AKP កំពង់ស្ពឺ ថ្ងៃទី១៥ ខែមិថុនា ឆ្នាំ២០២៦-- ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ បានដឹកនាំក្រុមការងារជំនាញចុះពិនិត្យស្ថានភាពជាក់ស្តែង និងវាយតម្លៃការខូចខាត បន្ទាប់ពីមានករណីគ្រោះធម្មជាតិភ្លៀង និងខ្យល់កន្ត្រាក់ បានកើតឡើងកាលពីថ្ងៃទី១៤ ខែមិថុនា ឆ្នាំ២០២៦ វេលាម៉ោង៣:៣០ រសៀល មានភ្លៀង និងខ្យល់កន្ត្រាក់បានធ្វើឱ្យភូមិចំនួន៦បានរងផលប៉ះពាល់ក្នុងនោះរលំផ្ទះមួយខ្នង របើកដំបូលផ្ទះប្រមាណ៣៥០ខ្នង របើកដំបូលរោងចក្រកម្រិតស្រាល៥រោងចក្រ របើកដំបូលរោងមាន់១កន្លែង របើកដំបូល សាលាវិទ្យាល័យហ៊ុនសែនចំបក់២ខ្នង របើកដំបូលសាលាបឋមសិក្សាចំបក់២ខ្នង‎បាក់បង្គោលភ្លើងមួយដើម និងបែកកញ្ចក់រថយន្ត២គ្រឿងដោយដើមឈើរលំកិន។

‎ទោះបីជាគ្រោះធម្មជាតិខ្យល់កន្ត្រាក់នេះ បានបន្សល់ទុកនូវការខូចខាតទ្រព្យសម្បត្តិ និងអគារមួយចំនួនធំយ៉ាងណាក៏ដោយ ប៉ុន្តែមិនបានបង្កឱ្យមានគ្រោះថ្នាក់ដល់អាយុជីវិតមនុស្ស និងសត្វពាហនៈនោះឡើយ។

‎ក្នុងឱកាសចុះពិនិត្យនោះដែរ ឯកឧត្តមបណ្ឌិតអភិបាលខេត្ត ក៏បានណែនាំដល់អាជ្ញាធរមូលដ្ឋាន និងកងកម្លាំងពាក់ព័ន្ធ ត្រូវពន្លឿនការអន្តរាគមន៍ជួយជួសជុលផ្ទះសម្បែងជូនប្រជាពលរដ្ឋ ព្រមទាំងរៀបចំវិធានការសង្គ្រោះបន្ទាន់ ដើម្បីជួយសម្រាលការលំបាករបស់បងប្អូនប្រជាពលរដ្ឋដែលរងគ្រោះឱ្យបានទាន់ពេលវេលា៕

ដោយ៖ ម៉ែន ប៊ុនធីម