AKP ភ្នំពេញ ថ្ងៃទី១១ ខែមិថុនា ឆ្នាំ២០២៦--ឯកឧត្តមសាស្ត្រាចារ្យបណ្ឌិត អឿង ចន្ថា អនុរដ្ឋលេខាធិការ ក្រសួងធនធានទឹក និងឧតុនិយម បានអញ្ជើញដឹកនាំវគ្គបណ្តុះបណ្តាលស្តីពី ការពង្រឹងសមត្ថភាពមន្រ្តីគណៈកម្មាធិការគ្រប់គ្រងអាងទន្លេខេត្ត លើការរៀបចំផែនការគ្រប់គ្រងអាងស្ទឹង-ទន្លេ ក្នុងខេត្តកំពង់ស្ពឺ នាថ្ងៃព្រហស្បតិ៍ ទី១១ ខែមិថុនា ឆ្នាំ២០២៦នេះ នៅសាលប្រជុំសាលាខេត្តកំពង់ស្ពឺ ។
វគ្គបណ្តុះបណ្តាលនេះមានការអញ្ជើញចូលរួមពី ឯកឧត្តម សមាជិក សមាជិកានៃលេខាធិការដ្ឋាន លោក ស្រ៊ុន ស្រ៊ន់ អភិបាលរង នៃគណៈអភិបាលខេត្តកំពង់ស្ពឺ លោក លោកស្រី តំណាងមន្ទីរទាំង១៥ របស់ក្រសួង-ស្ថាប័ន ជាសមាជិកនៃគណៈកម្មាធិការជាតិគ្រប់គ្រងអាងទន្លេ ព្រមទាំងលោក លោកស្រី អភិបាលនៃគណៈអភិបាលស្រុក និងមេឃុំពាក់ព័ន្ធ សរុបចំនួន ១០៥នាក់។

ឯកឧត្តមសាស្ត្រាចារ្យបណ្ឌិត បានបញ្ជាក់ថា វគ្គបណ្តុះបណ្តាលនេះ រៀបចំឡើងក្នុងគោលបំណងពង្រឹងសមត្ថភាពមន្ត្រីថ្នាក់ក្រោមជាតិ ជាពិសេសសមាជិកនៃគណៈកម្មាធិការគ្រប់គ្រងអាងទន្លេខេត្ត បណ្តាមន្ទីរ អង្គភាពនានាជុំវិញខេត្ត និងអាជ្ញាធរមូលដ្ឋានទាំងអស់ លើការរៀបចំផែនការគ្រប់គ្រងអាងស្ទឹង-ទន្លេ ដើម្បីលើកកម្ពស់ការគ្រប់គ្រងធនធានទឹកចម្រុះ និងការប្រើប្រាស់ធនធានទឹកប្រកបដោយសមធម៌ ប្រសិទ្ធភាព និងនិរន្តរភាព ដើម្បីឆ្លើយតបទៅនឹងការប្រែប្រួលអាកាសធាតុ និងការអភិវឌ្ឍសង្គម-សេដ្ឋកិច្ច។

ឯកឧត្តមអនុរដ្ឋលេខាធិការ ក៏បានផ្តល់អនុសាសន៍ណែនាំដល់បណ្តាមន្ទីរ អង្គភាពនានាជុំវិញខេត្ត និងអាជ្ញាធរមូលដ្ឋានទាំងអស់ ត្រូវរួមគ្នាចូលរួមសហការ និងគោរពអនុវត្តតាមបទដ្ឋានគតិយុត្តជាធរមានក្នុងការគ្រប់គ្រងអាងទន្លេ ព្រមទាំងបន្តកិច្ចខិតខំប្រឹងប្រែងកសាង និងអភិវឌ្ឍសមត្ថភាពបន្ថែមទៀតក្នុងការរៀបចំផែនការគ្រប់គ្រងអាងទន្លេ ដើម្បីធានាឱ្យបាននូវប្រសិទ្ធភាព និងប្រសិទ្ធផលខ្ពស់ ក្នុងការគ្រប់គ្រងធនធានទឹក និងការអភិវឌ្ឍប្រកបដោយចីរភាព៕
ដោយ៖ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)