AKP ភ្នំពេញ ថ្ងៃទី១២ ខែមិថុនា ឆ្នាំ២០២៦-- ឯកឧត្តម កឹម ស៊ីថន រដ្ឋលេខាធិការប្រចាំការក្រសួងពាណិជ្ជកម្ម មានប្រសាសន៍ថា ទោះបីជាអង្ករនៅតែជាផលិតផលយុទ្ធសាស្ត្រដ៏មានសារៈសំខាន់សម្រាប់កម្ពុជាក៏ដោយ ក៏សហគ្រាសពាណិជ្ជកម្មកម្ពុជា (ស.ព.ក.) នឹងមានទស្សនវិស័យទូលំទូលាយជាងមុន ដោយនឹងស្វែងរកឱកាសក្នុងវិស័យ និងផលិតផលផ្សេងៗទៀតដែលមានសក្តានុពលស្របការអភិវឌ្ឍសេដ្ឋកិច្ច និងការបង្កើតតម្លៃជូនប្រទេសជាតិ។

ក្នុងពិធីសម្ពោធដាក់ឱ្យដំណើរការសហគ្រាសពាណិជ្ជកម្មកម្ពុជា (ស.ព.ក.) នាព្រឹកថ្ងៃទី១២ ខែមិថុនា ឆ្នាំ២០២៦ ឯកឧត្ត កឹម ស៊ីថន បានបញ្ជាក់ថា កម្ពុជាមានសក្តានុពល និងភាពអំណោយផលខ្ពស់ក្នុងវិស័យកសិកម្ម ហើយវិស័យស្បៀងអាហារនេះ គឺជាអាទិភាពសំខាន់សម្រាប់មនុស្សជាតិ ដែលនៅលើពិភពលោកមិនមានប្រទេសណាមួយដែលគ្មានតម្រូវការស្បៀងអាហារនោះទេ។ ហេតុនេះ វាពិតជាមានសារៈសំខាន់ចាំបាច់ជាបន្ទាន់ដែលកម្ពុជាត្រូវបន្តជំរុញអភិវឌ្ឍ និងទាញយកអត្ថប្រយោជន៍ឱ្យបានជាអតិបរមាពីខ្សែច្រវាក់តម្លៃសម្រាប់កសិផលសំខាន់ៗរបស់យើង ដូចជា អង្ករ ស្វាយចន្ទី ស្វាយ ម្រេច ដំឡូងមី និងផលិតផលកសិកម្មផ្សេងៗទៀត ដើម្បីបង្កើតការកែច្នៃក្នុងស្រុក និងពង្រីកទីផ្សារនាំចេញទៅតំបន់ និងអន្តរជាតិបន្ថែមទៀត។

ក្នុងន័យនេះ ឯកឧត្តមមានជំនឿយ៉ាងមុតមាំថា សហគ្រាសពាណិជ្ជកម្មកម្ពុជា (ស.ព.ក.) នឹងដើរតួនាទីជាដៃគូយុទ្ធសាស្ត្រមួយក្នុងការបន្តរក្សាសន្តិសុខស្បៀងប្រកបដោយភាពធន់ ជំរុញការវិនិយោគក្នុងវិស័យកែច្នៃកសិផល និងភ្ជាប់អ្នកផលិតកម្ពុជាជាមួយទីផ្សារ និងដៃគូពាណិជ្ជកម្មក្នុងតំបន់ និងពិភពលោក ដោយសហការយ៉ាងជិតស្និទ្ធជាមួយក្រសួង ស្ថាប័ន វិស័យឯកជន និងដៃគូពាក់ព័ន្ធ៕

ដោយ៖ ចាន់ សុភឿន រូបថត៖ សូស សាវី