AKP ភ្នំពេញ ថ្ងៃទី១៧ ខែមិថុនា ឆ្នាំ២០២៦--ថ្នាក់ដឹកនាំអគ្គលេខាធិការដ្ឋានអាជ្ញាធរទន្លេសាប និងមន្ត្រីបច្ចេកទេស ព្រមទាំងអាជ្ញាធរដែនដីស្រុក ឃុំ ភូមិ និងភូមិបាលស្រុក នៅថ្ងៃទី១៦ ខែមិថុនា ឆ្នាំ ២០២៦ បានចុះពិនិត្យដំណើរការការងារសាងសង់បង្គោលព្រំដីតំបន់កាត់ឆ្វៀល ជំហានទី១ ស្ថិតនៅក្នុងភូមិសាស្ត្រស្រុកក្រគរ និងស្រុកកណ្តៀង នៃខេត្តពោធិ៍សាត់ ដែលមានបង្គោលសរុបចំនួន ៦៥០បង្គោល។ 

បង្គោលព្រំដីតំបន់កាត់ឆ្វៀលនេះ ជាប្រភេទបង្គោលជើងមួយ កម្ពស់៣ម៉ែត្រពីដី ទំហំ ៣សង់ទីម៉ែត្រ គុណ ៣សង់ទីម៉ែត្រ និងមានក្បាលពណ៌ផ្ទៃមេឃ ដែលជាបង្គោលបង្ហាញច្បាស់ពីព្រំប្រទល់ដីតំបន់កាត់ឆ្វៀលជូនប្រជាពលរដ្ឋ និងដីតំបន់ហាមឃាត់ តំបន់៣ ច្បាស់លាស់ និងងាយស្រួលក្នុងចុះត្រួតពិនិត្យ តាមដាន ក្នុងការទប់ស្កាត់ការបន្តចូលអាស្រ័យផល និងទន្ទ្រានយកដីតំបន់៣។ ក្រុមការងារនេះបានចុះតាមដានជាប្រចាំ ដើម្បីចូលរួមទប់ស្កាត់សកម្មភាពបទល្មើសផ្សេងៗ ដែលកើតមានឡើងនៅជុំវិញបឹងទន្លេសាប ពិសេសការចូលបន្តអាស្រ័យផលក្នុងតំបន់៣ ការដុតព្រៃ និងឈូសឆាយព្រៃក្នុងគោលបំណងកាត់កាប់ដីក្នុងតំបន់៣ ដោយខុសច្បាប់របស់ជនខិលខូច ក្រោមរូបភាពផ្សេងៗជាច្រើនទៀត ។

សូមជម្រាបថា បច្ចុប្បន្នការងារសាងសង់ បង្គោលព្រំជំហានទី១នេះ សម្រេចបានប្រមាណ ៩០ភាគរយ តាមផែនការគ្រោងទុក ហើយនឹងត្រូវបញ្ចប់នៅចុង ខែមិថុនា ឆ្នាំ២០២៦នេះ ៕

ដោយ៖ ណយ នឿន (ប្រភព៖អាជ្ញាធរទន្លេសាប)