AKP ត្បូងឃ្មុំ ថ្ងៃទី១៥ ខែមិថុនា ឆ្នាំ២០២៦-- លោក ម៉ៅ ឌុង អភិបាលរងខេត្តត្បូងឃ្មុំ តំណាងឯកឧត្ដម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ រួមជាមួយឯកឧត្តម ឧត្តមសេនីយ៍ឯក អ៊ុកចាយ បញ្ញារ៉ា អគ្គនាយករងនៃអគ្គនាយកដ្ឋានអត្តសញ្ញាណកម្ម និងជាប្រធានក្រុមការងារតាមដាន និងជំរុញការផ្តល់ឯកសារអត្តសញ្ញាណតាមភូមិភាគ (ភូមិភាគ២) នាព្រឹកថ្ងៃចន្ទ ទី១៥ ខែមិថុនា ឆ្នាំ២០២៦ បានអញ្ជើញជាអធិបតីក្នុងកិច្ចប្រជុំដ៏សំខាន់មួយ ស្តីពី «ការជំរុញផ្តល់ឯកសារបញ្ជាក់អត្តសញ្ញាណជូនប្រជាពលរដ្ឋខ្មែរ ដែលទើបវិលត្រឡប់ពីប្រទេសថៃ និងប្រជាពលរដ្ឋខ្មែរដែលពុំទាន់មានឯកសារគ្រប់គ្រាន់»។

 កិច្ចប្រជុំនេះបានប្រារព្ធធ្វើឡើងនៅសាលាប្រជុំ (ខ) ជាន់ទី២ នៃសាលាខេត្តត្បូងឃ្មុំ ដោយមានការអញ្ជើញចូលរួមពីលោក ភោក កិត្យា នាយករងរដ្ឋបាលសាលាខេត្ត លោក ឈិន ចាន់ទី នាយករងទីចាត់ការរដ្ឋបាលសាលាខេត្ត លោកស្រី ចក់ សុខចាន់ ប្រធានការិយាល័យស្ថិតិ និងអត្រានុកូលដ្ឋានសាលាខេត្ត ព្រមទាំងលោក លោកស្រី ដែលជាមន្ត្រីរាជការ និងតំណាងមន្ទីរ-អង្គភាពពាក់ព័ន្ធជាច្រើនរូបទៀត។
 
គោលបំណងចម្បងនៃកិច្ចប្រជុំនេះ គឺដើម្បីពន្លឿន និងសម្របសម្រួលនីតិវិធីក្នុងការផ្តល់ឯកសារស្របច្បាប់ជូនបងប្អូនប្រជាពលរដ្ឋឱ្យបានឆាប់រហ័ស និងមានប្រសិទ្ធភាពខ្ពស់ សំដៅធានាថាពួកគាត់ទទួលបានសិទ្ធិ និងសេវាសាធារណៈនានាស្របតាមច្បាប់កំណត់។ 

ក្នុងឱកាសនោះ លោក ម៉ៅ ឌុង បានសង្កត់ធ្ងន់ទៅលើតួនាទី និងការទទួលខុសត្រូវរបស់អាជ្ញាធរមូលដ្ឋាន ដោយមានប្រសាសន៍ណែនាំដូចជា៖ ចាត់ទុកជាកិច្ចការអាទិភាពខ្ពស់បំផុត៖ ការផ្តល់ឯកសារបញ្ជាក់អត្តសញ្ញាណ ដូចជា សំបុត្រកំណើត សៀវភៅគ្រួសារ សៀវភៅស្នាក់នៅ និងអត្តសញ្ញាណប័ណ្ណសញ្ជាតិខ្មែរ គឺជាតម្រូវការចាំបាច់បំផុត ដើម្បីឱ្យពលរដ្ឋមានសិទ្ធិពេញលេញ ងាយស្រួលរកការងារធ្វើ ទទួលបានសេវាសុខាភិបាល និងការអប់រំ។ ការធ្វើការប្រកបដោយតម្លាភាព និងល្បឿនលឿន៖ អាជ្ញាធរក្រុង-ស្រុក ឃុំ-សង្កាត់ និងមន្ត្រីជំនាញទាំងអស់ ត្រូវយកចិត្តទុកដាក់បម្រើសេវានេះជូនពួកគាត់ប្រកបដោយការទទួលខុសត្រូវ មិនត្រូវឱ្យមានការយឺតយ៉ាវ ឬបង្កការលំបាកដល់ពលរដ្ឋឡើយ។ ចុះផ្ទាល់ដល់មូលដ្ឋាន៖ ត្រូវចុះសម្របសម្រួលដល់ខ្នងផ្ទះផ្ទាល់ ជាពិសេសមិនត្រូវទុកឱ្យបងប្អូនពលករដែលទើបត្រឡប់មកពីប្រទេសថៃ ឬប្រជាពលរដ្ឋណាម្នាក់ ជួបការលំបាកក្នុងការរស់នៅដោយសារតែការខ្វះខាតឯកសារផ្លូវច្បាប់ទាំងនេះឡើយ ស្របតាមទិសដៅរបស់រាជរដ្ឋាភិបាលកម្ពុជា គឺ «មិនទុកនរណាម្នាក់ចោលនោះឡើយ»។

 ឯកឧត្តម ឧត្តមសេនីយ៍ឯក អ៊ុកចាយ បញ្ញារ៉ា អគ្គនាយករងមានប្រសាសន៍បន្ថែមក្នុងកិច្ចប្រជុំនោះដែរ ឯកឧត្តម ឧត្តមសេនីយ៍ឯក អ៊ុកចាយ បញ្ញារ៉ា បានលើកឡើងអំពីទិដ្ឋភាពបច្ចេកទេស និងយន្តការគន្លឹះៗក្នុងការអនុវត្តការងារ ដោយបានណែនាំដល់ក្រុមការងារ និងមន្ត្រីជំនាញអត្រានុកូលដ្ឋានរួមមាន៖ សម្រួលនីតិវិធីឱ្យសាមញ្ញ ប៉ុន្តែត្រឹមត្រូវតាមច្បាប់៖ មន្ត្រីជំនាញត្រូវពិនិត្យ និងសម្របសម្រួលលក្ខខណ្ឌគតិយុត្តផ្សេងៗ ជួយដល់ពលរដ្ឋដែលខ្វះខាតឯកសារយោង ឬបាត់បង់ឯកសារ ឱ្យមានភាពងាយស្រួលក្នុងការបំពេញបែបបទ ដោយវៀរចាកនូវរាល់ទម្រង់ការស្មុគស្មាញមិនចាំបាច់។ ពង្រឹងកិច្ចសហការជិតស្និទ្ធ៖ ក្រុមការងារតាមដានភូមិភាគ២ ត្រូវសហការឱ្យបានស្អិតរមួតជាមួយរដ្ឋបាលខេត្ត ស្រុក ឃុំ និងកម្លាំងនគរបាលប៉ុស្តិ៍រដ្ឋបាល ដើម្បីធ្វើបច្ចុប្បន្នភាពស្ថិតិប្រជាពលរដ្ឋ និងពលករចំណាកស្រុកឱ្យបានច្បាស់លាស់ និងកំណត់មុខសញ្ញាអ្នកខ្វះឯកសារឱ្យបានចំគោលដៅ។ ការអនុវត្តប្រកបដោយក្រមសីលធម៌វិជ្ជាជីវៈ៖ ឯកឧត្តមបានដាស់តឿនដល់មន្ត្រីផ្តល់សេវាទាំងអស់ ត្រូវរក្សាក្រមសីលធម៌ ភាពទន់ភ្លន់ និងស្មារតីជួយសង្គ្រោះប្រជាពលរដ្ឋ ដោយធានាថា រាល់ការផ្តល់សេវាអត្តសញ្ញាណកម្មនេះ ធ្វើឡើងដោយស្មោះត្រង់ គ្មានការទាមទារកម្រៃក្រៅផ្លូវការ និងឆ្លើយតបបានទាន់ពេលវេលា។

 ជាទីបញ្ចប់នៃកិច្ចប្រជុំ ថ្នាក់ដឹកនាំទាំងពីរស្ថាប័ន បានបង្ហាញនូវការប្តេជ្ញាចិត្តយ៉ាងមុតមាំក្នុងការរុញច្រានយុទ្ធនាការនេះឱ្យទទួលបានជោគជ័យ និងបានអំពាវនាវដល់បងប្អូនប្រជាពលរដ្ឋ ក៏ដូចជាពលករដែលទើបវិលត្រឡប់មកវិញ ឱ្យចូលរួមសហការផ្តល់ព័ត៌មាន និងទំនាក់ទំនងមកអាជ្ញាធរមូលដ្ឋានដែលនៅជិតបំផុត ដើម្បីទទួលបានការជួយជ្រោមជ្រែងក្នុងការធ្វើឯកសារអត្តសញ្ញាណកម្មផ្លូវការបានគ្រប់ៗគ្នា៕ 

ដោយ ហ៊ីម លុកម៉ាន