AKP ភ្នំពេញ ថ្ងៃទី១២ ខែមិថុនា ឆ្នាំ២០២៦-- សហគ្រាសពាណិជ្ជកម្មកម្ពុជា (ស.ព.ក.) ដែលពីមុនមានឈ្មោះថា ក្រុមហ៊ុនហ្គ្រីនត្រេដ (Green Trade) បានបើកសម្ពោធដាក់ឱ្យដំណើរការជាផ្លូវការ នាព្រឹកថ្ងៃទី១២ ខែមិថុនា ឆ្នាំ២០២៦។ ព្រឹត្តិការណ៍នេះមិនមែនគ្រាន់តែជាការផ្លាស់ប្តូរឈ្មោះប៉ុណ្ណោះទេ ប៉ុន្តែជាការលើកកម្ពស់ទិសដៅថ្មីរបស់គ្រឹះស្ថានសាធារណៈមួយដែលត្រូវបានធ្វើកំណែទម្រង់ និងរៀបចំឡើងវិញចេញពីអតីតក្រុមហ៊ុន ដែលបានដើរតួនាទីយ៉ាងសំខាន់ក្នុងការគាំទ្រសន្តិសុខស្បៀង ការរក្សាលំនឹងទីផ្សារកសិផល ព្រមទាំងការជំរុញពាណិជ្ជកម្មអង្ករកម្ពុជាក្នុងរយៈពេលប្រមាណជាង៣០ឆ្នាំកន្លងមកនេះ។ នេះបើតាមការលើកឡើងរបស់ឯកឧត្ត កឹម ស៊ីថន រដ្ឋលេខាធិការប្រចាំការក្រសួងពាណិជ្ជកម្ម ក្នុងពិធីសម្ពោធនេះ។

ឯកឧត្តមរដ្ឋលេខាធិការបានវាយតម្លៃខ្ពស់ចំពោះការបំពេញបេសកកម្មការងារដ៏ល្អប្រសើរ និងសមិទ្ធផលដែលសម្រេចបានរបស់ក្រុមហ៊ុនហ្គ្រីនត្រេដនាពេលកន្លងមកនេះ ដោយចាប់តាំងពីពេលបង្កើតឡើងក្នុងឆ្នាំ១៩៩៨ រហូតដល់មានការទទួលស្គាល់ពីរាជរដ្ឋាភិបាល និងវិស័យឯកជន ទាំងក្នុង និងក្រៅប្រទេស ក្នុងនាមជាគ្រឹះស្ថានសាធារណៈចម្បង និងសកម្មលើការងារអនុវត្តគោលនយោបាយស្រូវ អង្ករ របស់រាជរដ្ឋាភិបាលកម្ពុជា រួមមាន ការចាត់ចែង និងរក្សាស្បៀងបម្រុងជារូបវន្ត ការចូលរួមរក្សាសេដ្ឋកិច្ច សន្តិសុខស្បៀង និងកសិផល ការចូលរួមលើកកម្ពស់ពាណិជ្ជកម្មបៃតង និងការអន្តរាគមន៍តាមការចាំបាច់ជាក់ស្តែង ក្នុងស្ថានភាពដែលប្រទេសជាតិជួបប្រទះនូវមហន្តរាយ គ្រោះអាសន្ន និងក្នុងអំឡុងពេលនៃការរីករាលដាលនៃជំងឺកូវីដ-១៩។

ឯកឧត្ត កឹម ស៊ីថន បានលើកឡើងថា ក្នុងបរិបទដែលប្រព័ន្ធពាណិជ្ជកម្មសកលកាន់តែមានលក្ខណៈស្មុគស្មាញ និងពិបាកក្នុងការទស្សន៍ទាយ និងការប្រែប្រួលខ្លាំងនៃខ្សែច្រវាក់ផ្គត់ផ្គង់តំបន់ និងសកលលោក និងខណៈដែលកម្ពុជាកំពុងត្រៀមខ្លួនសម្រាប់ការចាកចេញពីចំណាត់ថ្នាក់ក្រុមប្រទេសអភិវឌ្ឍន៍តិចតួច និងឈានទៅសម្រេចបាននូវចក្ខុវិស័យប្រែក្លាយទៅជាប្រទេសដែលមានចំណូលខ្ពស់នៅឆ្នាំ ២០៥០ យើងត្រូវការស្ថាប័នដែលមានសមត្ថភាព សក្តានុពល និងភាពបត់បែនខ្ពស់ ដើម្បីឆ្លើយតបទៅនឹងការប្រែប្រួលនៃសេដ្ឋកិច្ច និងពាណិជ្ជកម្មសកល។ ក្នុងបរិបទនេះសហគ្រាសពាណិជ្ជកម្មកម្ពុជា (ស.ព.ក.) ត្រូវបានបង្កើតឡើងដើម្បីឱ្យក្លាយទៅជាសហគ្រាសសាធារណៈដ៏ទំនើបមួយ ដែលអាចចូលរួមចំណែកក្នុងការពង្រឹងការប្រកួតប្រជែងរបស់កម្ពុជា ការធ្វើពិពិធកម្មសេដ្ឋកិច្ច និងការបង្កើតឱកាសពាណិជ្ជកម្មថ្មីៗសម្រាប់ប្រទេសជាតិទាំងមូល ដែលនេះមិនមែនជាការធ្វើទំនើបកម្ម និងកែទម្រង់ស្ថាប័នលើកទីមួយដែរ។

ឯកឧត្តមរដ្ឋលេខាធិការបានគូសបញ្ជាក់ថា រាជរដ្ឋាភិបាលកម្ពុជានៅតែបន្តចាត់ទុកវិស័យឯកជនជាកម្លាំងចលករដ៏សំខាន់នៃកំណើនសេដ្ឋកិច្ច ការវិនិយោគ និងពាណិជ្ជកម្ម ហើយថា ការបង្កើតសហគ្រាសពាណិជ្ជកម្មកម្ពុជា (ស.ព.ក.) នេះឡើងគឺមិនមែនក្នុងគោល បំណងដើម្បីប្រកួតប្រជែងជាមួយវិស័យឯកជននោះទេ ហើយក៏គ្មានគោលបំណងជំនួសតួនាទីរបស់វិស័យឯកជនក្នុងទីផ្សារនោះដែរ ផ្ទុយទៅវិញសហគ្រាសពាណិជ្ជកម្មកម្ពុជា (ស.ព.ក.) នឹងដើរតួនាទីជាដៃគូយុទ្ធសាស្ត្រមួយដែលនឹងជួយបើកផ្លូវទៅរកការអភិវឌ្ឍទីផ្សារថ្មីៗ និងជួយបង្កើតលក្ខខណ្ឌអំណោយផលសម្រាប់ការចូលរួមដ៏ច្រើនពីវិស័យឯកជនរបស់កម្ពុជា៕

ដោយ៖ ចាន់ សុភឿន រូបថត៖ សូស សាវី