AKP ភ្នំពេញ ថ្ងៃទី១៧ ខែមិថុនា ឆ្នាំ២០២៦--ដើម្បីអបអរសាទរខួប ២៥០ឆ្នាំ នៃការកកើតសហរដ្ឋអាមេរិក លោក Benjamin Chiang ភារធារីប្រចាំស្ថានទូតអាម៉េរិកនៅកម្ពុជា បានអញ្ជើញចូលរួមក្នុងពិធីបើកសម្ពោធជាផ្លូវការ នូវ «ពិព័រណ៍សារមន្ទីរស្ថាបនិក សេរីភាព ២៥០ ឆ្នាំ» នាថ្ងៃទី១៦ ខែមិថុនា ឆ្នាំ២០២៦ នៅមជ្ឈមណ្ឌល AmCam Exchange ដែលមានទីតាំង ស្ថិតនៅក្នុងផ្សារទំនើប Exchange Square ក្នុងរាជធានីភ្នំពេញ។ កម្មវិធីនេះ ក៏មានការអញ្ជើញចូលរួមពី ភ្ញៀវកិត្តិយសដ៏ខ្ពង់ខ្ពស់ គឺឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ រួមជាមួយតំណាងមកពីក្រសួងវប្បធម៌ និងវិចិត្រសិល្បៈ និងក្រសួងអប់រំ យុវជន និងកីឡា។ នេះបើយោងតាមសេចក្ដីប្រកាសព័ត៌មានរបស់ស្ថានទូតអាម៉េរិកប្រចាំនៅកម្ពុជា។

ក្នុងសេចក្ដីប្រកាសព័ត៌មានបានបញ្ជាក់ថា ពិព័រណ៍ស្ថាបនិកនេះ គឺជាគំនិតផ្តួចផ្តើមរបស់សេតវិមាន ដែលជាពិព័រណ៍អប់រំបែបអន្តរកម្ម បង្ហាញនូវប្រវត្តិសាស្ត្រ និងវប្បធម៌អាម៉េរិក បែបរស់រវើក។ ពិព័រណ៍នេះ ក៏មានដាក់បង្ហាញនូវការប្រមូលផ្តុំយ៉ាងសម្រិតសម្រាំង ដែលរំលេចឱ្យឃើញពីក្រុមស្ថាបនិកជាតិ ព្រឹត្តិការណ៍ប្រវត្តិសាស្ត្រសំខាន់ៗ និងវីរបុរសជនជាតិ អាម៉េរិក ដែលភាពដឹកនាំ និងការច្នៃប្រឌិតរបស់ពួកគាត់ នៅតែបន្តជំរុញដំណើរនវានុវត្តន៍ របស់សហរដ្ឋអាមេរិក។ កម្មវិធីនេះ ប្រើប្រាស់បច្ចេកវិទ្យាទំនើប ដើម្បីញ៉ាំងដំណើរការពិពណ៌នា ឱ្យកាន់តែមានភាពសម្បូរបែប ដែលអ្នកចូលរួមអាចស្កែន QR កូដ តាមរយៈទូរសព្ទរបស់ពួកគេ ដើម្បីទស្សនាវីដេអូបែបគំនូរ ជីវចល ដែលតួអង្គជនជាតិអាម៉េរិកនីមួយៗ ចែករំលែកពីប្រវត្តិផ្ទាល់ខ្លួនរបស់ពួកគាត់។

លោកភារធារី Benjamin Chiang មានប្រសាសន៍ថា៖ «យើងមានសេចក្តីសោមនស្សរីករាយយ៉ាងខ្លាំង ក្នុងការនាំយកពិព័រណ៍សារមន្ទីរស្ថាបនិកនេះមកកាន់ប្រទេសកម្ពុជា ដែលជាសសរស្តម្ភដ៏សំខាន់មួយនៃ ការអបអរសាទរ “សេរីភាព ២៥០- Freedom 250 របស់យើង។ ពិព័រណ៍នេះ ផ្តល់នូវវិធីសាស្ត្រប្លែកមួយ ដើម្បីទាក់ទាញ ទស្សនិកជននៅកម្ពុជា ដើម្បីស្វែងយល់ពីបុគ្គល និងគំនិតនានាដែលនាំឱ្យមានការបង្កើតសហរដ្ឋអាមេរិកឡើង ក៏ដូចជាស្វែងយល់ពីហេតុផលដែល ឧត្តមភាពរបស់អាម៉េរិកនៅតែឥទ្ធិពល ក្នុងការលើកទឹកចិត្តមនុស្សជុំវិញពិភពលោក»។

សូមជម្រាបជូនថា ការបើកសម្ពោធពិព័រណ៍ដ៏ធំនេះ គឺជាចំណុចរបត់ដ៏សំខាន់មួយនៅក្នុងយុទ្ធនាការអបអរសាទរ «សេរីភាព២៥០» របស់ស្ថានទូតអាម៉េរិក ដើម្បីបង្ហាញពីឧត្តមភាពរបស់សហរដ្ឋអាមេរិក រម្លឹកអំពីប្រវត្តិសាស្ត្រអាម៉េរិក និងអបអរសាទរសមិទ្ធផលនានា ដ៏យូរអង្វែងរបស់សហរដ្ឋអាមេរិក។ 

សម្រាប់ពិព័រណ៍ស្ថាបនិកអាម៉េរិក នឹងបន្តដាក់បង្ហាញនៅមជ្ឈមណ្ឌល AmCam Exchange ក្នុងរាជធានីភ្នំពេញ រយៈពេលពីរសប្តាហ៍ មុនផ្លាស់ទីទៅដាក់តាំងបង្ហាញ នៅឯបណ្ណាល័យអាម៉េរិក ដែលមាននៅក្នុងខេត្ត សៀមរាប បាត់ដំបង និងខេត្ដកំពង់ចាម៕

ដោយ៖ រិទ្ធី