AKP ភ្នំពេញ ថ្ងៃទី១៧ ខែមិថុនា ឆ្នាំ២០២៦ -- ប្រទេសឥណ្ឌូណេស៊ីមានគោលបំណងលុបបំបាត់ករណីស្លាប់ដែលទាក់ទងនឹងជំងឺគ្រុនឈាមនៅត្រឹមឆ្នាំ២០៣០ ក្រោមផែនការសកម្មភាពជាតិឆ្នាំ២០២៦-២០២៩ របស់ខ្លួនសម្រាប់ការគ្រប់គ្រងជំងឺគ្រុនឈាម។

ថ្លែងនៅក្នុងទិវាជំងឺគ្រុនឈាមអាស៊ានឆ្នាំ២០២៦ (ថ្ងៃទី១៥ ខែមិថុនា) អគ្គនាយកស្តីទីទទួលបន្ទុកបង្ការ និងគ្រប់គ្រងជំងឺ នៃក្រសួងសុខាភិបាលឥណ្ឌូណេស៊ី លោក អេនឌី សាហ្គូនី បាននិយាយថា ជំងឺគ្រុនឈាមនៅតែជាបញ្ហាប្រឈមផ្នែកសុខភាពសាធារណៈដ៏សំខាន់បំផុតមួយរបស់ប្រទេស។

ទិន្នន័យពីក្រសួងបានបង្ហាញថា ប្រទេសឥណ្ឌូណេស៊ីមានបន្ទុកជំងឺគ្រុនឈាមខ្ពស់បំផុតនៅតំបន់អាស៊ីអាគ្នេយ៍ និងជាប់ចំណាត់ថ្នាក់លេខពីរនៅទូទាំងពិភពលោកទាក់ទងនឹងចំនួនករណីឆ្លងដែលត្រូវបានរាយការណ៍។ នៅឆ្នាំ២០២៥ ប្រទេសនេះបានកត់ត្រាការឆ្លងប្រហែល១៦១.០០០ករណី និងការស្លាប់ជាង ៦០០នាក់។ រហូតមកដល់ពេលនេះនៅក្នុងឆ្នាំ២០២៦ មានករណីឆ្លងជិត ៤០.០០០ករណី និងការស្លាប់ចំនួន១០៥នាក់ត្រូវបានរាយការណ៍ ដោយខេត្តជ្វាខាងលិចជាខេត្តដែលរងផលប៉ះពាល់ខ្លាំងបំផុត ដោយកត់ត្រាករណីឆ្លងជាង ៩.៥០០ករណី។

លោកស្រី ព្រីម៉ា យ៉ូសេហ្វីន ប្រធានផ្នែកជំងឺឆ្លង បាននិយាយថាប្រទេសឥណ្ឌូណេស៊ីមានចំនួនប្រហែល ៣% នៃករណីជំងឺគ្រុនឈាមទូទាំងពិភពលោក ប៉ុន្តែមានចំនួន ១៧% នៃការស្លាប់ដោយសារជំងឺគ្រុនឈាមទូទាំងពិភពលោកក្នុងឆ្នាំ២០២៥។

យុទ្ធសាស្ត្ររបស់ប្រទេសនេះត្រូវបានបង្កើតឡើងដោយផ្អែកលើសសរស្តម្ភសំខាន់ៗចំនួនបួន ដែលរួមមាន ការរកឃើញ និងការធ្វើរោគវិនិច្ឆ័យដំបូង លទ្ធផលនៃការព្យាបាលដែលប្រសើរឡើង ការពង្រឹងការបង្ការ និងការឃ្លាំមើល និងការឆ្លើយតបយ៉ាងឆាប់រហ័សចំពោះការផ្ទុះឡើងនៃជំងឺ។ វិធានការគាំទ្ររួមមាន ការបង្កើនសមត្ថភាពថែទាំសុខភាពការពង្រីកភាពជាដៃគូ និងហិរញ្ញប្បទាន ការលើកកម្ពស់ការស្រាវជ្រាវបច្ចេកវិទ្យា និងនវានុវត្តន៍ ការគ្រប់គ្រងវ៉ិចទ័រមូស និងការបង្កើនការយល់ដឹងរបស់សាធារណជន៕

ដោយ៖ យា ចិន្ដាខន្ដី (ប្រភព៖ VNA)