AKP ភ្នំពេញ ថ្ងៃទី១៧ ខែមិថុនា ឆ្នាំ២០២៦--ឯកឧត្តមបណ្ឌិត សោម រតនា អនុរដ្ឋលេខាធិការក្រសួងអប់រំ យុវជន និងកីឡា និងជាជនបង្គោលថ្នាក់ជាតិសម្រាប់កម្មវិធីអាហារូបករណ៍ Erasmus+ ថ្លែងថា សហភាពអឺរ៉ុប (EU) តែងតែជាដៃគូអភិវឌ្ឍន៍ដ៏សំខាន់សម្រាប់វិស័យអប់រំនៅកម្ពុជា តាមរយៈការផ្ដើមអាហារូបករណ៍នានា ជាអាទិ៍ អាហារូបករណ៍ Erasmus+  ដើម្បីឲ្យនិស្សិតកម្ពុជាអាចអភិវឌ្ឍន៍សមត្ថភាពខ្លួនឯង ក្លាយជាមូលធនមនុស្សដ៏មានតម្លៃសម្រាប់អភិវឌ្ឍន៍ប្រទេសជាតិទៅថ្ងៃអនាគត។

ក្នុងពិធីបើកសិក្ខាសាលាផ្សព្វផ្សាយព័ត៌មានស្តីពីអាហារូបករណ៍អឺរ៉ុប និងកម្មវិធី Erasmus+ នៅសាកលវិទ្យាល័យជាតិជាស៊ីមកំចាយមារ ខេត្តព្រៃវែង ថ្ងៃទី១៦ ខែមិថុនា ឆ្នាំ២០២៦ ឯកឧត្តមបណ្ឌិត សោម រតនា បានថ្លែងអំណរគុណយ៉ាងជ្រាលជ្រៅចំពោះភាគីពាក់ព័ន្ធទាំងអស់ ដែលបានអញ្ជើញចូលរួមក្នុងពិធីនេះ ជាពិសេសចំពោះកិច្ចសហការពីសំណាក់ ឯកឧត្តមបណ្ឌិត សិត ខន សាកលវិទ្យាធិការ នៃសាកលវិទ្យាល័យជាតិជាស៊ីមកំចាយមារ ក្នុងការរៀបចំយុទ្ធនាការផ្សព្វផ្សាយអាហារូបករណ៍អឺរ៉ុបនេះឡើង និងបានចាត់ទុកសហភាពអឺរ៉ុប (EU) ថាជាដៃគូអភិវឌ្ឍន៍ដ៏សំខាន់សម្រាប់វិស័យអប់រំនៅកម្ពុជា តាមរយៈការផ្ដើមអាហារូបករណ៍នានា ជាអាទិ៍ អាហារូបករណ៍ Erasmus+ នេះ ដើម្បីឲ្យនិស្សិតកម្ពុជា អាចអភិវឌ្ឍន៍សមត្ថភាពខ្លួនឯង ក្លាយជាមូលធនមនុស្សដ៏មានតម្លៃសម្រាប់អភិវឌ្ឍន៍ប្រទេសជាតិទៅថ្ងៃអនាគត។

សូមបញ្ជាក់ថា សិក្ខាសាលាផ្សព្វផ្សាយព័ត៌មានស្តីពីអាហារូបករណ៍អឺរ៉ុប និងកម្មវិធី Erasmus+នេះធ្វើឡើងក្នុងគោលបំណង៖ ១. បង្កើនការយល់ដឹងក្នុងចំណោមសិស្សនិស្សិតកម្ពុជាកម្រិតឧត្តមសិក្សា និងឱកាសទទួលបានអាហារូបករណ៍តាមរយៈកម្មវិធី Erasmus+ និងរដ្ឋសមាជិកអឺរ៉ុប ២. បង្កើនការយល់ដឹងកាន់តែស៊ីជម្រៅពីសហភាពអឺរ៉ុប ក៏ដូចជាការប្តេជ្ញាចិត្តរបស់អឺរ៉ុបក្នុងការគាំទ្រដល់ការអប់រំជាសកល ការផ្លាស់ប្តូរវប្បធម៌ និងកិច្ចសហប្រតិបត្តិការអន្តរជាតិ ៣. ជំរុញសមធម៌ និងបរិយាបន្នក្នុងការទទួលបានអាហារូបករណ៍ ដោយធានាថា សិស្សានុសិស្សនៅតាមបណ្តាខេត្ត ក៏មានឱកាសស្មើគ្នាក្នុងការទទួលបានព័ត៌មាន និងអាហារូបករណ៍ដូចសិស្សនៅរាជធានីភ្នំពេញដែរ និង ៤. ពង្រឹងភាពជាដៃគូស្ថាប័ន រវាងគ្រឹះស្ថានឧត្តមសិក្សាកម្ពុជា និងបណ្តាញគ្រឹះស្ថានសិក្សារបស់អឺរ៉ុប ដើម្បីគាំទ្រដល់កម្មវិធីកិច្ចសហប្រតិបត្តិការ និងការផ្លាស់ប្តូរបទពិសោធន៍ទៅថ្ងៃអនាគត៕

ដោយ៖ ចាន់ សុភឿន (ប្រភព៖ ក្រសួងអប់រំ)