AKP តាកែវថ្ងៃទី១៧ ខែមិថុនាឆ្នាំ២០២៦--ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគ ណៈកម្មាធិការសាខាកាកបាទក្រហមកម្ពុជាខេត្តតាកែវ បានអញ្ជើញចុះសួរ សុខទុក្ខ និងបាននាំយកអំណោយមនុ ស្សធម៌ របស់សាខាកាកបាទក្រហមកម្ពុជាខេត្តតាកែវ ចែកជូនដល់គ្រួសារប្រជាពលរដ្ឋរងគ្រោះចំនួន៤៩គ្រួសារ ដែលរងគ្រោះដោយគ្រោះធម្មជាតិខ្យល់កន្ត្រាក់ កាលពីពេលថ្មីៗកន្លងទៅនៅស្រុកសំរោងខេត្តតាកែវ។

អញ្ជើញចូលរួមក្នុងពិធីនោះដែរដោយលោក លោកស្រីអនុប្រធាន សមាជិក សមាជិកាសាខាកាកបាទក្រហមកម្ពុជាខេត្តតាកែវ ប្រធាន អនុប្រធាន សមាជិក សមាជិកាអនុសាខាកាកបាទក្រហមកម្ពុជាស្រុកសំរោង និងបងប្អូនប្រជាព លរដ្ឋរងគ្រោះទាំង៤៩គ្រួសារចូលរួមផងដែរ។ពិធីនេះរៀបចំឡើងនៅក្នុងឃុំបឹងត្រាញ់ខាងត្បូងស្រុកសំរោងខេត្តតាកែវ កាលពីរសៀលថ្ងៃទី១៦ខែមិថុនាឆ្នាំ២០២៦។

មានប្រសាសន៍សំណេះសំណាលក្នុងឱកាសនោះ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានពាំនាំនូវការផ្ដាំផ្ញើរសួរសុខទុក្ខ ពីសំណាក់ ឯកឧត្តមបណ្ឌិត ជា វ៉ាន់ដេត ប្រធានកិត្តិយសសាខាកាកបាទក្រហមកម្ពុជាខេត្តតាកែវ ពិសេសពីសំណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្ដេចតែងតែយកចិត្តទុកដាក់គិតគូរខ្ពស់ដល់សុខទុក្ខ និងជីវភាពរស់នៅ របស់បងប្អូនប្រជាពលរដ្ឋដែលរងគ្រោះ និងងាយរងគ្រោះគ្រប់ប្រភេទ នៅគ្រប់ទីកន្លែង ដោយមិនប្រកាន់និន្នាការនយោបាយ ពូជសាសន៍ ឬសាសនាអ្វីឡើយ ស្របតាមទិសស្លោក "ទីណាមានការលំបាកទីនោះមានកាកបាទក្រហមកម្ពុជា"។

ឯកឧត្តម វ៉ី សំណាង បានមានប្រសាស ន៍បន្តថា គ្រោះធម្មជាតិនេះវាអាចកើតឡើងគ្រប់ពេលវេលាទាំងអស់ ដែលទាមទារឱ្យអាជ្ញាធរស្រុក-ឃុំ-ភូមិ ត្រូវត្រៀមកម្លាំងប្រជាការពាររួមនឹងកម្លាំងសមត្ថកិច្ច ជួយសង្គ្រោះប្រជាពលរដ្ឋឱ្យបានទាន់ពេលវេលា។ជាពិសេសប្រសិនបើពួកគាត់ជួបគ្រោះថ្នាក់ខ្យល់កន្ត្រាក់រលំផ្ទះ ត្រូវតែសហការគ្នាក្នុងការជួយជួសជុលផ្ទះជូនពួកគាត់ភ្លាម កុំទុកឱ្យពួកគាត់រស់នៅក្នុងសភាព គ្មានជំរកស្នាក់អាស្រ័យឱ្យសោះ។ប្រជាពលរដ្ឋមានទុក្ខលំបាកក្នុងជីវភាព ឬជួបគ្រោះធម្មជាតិ ក្នុងនាមយើងជាមន្ត្រីដែលជាអ្នកបម្រើប្រជាពលរដ្ឋ ពិសេសមន្ត្រីកាកបាទក្រហម ត្រូវតែចុះជួយប្រជាពលរដ្ឋភ្លាមៗ កុំទុកឱ្យពួកគាត់មានជីវភាពខ្វះខាត កាន់តែធ្ងន់ធ្ងរជាងនេះ។ពោលគឺត្រូវជួយដោះស្រាយទុក្ខលំបាករបស់ពួកគាត់ឱ្យបាន ដោយធ្វើយ៉ាងណាឱ្យប្រជាពលរដ្ឋរងគ្រោះ និងងាយរងគ្រោះ រស់នៅមានជីវភាពសមរម្យគ្រប់គ្រាន់។

ឯកឧត្តម វ៉ី សំណាង ក៏បានអំពាវនាវដល់បងប្អូនប្រជាពលរដ្ឋ ត្រូវដាំដើមឈើនៅជុំវិញផ្ទះឱ្យបានច្រើនពិសេសឈើហូបផ្លែ។ដើម្បីជារបាំងជួយការពារគ្រោះធម្មជាតិខ្យល់កន្ត្រាក់បានមួយចំណែក និងម្យ៉ាងទៀតពេលឈើហូបផ្លែមានផ្លែផ្កា យើងអាចបរិភោគឬយកទៅលក់យកប្រាក់កម្រៃ មកដោះស្រាយជីវភាពបានកាន់តែធូរធារ។ដោយឡែកអាជ្ញាធរមូលដ្ឋាន ត្រូវស្វែងរកទីទួលសុវត្ថិភាព ដើម្បីជន្លៀសប្រជាពលរដ្ឋពេលមានគ្រោះអាសន្នកើតឡើង។ត្រូវត្រៀមលក្ខណៈឱ្យបានគ្រប់គ្រាន់ សម្រាប់ជួយសង្គ្រោះបងប្អូនប្រជាពលរដ្ឋ ឱ្យបានទាន់ពេលវេលា។

អំណោយដែលបានចែកជូនបងប្អូនប្រជាពលរដ្ឋរងគ្រោះ ដោយខ្យល់កន្ត្រាក់ ទាំង49គ្រួសារក្នុងពេលនោះ ដោយមួយគ្រួសារៗទទួលបាន៖ អង្ករ25គីឡូក្រាម មី1កេស ត្រីខ កំប៉ុង1យួរ ប្រេងឆា1លីត្រ នំកញ្ចប់ធំ1 ទឹកត្រី3ដប ទឹកស៊ីអ៊ីវ3ដប កន្ទេល1 មុង1 ភួយ1 សារុង1 ក្រម៉ា1 និងថវិកាចំនួន2ម៉ឺនរៀលផងដែរ៕

ដោយ៖ អ៊ុច សៀង