្យតម្លៃខ្ពស់ចំពោះប្រទេសអាល្លឺម៉ង់ដែលជាដៃគូពាណិជ្ជកម្ម និងវិនិយោគដ៏សំខាន់បំផុតមួយរបស់ខ្លួននៅក្នុងសហភាពអឺរ៉ុប (EU)។

ក្នុងអំឡុងពេលនៃកិច្ចពិភាក្សារបស់ពួកគេ មេដឹកនាំទាំងពីរបានព្រមព្រៀងគ្នាពង្រឹងកិច្ចសហប្រតិបត្តិការក្នុងការអភិវឌ្ឍសេដ្ឋកិច្ច ការវិនិយោគ ការផ្លាស់ប្តូរថាមពល ការឆ្លើយតបទៅនឹងការប្រែប្រួលអាកាសធាតុ ការបណ្តុះបណ្តាលកម្លាំងពលកម្មជំនាញ និងការផ្លាស់ប្តូរវប្បធម៌។ ការសង្កត់ធ្ងន់ជាពិសេសត្រូវបានដាក់លើវិស័យយុទ្ធសាស្ត្រ ដែលជាចំណុចកណ្តាលនៃរបៀបវារៈអភិវឌ្ឍន៍របស់ប្រទេសឥណ្ឌូណេស៊ី រួមទាំងថាមពលកកើតឡើងវិញ ការកែច្នៃរ៉ែសម្រាប់ការផ្លាស់ប្តូរថាមពល និងការបង្កើនសមត្ថភាពឧស្សាហកម្ម។

ប្រទេសឥណ្ឌូណេស៊ីបានអំពាវនាវឱ្យប្រទេសអាល្លឺម៉ង់បន្តគាំទ្រដល់ការបញ្ចប់កិច្ចព្រមព្រៀងភាពជាដៃគូសេដ្ឋកិច្ចទូលំទូលាយរវាងប្រទេសឥណ្ឌូណេស៊ី និងសហភាពអឺរ៉ុប (IEU-CEPA) ដែលត្រូវបានគេរំពឹងថានឹងពង្រីកលំហូរពាណិជ្ជកម្ម និងវិនិយោគរវាងប្រទេសឥណ្ឌូណេស៊ី និងទីផ្សារអឺរ៉ុបយ៉ាងច្រើន។

ភាគីទាំងពីរក៏បានពិភាក្សាគ្នាអំពីកិច្ចសហប្រតិបត្តិការលើវិស័យរ៉ែជាយុទ្ធសាស្ត្រ ជាពិសេសរ៉ែនីកែល និងវត្ថុធាតុដើមសំខាន់ៗផ្សេងទៀត ដែលប្រើប្រាស់ក្នុងការផលិតអាគុយរថយន្តអគ្គិសនី។ ប្រធានាធិបតីឥណ្ឌូណេស៊ីបានសម្តែងក្តីសង្ឃឹមរបស់លោកក្នុងការទាក់ទាញការចូលរួមកាន់តែច្រើនពីបណ្តាក្រុមហ៊ុនអាល្លឺម៉ង់នៅក្នុងឧស្សាហកម្មកែច្នៃរ៉ែក្នុងស្រុក និងឧស្សាហកម្មបន្តបន្ទាប់ ជាជាងពឹងផ្អែកតែលើការនាំចេញវត្ថុធាតុដើម។ គំនិតផ្តួចផ្តើមនេះ គឺជាផ្នែកមួយនៃយុទ្ធសាស្ត្រទូលំទូលាយរបស់លោកប្រធានាធិបតី ប្រាបូវ៉ូ ដើម្បីពន្លឿនឧស្សាហូបនីយកម្មផ្អែកលើធនធាន។

នៅខាងក្រៅដំណើរទស្សនកិច្ចនេះ គណៈប្រតិភូនៃថ្នាក់ដឹកនាំធុរកិច្ចអ្នកស្រាវជ្រាវ និងអ្នកតំណាងវប្បធម៌អាល្លឺម៉ង់ បានស្វែងយល់ពីឱកាសភាពជាដៃគូថ្មីៗក្នុងវិស័យភស្តុភារកម្ម ការផ្លាស់ប្តូរឌីជីថល បច្ចេកវិទ្យាបៃតងនិងការអភិវឌ្ឍធនធានមនុស្ស៕

ដោយ៖ យា ចិន្ដាខន្ដី (ប្រភព៖ VNA)