AKP ភ្នំពេញ ថ្ងៃទី១៦ ខែមិថុនា ឆ្នាំ២០២៦--លោក ថាច់ សុវណ្ណា ប្រធាននាយកដ្ឋានគ្រប់គ្រង និងអភិរក្សធនធានទឹកនៃក្រសួងធនធានទឹក និងឧតុនិយម បានអញ្ជើញដឹកនាំសិក្ខាសាលាស្តីពី «ការផ្សព្វផ្សាយច្បាប់ស្ដីពីការគ្រប់គ្រងធនធានទឹក និងអនុក្រឹត្យស្ដីពីការគ្រប់គ្រងអាងទន្លេ នៃព្រះរាជាណាចក្រកម្ពុជា» នៅសណ្ឋាគារអង្គរមាស ខេត្តស្ទឹងត្រែងនាថ្ងៃអង្គារទី១៦ ខែមិថុនា ឆ្នាំ២០២៦ នេះ ។

សិក្ខាសាលានេះ រៀបចំឡើងដោយនាយកដ្ឋានគ្រប់គ្រង និងអភិរក្សធនធានទឹក នៃក្រសួងធនធានទឹក និងឧតុនិយម ដោយមានការអញ្ជើញចូលរួមពី លោក ទូច គង្គា អភិបាលរង នៃគណៈអភិបាលខេត្តស្ទឹងត្រែង ព្រមទាំងមន្រ្តីរាជការនៃមន្ទីរធនធានទឹក និងឧតុនិយមខេត្តស្ទឹងត្រែង មេឃុំ តំណាងសហគមន៍កសិករប្រើប្រាស់ទឹក និងមន្រ្តីកសិកម្មឃុំ ។

សិក្ខាសាលានេះរៀបចំឡើងក្នុងគោលបំណងលើកកម្ពស់ការយល់ដឹងអំពីក្របខ័ណ្ឌច្បាប់ គោលការណ៍គ្រប់គ្រង និងយន្តការអភិរក្សធនធានទឹកប្រកបដោយចីរភាព។ បន្ថែមលើនេះ សិក្ខាសាលាក៏មានគោលដៅពង្រឹងការយល់ដឹងដល់មន្ត្រីជំនាញ និងភាគីពាក់ព័ន្ធ អំពីតួនាទី ភារកិច្ច និងការទទួលខុសត្រូវក្នុងការគ្រប់គ្រង ប្រើប្រាស់ ការពារ និងអភិរក្សធនធានទឹក ដែលជាធនធានធម្មជាតិដ៏មានសារៈសំខាន់បំផុតសម្រាប់ជីវភាពរស់នៅរបស់ប្រជាពលរដ្ឋ ក៏ដូចជាការអភិវឌ្ឍវិស័យសេដ្ឋកិច្ច កសិកម្ម បរិស្ថាន និងប្រព័ន្ធអេកូឡូស៊ី។
តាមរយៈច្បាប់ស្ដីពីការគ្រប់គ្រងធនធានទឹកនេះ បានកំណត់គោលការណ៍សំខាន់ៗសម្រាប់ការគ្រប់គ្រងធនធានទឹកឱ្យមានប្រសិទ្ធភាព រួមមាន៖ ការរៀបចំផែនការ ការប្រើប្រាស់ទឹកដោយសមស្រប ការការពារគុណភាពទឹក និងការចូលរួមពីគ្រប់ភាគីពាក់ព័ន្ធ។

ដោយឡែក អនុក្រឹត្យស្ដីពីការគ្រប់គ្រងអាងទន្លេ គឺផ្តោតលើការគ្រប់គ្រងធនធានទឹកតាមប្រព័ន្ធអាងទន្លេ ដើម្បីធានាបាននូវការសម្របសម្រួល និងការប្រើប្រាស់ទឹកប្រកបដោយតុល្យភាព។ការផ្សព្វផ្សាយឯកសារច្បាប់ទាំងនេះ គឺជាជំហានដ៏សំខាន់ក្នុងការជំរុញការអនុវត្ត «ការគ្រប់គ្រងធនធានទឹកចម្រុះ» (Integrated Water Resources Management - IWRM) ដោយពង្រឹងកិច្ចសហការរវាងស្ថាប័នពាក់ព័ន្ធ អាជ្ញាធរមូលដ្ឋាន និងសហគមន៍ ដើម្បីឆ្លើយតបទៅនឹងបញ្ហាប្រឈមនានា ដូចជា ការប្រែប្រួលអាកាសធាតុ គ្រោះរាំងស្ងួត ទឹកជំនន់ និងតម្រូវការប្រើប្រាស់ទឹកដែលកំពុងមានការកើនឡើង។

ក្រសួងធនធានទឹក និងឧតុនិយម តែងតែបង្ហាញការប្ដេជ្ញាចិត្តយ៉ាងមុតមាំក្នុងការបន្តជំរុញការផ្សព្វផ្សាយ ការអនុវត្តន៍ច្បាប់ និងពង្រឹងកិច្ចសហការជាមួយគ្រប់ភាគីពាក់ព័ន្ធទាំងអស់ ដើម្បីធានាថា ធនធានទឹករបស់ព្រះរាជាណាចក្រកម្ពុជា ត្រូវបានគ្រប់គ្រង អភិរក្ស និងប្រើប្រាស់ប្រកបដោយប្រសិទ្ធភាព សមធម៌ និងចីរភាព សម្រាប់មនុស្សគ្រប់ជំនាន់៕

ដោយ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)